事隔7年再合作 黃子華佘詩曼拍《 棟篤特工 》

撰文：東方新地 | 圖片：東方新地

《篤棟特工》 戲内關係似「冤孽」

戲外就好鬼老友，戲内就關係「冤孽」？新戲《棟篤特工》中，子華受聘於阿佘，會使晒阿佘啲錢，所以子華就用「冤孽」形容2人關係。今次阿佘飾演位高權重的人，劇中經常展露「嘴藐藐」嘅表情。阿佘話，試過問拍劇照嘅工作人員有冇影得自己正常啲，但結果得黑口黑面，一臉不屑嘅相！

子華就話今次阿佘做個大家應該未見過嘅角色，係個好「衰格」嘅人，仲讚呢個係個「好睇」嘅角色。至於被問及是否影射香港官員？阿佘就回應係新造型。「唔係影射，但係有呢個職位，不過唔係為咗啲政治嘢！」

黃子華：親熱戲對我嚟講微不足道啦！

提及起有冇親熱戲，子華同阿佘就話要視乎對方。子華之後直言：「我好被動，觀眾都唔想睇呢啲，係要激烈啲嘅！（打戲？）我係受聘於佢，使晒佢啲錢！」阿佘續說，戲中角色一生都為了追捕對方。至於感情線方面，子華笑稱：「我同阿佘一行埋就係情侶啦！」至於被問及有冇親熱戲，子華就話：「唔係想像中咁一般，嗰啲對我嚟講微不足道啦！」

子華擔正編劇　籌備劇本1年

子華透露，原本受到阿佘邀請合作拍電視劇，但後因時間關係決定拍電影，而子華笑言並沒有預料原來拍電影花的時間更多。擔任編劇的子華直言原本1年前就要拍，但不斷改劇本，改足1年！當中阿佘要求更十分高，子華同導演度好劇本後要俾阿佘審批，過程十分認真。而依家已經係第10稿喇！子華稱劇本貼近社會得來，不失少少離地風格，佢喺電影裏面會頻頻閙出笑話，笑指：「我係007師傅。」

至於兩人被問及票房壓力，阿佘覺得唔到佢控制，鬼馬子華笑住話自己一向冇票房，所以冇壓力！但指阿佘是「億億聲女星」，唔想影響佢嘅「億譽」，所以倍感壓力。