「細龍太」美國才藝比賽勇奪8個獎 陳偉琪IG鼓勵港人：「再艱難的日子都會過去的！」

撰文：Evita | 圖片：劇照、Instagram

陳偉琪美國才藝比賽奪8獎

「細龍太」陳偉琪今個月月初遠赴美國洛杉磯出戰《WCOPA》世界表演藝術錦標賽，當中參加咗演戲、模特兒、鋼琴等幾項賽事，每個獎項都成功奪獎。而豎琴表演更加進入總決賽，奪得一個獎同該級別大獎。整場賽事，最終勇奪8個獎項，真係可喜可賀！

Vicky噚日就喺Instagram宣布喜訊：

「這次代表香港比賽，真的是挑戰了自己，也托大家的祝福，獲得好成績，每一項參賽的項目都拿到獎。」

Vicky又話：「在LA的日子雖然很累，每天搬豎琴，為比賽不同項目準備，但還是很擔心我們的家。」

過去個幾月，香港廣大市民因為反對《逃犯條例》而上街遊行，而且多次與警方發生衝突，加上7月21日嘅元朗事件搞到人心惶惶。「細龍太」雖然人在美國，都不忘留意香港社會，表示「希望在這個時候，帶點喜訊給大家。無論再艱難的日子都會過去的。」

除咗「細龍太」之外，其實都有唔少圈中藝人為事件發聲，好似發生元朗暴力事件翌日，森美喺電台節目《早霸王》一開始就講咗句：「今早，我沒有說話好說。」沉默過後，又再哽咽道出：「不明白作為香港人身份可以做甚麼，令香港可以變回以前的香港，希望香港每個人努力。」之後就播出陳慧敏嘅歌—《沉默之間》。森美表示常規節目環節會取消，變為聽眾於網上點歌，後來播咗小塵埃《高地之下》、RubberBand《睜開眼》、Supper Moment《世界變了樣》等等的歌曲。

早前森美就在個人Facebook上將之前南生圍的相片轉成黑白色，寫上

「元朗

香港

到了昨晚

不一樣了

我應當做什麼？

香港才會是香港

我迷惘 擔心 恐懼 不知所措

應該不止我

你也和我一樣吧！」