陳柏宇妻符曉薇宮外孕 腹痛狂出血切左邊輸卵管保命
日前，Leanne在其youtube頻道上載一段題為「『Leanne 有話兒』究竟之前神神秘秘發生咩事？而家解答大家！女人事」，約12分的片段，片中她在簡潔雅緻的新居梳化上盤膝而坐，穿著棕色tee短褲，抱著白色咕𠱸的Leanne精神尚算不錯。
她表示2018年誕下女兒Abigail後，因為囡囡好喜歡BB，所以一直希望為女兒添多名細佬妹，而今年5月得知懷孕，兩家上下高興非常 ，怎料之後不時腹痛，更嚴重到不停出血，產檢才發現是宮外孕，胎兒着床的左邊輸卵管爆裂，要進行緊急手術。Leanne表示當時心情非常低落，一來大家都歡天喜地準備迎接BB來臨，不想大家失望，二來曾不停幻想胎兒可能會在某角度健在，不過因為出血問題嚴重，必需進行手術。當時醫生讓Leanne選擇修復左邊輸卵管或直接切除，沒有這方面經驗的Leanne只好在網上參考個案，經一輪研究，看到原來選擇修復撕裂輸卵管的媽媽，之後亦有可能再在該處着床再致宮外孕，所以最後決定將其切除。
手術完成後，Leanne幸獲一位經歷過兩次宮外孕的好友陪伴，才走出陰霾，當然家人支持亦很重要，她謂：「做完手術嗰一個月就好似坐月咁，媽咪日日嚟照顧我，佢唔識煮嘢食都煮俾我。」又感謝老公陳柏宇、奶奶等等陪伴度過，不過今次經歷太深，Leanne對再懷孕畢竟失了點信心，但將來都會再試，觀乎Leanne在片段中表現冷靜，相信無論心理和身理都康復得七七八八，希望她早日完全復原，加油！
陳柏宇兩公婆 爭住抱女
陳柏宇同太太Leanne於2017年結婚，18年更榮升父母，生咗囡囡Abigail，兩公婆經常同囡囡形影不離，仲成日喺社交網站到分享佢哋湊女嘅日常生活。更曾在無綫節目分享一家三口的點滴。
原來現實中Jason同Leanne會爭住抱Abigail，如果Jason爭唔到就會叫Abigail快啲喊，因為囡囡一喊就代表對方輸咗，可以畀返Jason抱，十分搞笑！
陳柏宇為過去大平反
另外，車婉婉仲喺節目入面畀佢哋兩公婆為之前嘅事作平反，好似之前Jason出街玩，結果屋企嘅所有小生命都出事，仲搞到Leanne要凌晨4點幾喺網上出文發洩。
Jason就表示，自己個日已經得到批文可以出街。不過Leanne就踢爆，原本係佢約咗朋友去打麻雀先，但佢就讓咗Jason畀佢去玩，而事發個時佢打畀老公，個時Jason已經飲醉咗，仲話已經進入咗「忘佢狀態」，令Leanne哭笑不得。
望囡囡快點長大
好多人都會以為，Jason作為「愛女控」同「愛妻號」，返到屋企一定會係錫佢哋是但一個先，點知Jason就大爆原來兩者都唔係，佢返到屋企先摸狗仔阿V，其次係狗仔Bessie，老婆都只係排第三！仲話因為Leanne名氣本身已經係第一，所以留到最後先錫。
被問到生小朋友之後嘅改變，Leanne表示，生完囡囡之後就好少外出時間，即使約朋友都好，都會選擇喺自己屋企搞聚會。
而Jason就同樣比以往放更多時間喺屋企，「以前會喺Gym房留4-6個鐘，但依家唔會，依家有時候早收工嘅話，就會返屋企睇個女，之後再出去」。
好多父母都唔希望小朋友大得咁快，但對於Jason呢個「愛女控」嚟講，佢竟然好想囡囡大得快啲，因為依家帶佢出去好麻煩，要帶呢樣又要帶嗰樣，又唔可以餵固體食物，到佢咩都可以試個時就方便喇！」不過，雖然Jason口就咁講，但相信佢內心其實都唔捨得囡囡大得咁快。
