獨家專訪！鄭秀文主動聯絡阿Sa從此結緣 《聖荷西謀殺案》激發二人演技大爆發

原文刊於《東方新地》

鄭秀文指飾《聖荷西謀殺案》角色是一種幸福

經歷過高山低谷的Sammi，對住愈來愈成熟的阿Sa，由事業、愛情到家庭，她們都無所不談，曾經飽受負面情緒影響的Sammi，以過來人身份教阿Sa如何逆境自強，痛過跌過才能使人成長，最重要是以正面心態去面對。廿幾年來演活過無數電影角色，這次遇上潘源良的《聖荷西謀殺案》，Sammi話：「人哋未睇到你嘅可能性之前，必須要等，到終於有個人肯畀個機會我，咁我有一種……嘩！幸福來了嘅感覺。」仍未等到幸福的阿Sa，形容得更貼切：「角色劇本同演員真係一套灰姑娘嘅戲，真係啱嘅時候啱嘅機緣際遇，就會搵到屬於你對玻璃鞋，呢對鞋我仲等緊。豁達大愛的Sammi話齋，等就會有希望。

從舞台劇改編成電影，《聖荷西謀殺案》於三年前開拍，去年完成拍攝和製作工作，不過因疫情關係上映日期一改再改，今年初女主角Sammi鄭秀文被提名金像獎最佳女主角，可惜最後輸給《少年的你》的周冬雨，外界都戥呼聲甚高的Sammi唔抵，倒是早已在其他電影頒獎禮攞過影后的Sammi看得開：「獎唔重要㗎！呢個演出嘅機會重要啲，打開呢一種角色嘅路重要啲。」

為演活《聖荷西謀殺案》阿Ling 經常情緒爆發

入行三十二年，Sammi成為樂壇天后再踩隻腳入影圈，拍過的大導演、最佳男主角都無數，但Sammi還是覺得自己差一個角色差一個機會，直到遇上《聖荷西謀殺案》，她說：「首先我要多謝朱嘉懿，《花椒之味》嘅監製係佢，《聖荷西謀殺案》嘅監製都係佢。阿Ling呢個角色，係佢屬意一定要係我做，到我睇咗個劇本，得喇，唔使講！我一定要拍。呢啲機會可遇不可求，唔係講個角色有幾特別，對某啲演員嚟講可能經常會遇到，但咁多年真係未試過落喺我身上。做咗咁多年戲，我都等緊個願意畀機會我嘅人，終於等到。」

在《聖荷西謀殺案》中演阿Ling的Sammi，角色多層次而且很多情緒大爆發的場面，對她來說是前所未有的一種體驗，「以前拍杜sir（杜琪峯），大部分時候冇完整劇本，冇咩功課可以做。呢套劇本一到手，每一場我演嘅戲，我喺屋企已經預演咗好多次，雖然呢套戲係我拍咁耐戲以嚟最難嘅一部戲，但因為準備充足，每日去到片場我信心滿滿肯定自己可以駕馭到。阿Ling呢個角色好立體、好多唔同人性面，好多情緒爆發嗰吓你估唔到，咁至好睇，咁至係人性！佢看似好衰，但亦值得憐憫，我同阿Sa都最鍾意最後嗰場戲，兩個人面對面淨係講嘢，拍呢套戲成日都爆喊，我每日返到酒店都好攰、覺得個人好虛耗，真係用盡真力真氣嗰隻嚟㗎！」

有感生命中有人同行的重要

電影裡的阿Ling，看似幸福和平靜的生活在幾天之內瓦解崩離，最難過的是，最後剩下自己一個去承受和面對。想起來去年初Sammi的另一半安仔也是一夜之間讓二人的世界天翻地覆，大家都說許志安是幸運的一個，因為再糟糕的日子，身邊都有Sammi陪著一起走。

這些日子Sammi表現得極度大愛，受盡讚賞，對於愛，她說有些事不能太執著：「呢個就係婚姻。所謂同行，唔係淨係順境時先至叫同行，係你跌倒嗰陣時個同行者仲喺度，係咪叫佢嘅福氣我唔敢講，大家珍惜啦！呢場疫情令我更珍惜，好似好老土咁，但係真嘅，好多嘢好脆弱。其實做人唔使諗咁長遠，好多時好多嘢，你想事態向某個方向發展，但係最終A會變成B，命運使然……有啲嘢有得選擇，有時其實我哋又冇得選擇，我真係咁諗㗎，過唔過到聽日都未知。我覺得最差嘅時候都要識笑囉，畀啲歡笑畀啲鼓勵自己，我個底就係咁，我就係呢種人，環境可以好差，遇到嘅事可以好負面，但人生係一個過程，不停調適自己，學緊balance學緊點安慰鼓勵自己，學識如何原諒，成世就係咁，咁為之不停學習。與其乸住口面，不如唔好太執著，有八九十分就夠喇，對自己可以有要求，對其他人唔好太執著。」

