鍾培生周五開記招公布「林鍾一戰」 寸林作: 成就係同過香港小姐一齊﹗

文：東方新地 ｜圖：鍾培生IG、鍾培生YouTube截圖、林作IG

鍾培生揶揄林作：「成就係同過香港小姐一齊﹗」

鍾培生首度拍片道出跟林作的瓜葛始末，並解釋討厭林作的原因，一開始鍾培生指林作的成就只有「同過香港小姐一齊」，狠批林作借女人上位冇問題，但分手後還要踩低對方去抬高自己，直指林作人格「唔好得去邊」。

鍾培生又話本身唔認識林作，但曾在兩個場合中見過面，鍾培生一臉厭惡話：「我唔想詆毀你學校，我都識好多朋友係讀牛津，個個知書識禮，但竟然有一個咁粗口爛舌，粗口多到我頂唔順我企身走咗去﹗」鍾培生又直指林作一直是他死穴，因為大家同月同日生日（12月23日），在討論區不時被網民作比較，鍾培生怒轟：「將我同佢比較，簡直拉低我智商。」

鍾培生打林作：「最大嘅娛樂盛事﹗」

鍾培生又指身邊人所有人、網民、媒體對他決定打林作，都表示支持，他的決定只是為民除害：「你話香港人幾咁想睇我打佢，我相信呢件事係對全香港市民嚟講，最偉大嘅娛樂盛事﹗」

鍾培生淺水灣道大宅開記招

今日鍾培生透過公關公司出通告，公布周五（5日）舉行「培生擂台記者會」，並指自上月18日鍾培生對林作發出的擂台邀請，現經過多番交流「 鍾培生先生與林作先生將上擂台一戰，並於記者招待會上公布拳賽進度及細節。」而記招地點在鍾培生的淺水灣道豪宅，林作及鍾培生會出席並接受記者訪問。

鍾培生、林作已簽生死狀

鍾培生接受傳媒訪問時話已簽生死狀，預計年中開賽。 而林作就表示已開始接受操練，並承認日前雙方已簽好合約，表示「打死無命賠」，不過林作依然信心十足，話經過操練後覺得自己好勁，又話會發起眾籌買重五百萬保險。