陳柏宇感激老婆為家庭付出
陳柏宇同老婆Leanne一齊咗7年，佢認為Leanne生小朋友之前係「大方、節儉、講道理」，而生小朋友之後就係「偉大、英雄、抵得諗」，因為Jason喺餵奶嘅時候曾經對囡囡爆喊而無力招架，仲試過同囡囡一齊喊，而Leanne就係呢方面費盡心思，會投放好多時間喺囡囡身上，大讚對方「真係英雄嚟」！
陳柏宇：我同佢嘅關係好完美
其後，Jason續指自己同Leanne嘅關係已經好完美，Leanne仲大讚對方好識維持關係，因為Jason好識得表達自己，特別係喺工作唔如意嘅時候，Jason會send一啲「佢有幾愛我（Leanne）、有幾愛呢個屋企，好感恩有呢個家」嘅說話，令Leanne好感動。
講到呢到，Jason就望住Leanne重新講一次當日個Message，「我好感激有你，為家庭作出嘅所有努力同犧牲，I Love You Baby」。
其後，Jason仲自爆佢其實每日都會同太太講「我愛你」、「Good night」、「Sweet dream」等說話，而每朝起身都會錫Leanne一啖，唔怪之得Leanne話Jason好識維持彼此間嘅關係，真係好Sweet呀！
符曉微：幸福非必然
而Leanne亦都有心底話同Jason講，Leanne表示，自己一直都好感激有Jason呢個老公，因為佢喺好多事上都幫到手，除咗照顧囡囡同家庭外，仲好識照顧Leanne嘅感受。
Leanne一路喊一路講，「有好多朋友同我講，佢哋啲老公唔會咁樣做，我好感激佢願意做呢啲嘢，其實好少有，我覺得自己好幸福，我知道唔係必然，依家自己遇到一啲問題，佢都好支持我」，呢番話真係好感動，連車婉婉都感動流淚。
同場加映：囡囡百日宴後大變樣 老婆：第日過關點算？！
早前，Leanne喺IG上載咗張相，見到Abigail四個月前影嘅證件相睡眼惺忪眼仔細細咁嘅樣，但到日前再影相時已有好大分別，對眼大咗好多五官仲出晒嚟，十分精靈可愛！尖尖嘅下巴仔睇起上嚟仲開始有幾分似Leanne添，難怪Leanne亦大呻：「你下次過關點算？」認真笑爆嘴！
陳柏宇囡囡百日宴
轉眼間，Abigail已經3個多月大，陳柏宇昨晚為女兒設百日宴慶祝，並邀請了逾200位親朋好友出席。陳柏宇透露，原本百日宴應該在早前舉行，可是因為工作和行程排滿檔，實在難以分身，所以才推遲囡囡的百日宴。
Abigail任抱唔嬲
生得精靈可愛、穿着格仔Look的Abigail一登場，立即成為全場的焦點，乖巧的她任由來賓抱，完全不哭鬧，逗人喜愛，陳柏宇和Leanne也難得「鬆一鬆」，放心將囡囡交給親友照顧，自己則可以好好的招待朋友，談談近況，就是一個溫馨的family gathering。
陳柏宇和Leanne雖然打扮很隨意，可是設宴時卻花了不少心思，他們特別訂製一個幾層高的蛋糕給囡囡，另牆上掛有寫着Abigail名字的霓虹燈，陳柏宇笑言要將它掛在囡囡將來的房間中。
百日宴開席時，正值Abigail平常的就寢時間，不過她成功「戰勝睡魔」，努力提起精神，跟着父母到每一枱與親友們合照留念，陳柏宇都忍不住讚囡囡乖巧，他又指已經好久沒有這樣輕鬆的與家人朋友敍舊閒談，所以自己都玩得很開心，也希望每位親友都留下歡樂回憶。
陳柏宇囡囡憤世嫉俗樣影證件相
