激罕嫩口陳法拉！23歲出道前日本水着Model 照曝光

圖文：東方新地、新傳媒資料室

精通日語 陳法拉曾經日本留學半年

陳法拉出道前曾經喺日本留學半年，精通日語嘅佢，讀讀下書無啦啦被當時嘅監護人介紹咗去日本時裝雜誌《JJ》做model。171cm樣靚身材正嘅陳法拉，絕對比嗰啲5呎差吋半嘅𡃁模超班，法拉重冇改埋啲奇怪英文名，直釋「法拉」做日文片假名「ファーラ」嚟行走江湖，一樣成為火熱model，喪多job做。

就好似記者發現嘅呢本2005年7月號《JJ》，入面有成20頁「fashion feature」都見到佢，但講到養眼，梗係首推呢批索爆三點式相啦！

陳法拉大方承認「係我嚟㗎! 」

記者向法拉求證，佢大方承認：「係我嚟㗎！當年我喺日本讀書，咪做下part-time model，幫《JJ》影相囉！我重有同日本經理人聯絡㗎！佢重成日幫我傾工作添！希望將來有可能去日本拍電視劇或電影啦！」

原來重有聯絡，出道後的陳法拉更加以Shiseido中國及香港「美白大使」嘅身分，去到北海道同日本嘅栗山千明、韓國嘅崔智友，出席Shiseido宣活動啦！

法拉撈得最掂

喺呢本陳年7月號中，有好幾個同法拉一齊幫《JJ》影相嘅𡃁模，今時今日已經成為日本名模嘅其中一員。好似企佢隔籬嘅櫻井裕美（左），而家仍然活躍喺日本模界，大型時裝展好似「Tokyo Girls Collection」同埋「Kobe Collection」，佢都經常有份行。激罕嫩口陳法拉 出道前日本水着Model 照曝光

另外，落合砂央里就已經退出模界去咗澳洲讀書，而Mie間唔中重可以喺電視做個主持仔，星途暗淡嗰隻。

最初期嘅《JJ》係以報紙號外形式《每週Josei Jishin》喺1975年推出嘅，而呢本女性潮流雜誌嘅主要對象係大學生同OL。咁多年嚟都咁受歡迎。

攻日港模逐個數

香港曾經有過「𡃁模之亂」，好多𡃁模為咗上位，派奶露肉層出不窮，轉頭又話攻台、攻日，不過數埋數埋，其實當中只有下面3個真係叫可以「跳出香港」勉強攻到入日本！

Angelababy

168cm 21歲攻日 成功度：★★★★★

初初只係幫日本雜誌《Ray》做下model，之後氹到日本Avex簽佢，除咗有得行日本大型時裝展「Tokyo Girls Collection」之外，近年重搶埋安室奈美惠飯碗做洗頭水代言人！

諸葛梓岐（Marie）

170cm 28歲攻日 成功度：★★★☆☆

成功喺「Tokyo Girls Collection」行show，舊年重吹到話進軍日本樂壇，但最後不了了之。

最後同Neway二太子薛嘉麟拉埋天窗，嫁入薛家做少奶奶。

周秀娜

167cm 26歲攻日 成功度：★★★☆☆

賣肉賣到出晒位嘅周秀娜，曾經進攻日本市場，同樣有份行「Tokyo Girls Collection」，寫真賣到去日本，連日牌內衣都搵佢做模特兒，可以話係「露」出頭喇！