陳展鵬淘寶買車胎瀨晒嘢 網上開炮反遭大陸網民恥笑

撰文、圖片：東方新地

陳展鵬淘寶買車胎瀨晒嘢

近年網購盛行，相信唔少人都有過在淘寶購物經驗，但估唔到，視帝陳展鵬都鍾意買淘寶貨。日前，煎 Pang就在微博炮轟，指在淘寶買了一款價錢由人民幣1,000起的車胎，卻貨不對辦。他留言說：「被騙的感覺很差很差，想不到現時在內地淘寶買貨都是一樣。失望！」此 po一出，即時引起內地網民極大回響，有網民留言認為他小題大做，亦有人勸他買車胎應到實體店最安全！也有熱心網民教他，若買大件貨物就不要淘寶，不然就選旗艦店買。火氣未消的煎 Pang立即回應網民並解釋買淘寶貨原因，只是因為香港冇代理，若在外國訂購又要等上一個月時間，而內地淘寶只需一星期就可以。

成功換貨心情回靚戰車出巡

出 po呻爆不久，煎 Pang留言表示有轉機，透露店主發錯貨。不過，已經升呢做人爸的煎 Pang，購買對自身安全有關的車胎，即使嫌外國訂貨需時，也應該搵相熟代理幫忙，網購畢竟冇保證，架車又是用來接載妻女，如果車胎行駛時出事，損失已經唔係金錢可以彌補，對近期防疫高度戒備，最緊張妻女健康的他來說，似乎有啲失策。

未知是否因為解決了車胎問題，煎 Pang心情回靚，日前就同老婆單文柔去九龍城買餸上糧，仲揸住佢架深愛四驅車出巡，兩公婆先去雜貨店買乾糧及牛扒，之後再去街市買疏菜，婚後變愛妻號的煎 Pang，全程負責攞嘢，不用老婆辛勞。