醜女挖鼻成Icon 如花李健仁中風開腦保命

原文刊於《東方新地》

中風後局部失憶

如花李健仁曾經係星爺愛將之一，近年轉戰大陸拍劇，一直身體壯健，去年喺深圳同朋友焗桑拿期間突然頭痛暈倒，由助手送院搶救，證實中風，雖然即時做咗開腦手術保住條命仔，但受中風影響右邊身癱瘓而且一度講唔到嘢，最後佢選擇返香港繼續就醫。

田雞(田啟文)證實如花於去年出事，仲話有去深圳醫院探過佢，雖然如花認得田雞，但始終開過腦，有啲嘢都係唔記得，講嘢就一時好順，有時會窒吓窒吓，之後如花返咗香港屋企休養，有做物理治療。田雞仲爆如花出事後經濟上肯定有壓力同困難，仲話想集合啲師兄弟，睇吓可以點樣幫佢籌款，可惜近半年因為疫情影響，未有再跟進。

消息傳出後，李健仁太太亦接受訪問表示丈夫正在康後中，如花亦更新微博公開報平安，並轉載內地關於他病情的報導，他留言：「我會加油恢復，早日回到熒幕前，大家掛念了，感恩。」李健仁所屬的內地公司亦留言：「仁哥目前在平穩恢復中謝謝大家關心。」

星爺帶挈入行

如花同星爺係中學同班同學，89年經星爺介紹當幕後場記，後任攝影助理、副導演及製片等。92年李健仁男扮女妝客串《武狀元蘇乞兒》出位，招牌動作是用手指尾撩鼻，之後扮上癮喺《唐伯虎點秋香》、《國產凌凌漆》、《食神》等表現突出成功令觀眾留下深刻印象，當年佢喺《九品芝麻官》飾演角色叫如花，呢個暱稱就跟足佢咁多年。