【香港小姐2020】冠軍謝嘉怡爸爸曝光！排骨飯慶功、落選佳麗原來係表妹

原文刊於：東方新地 圖：東方新地、無綫娛樂新聞台

在《香港小姐2020》決賽上，最後五強佳麗包括何孟珊、鄺美璇、郭柏妍、陳楨怡及謝嘉怡逐一到台上講感言時，五位佳麗都表現激動、語帶哽咽，何孟珊更講到走晒音，不過廣東話麻麻的謝嘉怡（Lisa）卻令全場捧腹大笑：「我爹哋由我未識行就叫我去選港姐，我唔選，因為我唔係好女仔，平時唔化妝、唔著高踭鞋，爹哋想我嚟選，所以我嚟咗！」令台下一眾藝員嘉賓大笑。當選後被主持問到最想做咩，性格率真的Lisa話：「我好想食排骨飯、叉燒飯！因為參選要減肥，飲食好節制。」

謝嘉怡爸爸現身 攬女送花陪同受訪

無綫娛樂台直擊謝嘉怡「收工」後跟家人團聚及慶功，開門迎接的是Lisa口中有個港姐夢的父親，謝父原來相當年輕、打扮又潮，先跟女兒攬錫再送上鮮花，父女更一起接受訪問，謝嘉怡在才藝表演獻唱〈上海灘〉令全場相當驚喜，Lisa直言刻意揀唱廣東歌：「我廣東話唔好，大家都以為我唱英文歌，我揀唱中文係想大家知道我可以勤力練好廣東話。」又指姑媽為她翻譯，父親連日為她練歌。

謝嘉怡又應主持要求父女在鏡頭前合唱〈上海灘〉，謝父對女兒圓其夢想大感安慰：「因為Lisa有一半喺香港人，覺得去參加港姐好適合。」Lisa更爆自己十七歲時父親叫佢搬到香港，非常搞笑，而Lisa話參選港姐是希望入行拍喜劇，為大家帶來歡樂及正能量。而一直話想食排骨飯的Lisa亦終如圓達成夢想，邊食主持為她預備的排骨飯一邊笑得好開心，相當可愛。

唔單止謝父真相曝光，在家人為謝嘉怡安排的慶功宴上，之前被foul出局未能參加決賽的落選佳麗源菲然也在當中，謝嘉怡親揭二人關係，原來是表姊妹，源菲然的媽媽是謝嘉怡的姑姐，而源菲然話參選時亦唔知道表姊會參加，但沒有刻意隱瞞：「啲佳麗都知我哋嘅關係嘅！」 Lisa話綵排時曾傷腳令跳舞環節未能如期綵排，表妹在繁忙的綵排期間也抽時間跟她排練，又謂今次兩老表一起參加香港小姐，這個經驗好特別好難得！