鍾嘉欣撇甩仔女回港拍劇 激罕晒deep V水著

原文刊於《東方新地》

鍾嘉欣晒泳照 圈中美女齊齊讚

近日忙於開新劇《兒科醫生》的鍾嘉欣，忙裏偷閒到酒店休息，亦拍下不少美照，童心未泯的鍾嘉欣穿著睡衣在酒店房內歎tea，看著琳琅滿目，色彩繽紛的tea set露出甜美笑容。今日再晒出令人讚嘆的鮮紅泳衣照，一向高䠷的鍾嘉欣，身材fit到漏，一雙長腿頗為矚目，胸前大deep V亦見結實胸肌，絕對唔似兩個小孩的媽媽。泳照一出，即引來班圈中女星讚好！

鍾嘉欣為百萬冒險返港拍劇

身為兩個小朋友媽咪的鍾嘉欣，對上一次在港拍無綫劇集，已經是15年的《巨輪 II 》，婚後移居加拿大相夫教子女，嘉欣只曾在18年客串劇集《再創世紀》，當時全部戲份都在加國拍攝，相對今次獨自返港拍劇幾個月，難免思鄉。據知今次劇中多位主角鍾嘉欣、鄭嘉穎、羅仲謙，酬勞亦相當之高，知情人士透露：「上次拍《再創世紀》，嘉欣酬勞已經好高，今次要返香港拍幾個月，酬勞更加高到三百萬，呢個價係佢以前拍劇嘅幾倍，而且今次可以同嘉穎同馬明合作，呢個卡士好吸引，先至打動到佢！不過嘉欣最大考慮係一對仔女始終仲細，考慮咗一排同老公商量好，本來計劃好晒，自己先返香港一個月，8月再安排老公同一對仔女嚟香港陪佢，當做一齊喺香港放大假！」

疫情反彈被迫停工 掛念仔女偷偷匿埋喊

但世事未能盡如人意，嘉欣六月底啟程返港做準備，家居隔離14日後，定好7月中出關拍劇，卻因新冠肺炎疫情突然反彈，當時每日肺炎確診數字破百，疫情高危下劇組被迫停工，嘉欣亦只好留家繼續等。據知情者透露：「返咗嚟成個月都未開到工，同仔女分隔咁耐每日只係靠 FaceTime，又怕延遲咗有排都返唔到加拿大，嘉欣情緒好大起伏，成日掛住一對仔女，有時諗諗吓會唔開心匿埋喊，佢想盡快拍完返屋企，見確診數字回落咗啲，已經催劇組快啲開工，仲聲明務必11月要拍晒佢啲戲份，佢要趕返加拿大見仔女。」