前TVB主播麥詩敏離巢後爆公司借衫恐怖經歷 著完竟周身痕仲有臭狐味
前主播麥詩敏 大爆公司借衫恐怖經歷
麥詩敏在最新一段爆料片中，指在離開TVB後有好多人問她：「新聞主播出鏡服裝係咪公司提供？」而她的答案是有兩個選擇：「1.可以借衫，2.自己買。」
大時大節要著到紅噹噹
麥詩敏首先講到主播出鏡時所著的服裝，好多時要因應節日或當日所報的新聞而選擇，例如大時大節就要著到紅噹噹或大紅大紫，報道死人塌樓之類的新聞時，就要著素色衫。
公司借衫試過著完痕痕哋
而講到在公司借衫，麥詩敏就大爆曾遇上過恐怖經歷，她憶述：「以前公司好好，會提供衫畀我哋借，好多時都會借到啲靚衫，有時仲借到大牌子都唔錯。不過有時都會遇到啲唔靚嘅衫，例如款式唔好或者Size唔啱，又試過著完個身痕痕哋，或者有陣臭狐味！」
買私伙衫一係淘寶一係深水埗
麥詩敏又透露做主播八年，買落不少出鏡的私伙衫，她笑言效果不俗：「屋企人知我多衫，都特登整多個衣櫃畀我，仲有個walk in嘅衣帽間。不過由於我個人比較Cheap嘅關係，一係淘寶一係深水埗，有啲19蚊、15蚊，有啲貴啲40蚊、50蚊，著出嚟過鏡都唔錯。」
網民錯重點指撞樣裕美
網民紛紛大讚麥詩敏貼地又真實：「講得好貼地又無架子」、「好真實，好貼地，好可愛」、「一係淘寶一係深水埗，夠true」、「好盞鬼又幽默」、「鍾意你好誠實」等，亦有網民錯重點，直指麥詩敏離巢後樣貌大不同，竟撞樣裕美：「以為係裕美轉行做主播」、「咁似林作女朋友」、「同之前出鏡報新聞個樣差咁遠」等。
做《香港早晨》3點半要起身
除了公開主播衣著秘聞外，麥詩敏日前又拍片分享當年主持《香港早晨》的返工流程，原來要前一晚8點鐘就要瞓，到第二朝3點半就要起身，用15分鐘極速梳洗再坐車返TVB化妝吹頭，6點正式做節目。
重提講錯「中東呼吸綜合症」
此外麥詩敏又以「新聞主播最驚遇到乜嘢稿？」為題，重提自己當年講錯「中東呼吸綜合症」事件，稱主播最驚遇到四大類型的稿：「第一係難讀字或者啲唔肯定嘅字，我哋當然識得去查字典啦，冇理由入到廠先唔識讀，唔知點算。比較印象深刻嘅例如渣滓唔係渣『宰』，骨骼而唔係骨『樂』。」
要練多幾次先敢入廠
麥詩敏續說：「第二就係啲敏感字眼，有啲字要好小心讀，例如小溪、西九、港交所。第三係好長嘅人名或者地名，好多時係外電稿翻譯過嚟，例如阿塞拜疆同亞美尼亞有主權爭議嘅納卡地區，即納戈爾諾卡拉巴赫地區，我自己見到呢啲字，都會讀多幾次、練多幾次先敢入廠，因為真係驚會食螺絲。最後係啲病嘅名，有時都好長好複雜，例如肌萎縮性脊髓側索硬化症，仲有中東呼吸綜合症。」
麥詩敏父親有份演《毒舌大狀》
現年31歲的麥詩敏父親是曾主持《警訊》長達15年的麥振江，《警訊》有史以來主持時間最長的經典主持，正氣凜然的外表令人印象深刻，有觀眾誤以為他是警務人員，稱呼他為「麥警司」。麥振江曾修讀TVB藝訓班，1994年開始退居幕後，直到近日再度復出，於電影《毒舌大狀》飾演判王丹妮入獄的高等法院原審法官。
家境富裕住西貢獨立屋
麥詩敏讀書時期原來都有拍過《警訊》，在很多的案發故事中擔綱演出，曾演女學生、受害者及目擊者等等。麥詩敏又被指家境富裕，與家人同住西貢獨立屋，學歷亦不俗，曾修讀香港科技大學工商管理學士，據知該學科屬熱門之選，競爭好大。到2015年麥詩敏加入無綫新聞部，去年擢升為無綫新聞台首席主播，至今年6月離巢。
將來還有什麼演唱會值得留意？
有不少歌手宣布舉辦演唱會，小編為你整合了香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