自從今年9月陳柏宇囡囡出世後，Jason就有女萬事足，不時都喺個人社交網大晒B女Abigail嘅生活相。早幾日前，呢位新手老竇就帶咗呀女去打針，仲痛埋呀女個份，Jason真心體會到心頭肉嘅意思！
日前，Jason兩公婆就帶住Abigail去影人生第一次嘅證件相。平日喺老竇鏡頭下表情多多嘅Abigail今次影證件相就俾足驚喜父母，皆因張證件相見到佢喞都唔笑咁，連媽咪Leanne都話：「點知佢整個憤世嫉俗樣出黎」，認真搞笑！
雖然話媽咪對於呀女呢個不滿樣有啲投訴，但其實如果真係咁唔鐘意都可以同呀女再去影過嘅，咁就唔洗擔心呢個憤世嫉俗樣要用喺passport度5年啦！
陳柏宇正式宣布囡囡中文名
陳柏宇（Jason）自去年9月底榮升做爸爸之後，隨即化身做「晒女狂魔」，不斷瘋狂喺個人社交網上載囡囡Abigail嘅得意相外，仲幫呀女開埋個全新帳戶！陳柏宇其後於呀女嘅個人社交網公布囡囡Abigail有中文名啦！Jason就上載出世紙上面寫有「羿辰」兩個字嘅相，並留言：「i now officially have a chinese name!!（我依家正式有中文名啦！）」
據了解，Jason太太符曉薇（Leanne）就透露呀女個名係搵師傅改，指師傅計過囡囡個八字，覺得佢重金，Leanne就覺得「羿辰」呢個名好靚，所以就揀咗呢個名。
自爆「爆笑」生產經過 陳柏宇太太：「條粉蛋喊到豬頭咁」
Leanne日前於社交網分享囡囡出世當日嘅「生產記」，佢留言話：「首先25號9點幾起身痾尿，點知好似唔識停咁，仲有少少血，心諗呢啲會唔會叫做穿羊水呢，我仲喺廁所大叫陳廣偉（Jason），點知條粉蛋以為我叫佢執屎執尿，佢扮聽唔到繼續瞓覺。」
穿羊水 | 陳柏宇懶理：「拍戲嗰啲唔係咁」
見老公繼續瞓唔理自己，Leanne唯有自己打畀醫生求助，醫生聞言即叫佢入院，然後：「我入房拍醒條粉蛋，出門口嘅時候我仲同佢講，攞埋個走佬袋出去，點知佢同我講話唔使，佢話唔似有啲乜，人哋拍戲嗰啲唔係咁，如果真係要生嘅先返嚟攞，最弊嘅係我竟然聽佢講。」
陳柏宇陪產 不忘搞爛gag
安全到達醫院之後，去到醫院姑娘檢查完確實係穿羊水，即刻call醫生返嚟接生。
Jason當時仲以為老婆未生得，好得戚咁同姑娘開玩笑：「條粉蛋仲同姑娘講，乜同拍戲咁大分別嘅，乜穿羊水咁平淡，姑娘同佢講嗰啲係做戲。之後入到手術室門口，條粉蛋換完套藍色手術室衫出黎，好正經同我同姑娘講，你好我係今日嘅醫生，呢個時候麻醉科醫生行過嚟，同我哋介紹自己，點知條粉蛋好厚面皮咁講，原來你係醫生，我以為我自己係醫生，啲醫生護士喺度好開心咁樣笑，仲同我講你先生好搞笑，我問番佢哋搞事定搞笑丫，之後我就推入手術室。」令Leanne哭笑不得。
陳柏宇陪產「喊到豬頭咁」
臨產一刻，Leanne開始好緊張，因為佢聽聞女人生B都要經歷超粗麻醉針同10級痛：「喺嗰個時候先開始緊張，因為聽好多朋友講打背脊嗰支麻醉針係好痛，啲醫生同護士好溫柔，一路叫我唔好緊張，話支針好幼 唔會痛。竟然真係唔痛，之後我下半身已經進入麻醉嘅狀態。」
「喺嗰個時候10分鐘唔使我個女就出咗世，成個過程我都唔係好感受到好痛的感覺。聽到佢（囡囡）喊果下真係滴咗幾滴眼淚，之後望佢條粉蛋（Jason）佢已經喊到豬頭咁。醫生仲問佢剪唔剪臍帶啊，佢即刻say no 。」
生B唔可怕 最可怕係…