阿Sa蔡卓妍角色顛覆以往印象

電影裡的另一女主角Yanny由阿Sa蔡卓妍飾演，她是Sammi年幼時在香港的朋友，同樣是闖了禍投奔到彼岸散散心。在短短幾天時間內，眼看著好朋友慢慢變臉，好景象慢慢變質惡化，她的演出和Sammi一樣，顛覆了這些年間觀眾自以為已經熟悉了的阿Sa。阿Sa說：「相對Sammi，我嘅角色輕鬆好多。呢個劇本、Sammi呢種角色，我都等咗好耐，等於歌手遇到一首好歌一樣，好難去強求。我曾經都有諗太多嘅時候，你知我以前狂拍戲，冇時間諗嘅階段都試過，有幾年停咗落嚟，推咗好多戲，因為我想演好啲，但人哋又唔係全部好嘢都畀你。我覺得我得，製片導演覺得我未得，因為事實上我有一啲根深蒂固嘅形象，於是乎停咗一段時間，又發覺個engine熄咁耐，架車都會壞㗎！有陣時有啲嘢唔可以強求時，我就會檢討自己，邊檢討自己邊儲多啲，呢幾年再搵埋個acting coach幫我手。愈複雜嘅角色愈係咁，有個人幫我換個角度睇，原來擴闊思想空間，可以差好遠。」

阿Sa最忙試過三套戲、五日瞓三個鐘

大家睇住Twins出道，睇住阿Sa由小女孩長大成初熟女，時間一瞬即逝已經二十年，阿Sa說第一個十年走紅得太快，過得像一場夢；第二個十年才開始識得調節，再下一個十年，要真正為自己而活。回想過去的奮鬥點滴，阿Sa笑言：「黐線！咁就二十年，咁就就嚟四字頭！頭十年真係夢一場，忙到根本冇時間消化。我想話我完全冇諗過紅同唔紅，更大感受就係要不停做。最攰嘅時候踩緊三套戲、五日瞓三個鐘，真係試過企住喺度都瞓得著，基本上瞓住化妝整頭、瞓住等化妝姐姐除晒衫換埋戲服、場務隊個劇本話我知：『你一陣間就係講呢句對白喇！』吓？鄭伊健？唔係謝霆鋒咩？原來已經去咗第二套戲第二個片場！同埋經常發生呢一樣嘢，之前套戲OVER咗，第二套戲監製嚟搶人，嗰幾年，第一，我唔知自己邊度嚟嘅力氣同精神；第二，我覺得冇良心得嚟好傷感。呢幾年工作有時遇到啲人，我以為初次見面，點知人哋話頭幾年其實合作過好幾次，我覺得自己好冇良心囉！亦好傷心真係有啲記憶係冇咗。我覺得自己簡直唔係人，所以呢十年我好努力記住合作過嘅人嘅樣同名，邊個幫過你，一定要記住佢。」

經過十年終懂得調節

這個十年，除了學會對演戲有要求、學會做個更好的人，阿Sa還學會了要對自己更好：「成長就係搵個我自己過得舒適嘅方式啫，一路改變自己，一路調節心態，學習點樣去過自己嘅日子。以前覺得工作就係全部，以為工作等於我嘅人生，當然有工開要感恩，但依家係會睇啲嘢冇咁緊張，我覺得下一秒會發生乜嘢都冇人知，最緊要過好今日。呢排喺屋企摷嘢，睇番啲舊相，搵番十幾廿個小學同學同老師。好有趣嘅一件事，係見到隔咗咁多年每個人企喺唔同工作崗位，大家互相開解，互相幫忙，有啲做物流嘅幫手搵口罩啦，有啲人號召我哋又一齊去做義工啦！我覺得好好，呢啲就係我想要嘅生活。至於結婚……依家咁樣幾開心，就維持現狀先啦！」

齊齊向下一個十年出發

Sammi和阿Sa並非首次合作，03年，即是阿Sa的第一個十年，二人已合作過電影《戀上你的床》，不過當時Sammi已是天后，阿Sa仍是新人。Sa：「嗰陣時我咁細，啱啱入行，去到現場見到Sammi都唔敢出聲。」Sammi：「其實你唔係自己所講咁怕醜㗎！你喺現場都好活潑吓㗎！」呢十年，二人雖再無電影合作，但Sammi知道阿Sa遇上人生低潮，竟然主動出手搵到阿Sa電話，再化身輔導員進行開解，她們愈走愈近變成閨密。至於下一個十年，Sammi話：「我覺得我事業心冇阿姐（汪明荃）咁強，諗到仲要企喺舞台就覺得攰……既然開銷同儲蓄已經足夠，我唔想再spend多十幾廿年搵到盡，我希望到嗰陣已經過緊另一種生活。」阿Sa則有另一種看法：「我諗我會繼續演，最好就好似羅蘭姐一樣演到八十歲。你諗吓！到我同阿嬌八九十歲仲一齊行出嚟，成個金銀婆婆咁囉，好得意！同埋我都好好奇，到時啲導演會搵我做咩角色呢？」48歲的Sammi與37歲的阿Sa有著不同的人生目標，無論停步定繼續搏殺，都以幸福為終點站。

《聖荷西謀殺案》激發二人演技大爆發