TVB兒童節目主持爆出憎狗論 引來網民激烈迴響！

撰文：東方新地｜圖片：TVB截圖、Instagram｜編輯：CC@Central

兒童節目主持爆出憎狗論

近日，《兄弟幫》請咗一班兒童節目《Think Big天地》嘅主持上節目分享佢哋日常工作嘅經歷。其中，一位兒童節目主持人鍾晴（Karlie）就講到自己有一次去工廠區做嘢，點知個地方有狗，令本身驚狗嘅Karlie非常害怕！

Karlie喺憶述過程中，再一次重申自己好驚狗，仲愈講就愈激動！

講到自己換好衫之後落車，但見到眼前有一隻大狗。

Karlie就衝口而出講咗句：「工廠區啲狗特別毛茸茸同污糟！」

唔知點解，Karlie講呢句嘅同時，坐喺佢身旁嘅何依婷（Regina）笑得好開心咁。

Karlie講完覺得工廠區啲狗特別污糟之後，繼續講：「即係好…好乞人憎嗰啲呢！」

講完後，Karlie繼續分享話有朋友同佢講見到狗要扮唔驚，因為咁樣做，狗就唔會嚇佢。

但Karlie表示自已扮唔出唔驚，而言詞中好似有針對性咁續指：「都唔知佢（狗狗）咩心態！」

網民激烈留言討論

呢番言論一出街，即時辣㷫晒一班愛狗人士，不少人喺網上發文鬧爆Karlie講嘢冷血，而且完全唔識尊重動物！

其後，亦有家長級人士留言，話佢嘅言論教壞細路，擔心小朋友接收左一樣錯誤訊息，冇資格做兒童節目主持。

不過，圍插聲音並唔係一面倒，當中亦有網民留言指唔覺得佢咁講有問題，認為唔鍾意狗、怕狗講出嚟都係一種坦白及事實，純粹講個人感受，所以唔明點解會有咁多人鬧佢。

鍾晴 小資料

鍾晴，今年26歲，曾參加過雜誌舉辦嘅校花選舉，亦曾被指與薛凱琪似樣，故有翻版薛凱琪之稱。

Karlie參加選美節目《美選D.n.A》，但最後入唔到圍。

上年，Karlie簽約無綫電視，立刻成為兒童節目《Think Big天地》主持之一。

最近，佢亦有參與《美女廚房》的拍攝。

今次嘅言論引嚟咁大迴響，未知會否影響到佢日後星途發展呢？