鄭裕玲Do姐串爆麥明詩陳凱琳舊片再出土 連環執生獲封「世一主持」

麥明詩咄咄逼人 嚇親台上港姐

其中第一條片段就是Do姐、麥明詩和馮盈盈在《2018年香港小姐競選》泳衣問答環節的片段。當時因為11號佳麗李明芙修讀「社會公益教育學系」，所以麥明詩就「公義」範疇提問，問到「除咗你之外，今晚有邊個佳麗贏咗你覺得係唔公平嘅？唔准講自己喎。」11號佳麗就被嚇到答不出任何名字，只是不斷苦笑。

麥明詩投訴「唔公平」 Do姐一句型爆反擊

Do姐見狀即刻開口圓場，指「可以答冇嘅，唔使俾人逼嘅」，不過麥明詩就表示：「哎呀，Do姐咁nice嘅，我覺得唔公平呀，我選嗰時Do姐冇咁」Do姐當然唔忍，隨即型爆反擊：「咁你都選到啦！你仲想點樣啊？你係香港小姐嚟㗎嘛，點樣唔公平啊？」全場即刻拍掌支持Do姐，另一主持馮盈盈亦見狀圓場：「我哋好收聲喇，如果唔係就話我哋對呢位佳麗唔公平㗎喇」，才成功結束這場問答。

台慶騷陳凱琳錯講嘢 Do姐一句隔山打牛

另一片段則為陳凱琳在《萬千星輝賀台慶2016》主持時講錯嘢，將「奮不顧身」講成「粉身碎骨」：「TVB每一個藝員都係粉身碎骨，務求就係令大家開心」，搞到身邊的陳百祥都忍唔住望一眼。

事後到Do姐出場時，Do姐憑藉對丁子朗的一句「忠告」隔山打牛，令全場拍爛手掌：「子朗，我身為前輩我俾少少忠告你，就係我哋做藝員，一定要對觀眾負責。如果唔係，明明係奮不顧身，都會變成粉身碎骨。」

網民留言大讚Do姐主持功力：世一主持

隨著兩段舊片翻Hit，不少網民都紛紛留言大讚Do姐主持功力，亦有網民批評麥明詩和陳凱琳功力，同Do姐相比依然相差幾條街：「世一主持」、「Do姐貴都係有佢既價值」、「Do姐到現在仲未有司儀可以代替」、「麥明詩今次做乜啊，平時覺得你好地地㗎，做咩咄咄逼人啊」、「可惜過氣大台已失去Do姐」、「do姐主持功力就係勁在 能夠兜完場得嚟又串得靚」等。