【香港金像獎2019】毛舜筠逆齡造型激似胡定欣 網民：「又扮得幾似喎！」｜影視娛樂

編輯：Evita ｜圖片：電視截圖、網上截圖 ｜原文刊於：東方新地

【香港金像獎2019】毛舜筠逆齡造型被認錯做胡定欣

話說，噚晚惠英紅、鮑起靜及毛舜筠三位實力派演員組成「三個女人一個墟」，齊齊上台頒發「最佳女主角」一獎，最後由於電影《三夫》有大膽演出嘅曾美慧孜奪得影后之位！

然而，唔少網民都錯重點，將目光落喺頒獎嘉賓毛姐身上！皆因毛姐一頭長髮馬尾造型，加上一身低胸銀色西裝罕有性感打扮，大為吸睛之餘，一身造型更目測至少減齡十年，令大眾對毛姐刮目相看！

最搞笑嘅係，逆齡造型嘅毛姐反被網民認錯做胡定欣，笑稱「胡定欣好正」（又或者係曲線）！之後，網民更不斷留言，仲話毛姐「扮胡定欣又幾似」，大家又點睇？

雖然大家都「認錯」毛姐做胡定欣，但原來噚晚真正嘅定欣都有出席頒獎禮，見定欣以一頭短髮坐喺台下，相信大家都應該分得出邊個係毛姐，邊個係定欣啦～

二人曾經為健康品牌拍攝靈芝廣告，唔知係咪大家都食得靈芝多，食到個樣愈嚟愈似呢？

另外，網民除咗搞笑咁話毛姐同胡定欣「撞樣」外，亦有網民話毛姐比起昨晚衣著打扮相似嘅千嬅望落更年輕，完勝對方！睇嚟毛姐噚晚性感逆齡嘅打扮除咗令人眼前一亮外，更撼贏唔少在場女星！