最後Leanne仲話原來生仔並唔可怕：「手術半個鐘唔使就完成，原來生小朋友都唔可怕。最可怕係個老公日日夜夜對住你個女係咁影係咁影。」
陳柏宇「痴漢湊女法」 有女萬事足
自從B女 Abi出世後，陳柏宇日日夜夜都掛住湊女。老婆符曉薇形容「個女一出世就有個痴漢永遠跟著佢」
呢個男人真係好恐怖，佢自己影個女就算啦。仲要逼我幫佢同個女合照，你睇佢個樣幾滿意，你睇我個女個樣幾無奈。
符曉薇做母乳媽媽 嘆：「滴滴皆辛苦」
陳柏宇晒一家三口合照 激動報喜
陳柏宇（Jason）喺個人社交網上載一張一家三口嘅溫馨相，激動留言：「我一見到佢就忍唔住喊！Abigail，i choose u！（throw out pokeball）」，正式宣布自己榮升做人父！
據知，昨日Jason太太符曉薇（Leanne）剖腹誕下囡囡，B女重5.2磅。喜獲小公主嘅Jason喺一日內就已經不斷更新自己個人ig，上載3張呀女嘅相！
佢隻腳板仔都幾大。
緊隨其後，愛女心切嘅新手爸爸Jason，更隨即為寶貝女開設專屬ig。Ablgail啱啱出世 先得1日大 就有自己嘅個人ig，一睇就知老竇有幾咁高興！
Jason更大方為愛女Abigail上載咗一張個人正面獨照，兩夫婦早有準備已為囡囡改好英文名。
陳柏宇升呢做爸爸 即變晒女狂魔
當然，喺Ablgail嘅ig度會見到老竇Jason不斷為愛女更新可愛靚相！
仲有片睇！
望著前世情人，Jason都忍唔住伸手不停同囡囡互動下。
提前報到的Ablgail，重5.2磅，算係細碼b，細細粒，頭仔得老竇個拳頭咁大咋。
‘
每張相都配有老竇嘅精心留言，好似以下呢張，Jason就寫住：「roar（咆哮）！！」
陳柏宇為愛女開live 老婆都頂佢唔順：「痴線㗎」
昨日傍晚，Jason更急不及待為一日大的愛女開live，喺個live入面仲會聽到Jason嘅一堆bb話！一開場就聽到太太符曉薇喺旁邊講：「第一日有live，痴線㗎」，Jason自己都笑言：「我自己都未開過live」
喺live入面，Jason簡直係花痴狀態咁，360度咁圍住囡囡轉，不停對著瞓緊覺嘅Abi say hello。
玩玩吓，發現囡囡好多頭髮，仲好抵死咁笑囡囡「含發量」好高，一心想畀網民睇真啲bb嘅濃密頭髮，突然又發現囡囡換個角度睇，頭髮好卷，好似「黑人」。
為咗畀粉絲一睹囡囡開眼樣，Jason不停同囡囡Say hello，又搞笑咁叫囡囡起身：「起身啦，夠鐘返學啦」氹到喺旁邊嘅Leanne不知幾開心。
然後，Jason又講到囡囡15分鐘後將迎來「人生第一餐」，不過就用好可惜嘅語氣話「餵奶無得開live，仲要係餵人奶」，相信在旁的Leanne望著花癡狀老公，應該相當無語。
老婆隔空呷醋：「佢已經唔記得老婆姓乜」
雖然愛女還愛女，都唔可以唔理個老婆嘅 ！Jason老婆都頂唔順老公淨係掛住理個女，結果Leanne就上載張老公甜望囡囡嘅相，留言：「Welcome to the world Abigail 係今日開始陳生眼入面 已經被另一個女人霸佔左 佢已經唔記得咗佢老婆姓乜」老婆擺到明呷梗醋喎陳生！
同時，有網友搞笑留言話：「你睇下佢短短一日post 左幾多個 果個女人張相」Leanne都回覆嗰位網友，指：「你睇到個重點了」，醋意極濃！
