陳豪、張兆輝無懼病毒武漢登台 李佳芯聞言即搞笑扮驚擰歪面
廣告
為咗賺錢，有時真係可以去到好盡，好似早前陳豪、張兆輝就曾經勇者無懼，去到武漢登台，陳豪仲帶埋媽媽去當地。陳豪自爆自己從「疫區」武漢工作回港後，就直接出席TVB直播節目《慈善星輝仁濟夜》，李佳芯(Ali)聞言表示怕怕，仲搞笑叫陳豪「唔好搞我啦」！
撰文：東方新地 圖片：東方新地、bigbigchannel 截圖
陳豪搵命搏偕母北上到武漢登台
好老公好爸爸陳豪為咗賺家，早前帶同母親到武漢登台，回港後更即時出席其他活動。育有三名子女嘅佢表示而家正接受「自我隔離」中，仲表示喺武漢期間除咗登台，就只有去過酒店同機場，連落街食飯都唔敢，登台期間仲要求取消握手環節，做足安全措施，相信好安全。
同場嘅李佳芯(Ali)聽佢接受訪問時先知道陳豪曾經去武漢，即刻搞笑話：「等陣我企佢隔籬喎，如果佢有頭暈 ，我就幫佢頂一頂啦。」咁啱陳豪行過，Ali即扮驚擰歪面，又叫陳豪：「唔好搞我啦，今天我做慈善！」，場勁搞笑！
張兆輝做足安全措施 叫大家記得戴口罩
另外，張兆輝早前亦都帶同太太去武漢登台，佢表示唔係搵命搏，只係一般工作，亦都表示有做好安全措施，帶咗大量口罩前往。佢仲話去到武漢市面環境一切平靜，唔覺得衛生情況有咩問題，不過亦都有提到喺當地搭飛機接駁巴士時，前面有女士喺無戴口罩嘅情況下打咗十幾個噴嚏。點都好，大家呢排出入都要小心啲啊！
