陳安立林希靈平安夜結婚 兩台藝人出席劈酒 七師傅私人醒「造人吉位」？

林希靈婚後努力做人 吉位、潤滑劑都有關？

藝人陳安立和前TVB「東張女神」林希靈於平安夜舉辦婚宴，當被傳媒問到會否進行造人大計的時候，林希靈笑言：「之前七師傅話叫我地床頭擺指定方位，今年要向北邊，咁有利造人啲，所以今晚我會婉拒啲聖誕派對，因為要試吓啲風水方位。」之後又笑指朋友都有分享造人Tips，表示坊間有一種可以決定生男或生女的潤滑劑，非常講究！

恨生孖胎仔女 望一擊即中

此外，兩位新人亦表示不介意小孩的性別，陳安立就話最好係生孖胎：「我覺得男女都冇所謂，我哋兩個都好鐘意小朋友，而且孖仔孖女好獨特，有心靈感應。」林希靈就大膽表示希望可以一擊即中，果然做咗人妻後，發言都變得非常大膽！

婚禮賓客TVB、ViuTV總動員 鬥酒環節：鄺潔楹不敵娟姐

今天參加兩人婚禮的賓客大部分都是來自TVB和ViuTV兩家電視台，所以兩人都大花心思，準備了「啤酒勁敵大賽」娛賓，勝出的一方就能夠得到清酒一支：「諗住叫娟姐主持飲酒大賽，每個台派兩個人上嚟鬥快飲酒。」陳安立更表示打算在遊戲環節中，邀請歌手小肥仔婚禮上大唱失戀歌：「我叫小肥上台唱《時光機》，佢初時都話大吉利市，我話我哋百無禁忌，飲住啤酒聽佢唱歌苦情歌，失戀感覺爆燈」鬥酒環節，結果鄺潔楹不敵娟姐！

娟姐自爆出pool：拍咗幾個月，對方係圈外人

問娟姐是否已準備好向一眾靚仔兄弟團「埋手」？佢即自爆出pool：「阿姐我依家蜜運，拍咗幾個月，對方係圈外人。」娟姐仲話難得有拖拍，一定唔會俾自己飲醉，爭取時間拍拖，仲話會喺屋企煮飯仔，喂呀咁浪漫，咁記得出入平安喎！

林希靈準備與姐妹度蜜月

至於一對新人度蜜月方面，因為陳安立要拍劇到5月，所以兩人暫時未能安排到度蜜月行程。林希靈就表示雖然未能同老公度蜜月，但已經早已和姐妹們安排外遊：「我叫咗啲姐妹去日本，浸吓溫泉，自駕遊。」至於旅費方面，林希靈就話老公會負責，仲話：「（老公）努力搵錢比我un un腳。」