話雖如此，Leanne都知老公係錫個女係件超甜嘅事，皆因Leanne都喺自己個ig晒出Jason抱住B女甜笑個樣，相信呢位新手媽咪同人妻自己見到呢個畫面都覺得好冧嘅！
當爸第二日 頭號任務：繼續晒女
今日Jason又繼續晒女，並留言：「day 2 of my escape.」似乎意指見到囡囡就係「Escape」，可以幫佢逃離工作上嘅忙碌日程，有心靈治療嘅感覺！呢位新手老竇堅冧到爆燈！
呢位新手爸爸已經好熟手啦。
我家公主今日笑過兩次。兩次我都影唔到。真失敗
有板有眼 陳柏宇孖老婆上堂學湊B
早前，剛宣佈太太有喜嘅陳柏宇舉行簽唱會，獲大批粉絲支持。他在台上和粉絲玩模仿湊BB遊戲，幫公仔沖涼、餵奶和換片時有板有眼，似乎已經做足準備做新手爸爸。
陳柏宇表示，B女出世後，會請陪月阿姨幫手湊。他和太太符曉薇都已經開始上堂學習湊B，又爆太太晚上顧著玩電話唔肯瞓。他說：「太太會照常返工，她佗得BB好健康，心臟好強壯，不想過份保護她，希望她在懷孕期間都有自己的生活。」
發高燒要老婆大住個肚送入院
陳柏宇日前在Instagram上載了一張自拍照，指自己發高燒，更一度燒至39.6度，情況頗為嚴重，老婆符曉薇見狀，連夜將他送院治理。
據知，符曉薇已經懷有8個月身孕，理應應該遠離醫院，以免受細菌感染，不過她為了老公，仍然願意「帶球」前往醫院，令Fans大讚她非常Sweet，連陳柏宇也忍不住指太太「超有義氣！」。
《1+1的深情》爆房事
其實之前二人在田蕊妮主持的《1+1的深情》節目中接受訪問，當時Jason被問到對上一次行房他直言兩周前，阿田笑佢哋隔咁疏，阿田再問每周行房多少次？Jason笑說：「我諗最多都係一次，以我嘅能力！」
二人又於節目中畫將來跟小孩一起的一家三口圖畫，估唔到咁快夢想成真。
陳柏宇符曉薇結婚紀念日 晒恩愛：每天愛佢多一些！
陳柏宇與符曉薇去年7月2日結婚，日前是他們的結婚週年紀念日，二人都有於instagram 發佈合照。符曉薇於instagram留下愛的宣言，表示：「萬眾期待嘅日子，今日陳生終於放假。我地終於可以拍下拖、行下街、食下飯，慶祝埋我地第一個結婚週年，同第七個拍拖週年。一齊左七年一啲癢都無，仲每天愛佢多一些，有時仲難捨難離，希望呢個感覺到永遠！」真係好sweet！
囡囡提早報到 預產期係10月
陳柏宇4月時公布太太符曉薇懷孕，囡囡將於10月出世。懷孕中的符曉薇身形有少許發福，但依然咁靚！但係符曉薇就話自己好似家有囍事嘅吳君如！
和太太不是一見鐘情
陳柏宇 喺拍《喜愛夜蒲》嘅時候認識太太，「起初第一眼見佢其實唔係Love at first sight、唔起眼㗎！係因為之後我哋一齊玩啤牌，透過玩啤牌嘅過程，認識佢個人，先至開始有好感，慢慢開始發展…33歲結婚並唔係咪計劃之內，我心目中結婚嘅時機唔係用歲數去限制，而係心態，係我覺得我夠成熟去結婚。」
陳柏宇 話冇特定一刻認定符曉薇係太太，而係一路相處累積番嚟，「我喜歡佢嘅性格，率直、個人真，有可愛嘅時候，有嬲嘅時候，好簡單嘅形容，但兩個人相處之間嘅火花係最重要，再加上我哋嘅磨合係好。」
陳柏宇同符曉薇在倫敦另類影婚照，相當甜蜜自然！
英國嘅超市都係婚照的取景地，貼地又有特色！
承諾陪伴你一輩子
兩人因為拍攝電影《喜愛夜蒲》而相識，後來墜入愛河。兩人更不時在網上貼上合照放閃，更在今年正式步入另一階段，向對方承諾會陪伴彼此一輩子。Leanne更搞笑地說結婚是兩人「成為老襯的一刻」，大概是因為餘下的一生都會為了對方的開心，做盡傻事吧！
