雪姨「上水」拍片認錯承諾改壞習慣 網民唔受落：假仁假義﹗

雪姨：人生低潮時，要懂得起番身﹗

雪姨以「實踐斷捨離」為題分享自己打算斷捨離的五件事物，片中雪姨話過去個多月經歷人生低潮，兩星期前其指甲店領養的貓又因心臟病離世，雪姨話人生總會經歷高低，在低潮時，面對困難時，懂得在一堆碎片中起番身﹗

雪姨不斷重覆「要做一個更好嘅人﹗」

雪姨又話之前每隔三天出片，工作一直忙碌，經過過去個多月的沉澱後人生有所領悟，「之前走得太快，審視自己之後，我見到好多自己不足嘅地方，有好多嘢有好大進步空間，令我搵番初初拍片時嘅初衷﹗想做好每一條片嘅content，做一個更好嘅人，做一個更好嘅YouTuber。」

要斷捨離人際關係

雪姨話除咗了斷捨離物件之外，其中一樣要斷捨離是「人際關係」，她指人生就像是一架不會停下來的火車，中途有人上車有人下車，「經歷咗咁多之後呢，遇見過唔同嘅人，無論咩原因上車定落車，好嘅我會好好珍惜，唔好嘅呢，就當係過客，都多謝幫我上咗人生一課，」

雪姨改壞習慣 要分享愛保持謙卑

雪姨又話要改掉壞習慣，第一是take it for granted，她指媽媽對她的關愛以前可能覺得理所當然「自從出咗事之後，佢每一次同我望對眼，都會有一個好虛假嘅微笑，問我需要乜去表達關心，出咗事之後，除咗媽咪，朋友、前輩都好關心我﹗我感受身邊人嘅關心同時，要學識將愛傳開去，無論識定唔識都好，spread love同stay humble」

雪姨又話以為自己一直好堅強「我經歷過咁多林林總總嘅嘢，以為都應該幾堅強，但喺人生低潮嘅時候，原來我冇想像中咁堅強，呢段時間我諗，令自己個內心再強大，將成件事消化，再鼓起勇氣企返起身，做一個更好嘅人﹗」

新片Dislike數被隱藏 網民迅速破解

由於Youtube去年更改版面，影片Dislike數字被隱藏，只有片主才能看得到，不過有網民就發現Chrome瀏覽器上有一個「Return YouTube Dislike」擴充元件，只要下載以後，就能恢復被隱藏的「Youtube影片倒讚（Dislike）數」！

原來影片發放了一日，累積的Dislike比例仍是遠趣讚好分享，至於留言區亦十分精彩：

網民留言回應主題：香港人已經斷捨離咗你

雪姨終於蒲頭，雖然語氣明顯較前沉實，又沒有炫富，網民反應兩極，有網民留言支持她「復出」，同時有不少網民唔受落，留言「直接拍條片道歉啦﹗」、「如果真係想做一個更好嘅人，第一條片就應該道歉啦﹗」、「唔使你教斷捨離，香港人已經斷捨離咗你」、「好假囉﹗」、「想做一個更好嘅人就唔好再出嚟﹗」、「做一個好人係做出嚟唔係靠把口﹗」