鐵拳英雄｜首集3大爆點 潮州音陳展鵬「立地通天炮」有根有據

文：東方新地｜圖：TVB《鐵拳英雄》劇照、《鐵拳英雄》截圖

《鐵拳英雄》第一集故事：

三、四十年代，步天下（陳展鵬 飾）、連震山（陳山聰 飾）和路向東（翟威廉 飾）帶埋老婆仔女嚟到新曼谷「唐仁街」謀生，三人牽頭反抗當地黑幫勢力，初頭以為三大巨頭可以打敗惡霸王泉（王俊棠 飾），點解到咗打大佬嘅時候，步天下突然變節，反過嚟攻擊連震山，最後全部人死晒，連船上面嘅細路都受傷嘅受傷，失踪嘅失踪。咁嘅背景之下，就過咗十幾年，步天下大仔步青雲（陳展鵬飾）就與阿媽丁細鳳（元秋 飾）雙依為命，繼續喺泰國生活。

爆點一：陳展鵬鄉音

由陳展鵬飾演嘅步天下係潮州人，而且滿口鄉音，明明一出場就以一招八極拳嘅「立地通天炮」型到裂，不過一開口真係滿口類似「李嘉誠」腔調嘅廣東話登場，實在令人哭笑不得！好可惜展鵬嘅鄉音大家只可以聽一集，之後嘅步青雲就變返正常廣東話喇！

爆點二：元秋《食神》上身

話說同樣祖籍潮州，步天下個老婆丁細鳳喺死咗個老公兼失散咗一仔一女之後變得瘋瘋癲癲，不過整「家鄉美食」雲吞麵特別叻，及後阿青雲煮麵畀佢食，佢仲食神上身，話啲麵「一折折，失敗」，「啲皮又爛晒，失敗」、「呢嚿皮包肉定肉包皮，失敗之中嘅失敗」！真係同周星馳嘅《食神》情節一模一樣！

爆點三：立地通天炮

繼上次《城寨英雄》拳佬（陳展鵬 飾）一招「猛虎硬爬山」講到街知巷聞之後，今次《鐵拳英雄》又有新招，而且個名同樣都係咁誇張，是八極拳的「立地通天炮」！雖然招式名的確有點嘩眾取寵，一班網民更因為呢個名而給TVB負評兼揶揄「尷尬」，但其實八極拳的確有一招名為「立地通天炮」，民國武術家李元智（1904-1972）嘅書作《八極拳圖解》中亦有記戴此招式。書中亦提及「八極拳」是中國北方的拳種之一，招式的勁力講求崩、憾、突擊。崩，如山崩之勢，用法突然，動作乾脆。而且須貫通於肩、肘、拳、胯、膝、腳六個部位，使其發力瞬間要勁如崩弓，發如炸雷，勢動神隨，疾如閃電，以剛勁為主。