在你面前我只是普通人
不難發現陳柏宇與老婆Leanne的pre-wedding婚照，沒有華麗禮服，也沒有宏偉的場景。兩口子只是穿上了便裝，隨意地在日常生活的場景如火車站、超市等，配上甜蜜的互動而已。Leanne在社交平台上分享是次婚照，兩人只想做回自己。放下歌手及模特兒身份的Jason及Leanne在彼此眼中，不再需要用華服美妝的掩飾，可以做回最原來的自己。
你的家人就是我的
有人說結婚不只是對另一半的承諾，更意味著兩家人的結合，不再分彼此。所以說1+1其實等於4，陳柏宇與老婆Leanne在結婚前，已經把彼此的家人當作自己的家人疼愛。Leanne的爸爸曾經因為心臟病而入院，當日正值陳柏宇的生日；Jason並沒有在意自己的生日，反而只顧著心情很差的Leanne，更替她吹頭讓她稍作休息。陳柏宇告訴大家，不論發生甚麼事，自己都會是老婆最堅強的後盾，陪她面對風風雨雨。
Leanne亦常常陪伴陳柏宇的家人一起遊玩，在結婚前更與Jason一起，讓未來老公年紀老邁的太公飲上曾孫新抱茶。
能與你放閃 是一種幸福
如果有留意陳柏宇的Instagram，不難發現Jason常常貼上與老婆的合照放閃。有不少藝人因為怕公開戀情會讓自己人氣下滑，故會隱瞞拍拖甚至結婚；不過陳柏宇卻一點也不介意與自己的粉絲分享自己的另一半。Leanne與陳柏宇拍拖的時候，曾被記者拍到；當時Leanne為了不影響Jason的事業，對記者稱兩人並非在一起。而陳柏宇卻大方承認戀情，因為Jason覺得與Leanne拍拖不是一件不能見光的事。亦因為Jason讓Leanne得到了滿滿的信心，兩人愈來愈多在網上放閃。
你永遠是我的女神
陳柏宇經常稱老婆作「女神」，絕對是甜到漏。陳柏宇不只會在Leanne化上美艷妝容時稱對方為「女神」；在老婆素顏時亦會帶著滿滿的愛意，稱對方為「女神」。作為模特兒的Leanne拍起照來，自然型味十足；但Jason卻最愛老婆露齒笑的樣子，因為不論老婆樣子如何，都會是自己永遠的女神。
不能與你分別 因為分分鐘需要你
人們常說小別勝新婚，但陳柏宇與老婆卻是一分鐘也不想分別。因為工作緣故，Leanne與Jason經常會做空中飛人，飛到不同地方工作。Leanne就曾在網上貼上一幅與Jason錫錫的照片，寫上「每次每次離開佢，都超級無敵掛住佢」，更指自己分分鐘需要Jason，真的是羨慕死人了！而Jason的放閃功力一點也不弱，在Leanne到外地工作過後回港時，陳柏宇就帶同寫有「女神 靚微」的紙牌接老婆機，Leanne指看到時笑死，但也甜死～
能與你一起工作是優差
陳柏宇與老婆Leanne婚後多了不少情侶檔的工作機會。對他們來說，這些一起工作的時間根本就如約會一樣，寓工作於娛樂。雖然Jason與Leanne已經結婚住在一起，但其實這些機會對他們來說都是寶貴的。作為歌手的Jason經常要沒日沒夜地工作，而Leanne的模特兒工作也較難定時定候；故每次一起工作，其實對他們來說都是一次見面的機會，可謂是一種優差。
將來還有什麼演唱會值得留意？
有不少歌手宣布舉辦演唱會，小編為你整合了香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
