鄭嘉穎KFC制服LOOK補祝生日被網民取笑 網友：啱啱送完外賣收工？
撰文：東方新地｜圖片：Instagram ｜編輯：cherry@Central
鄭嘉穎補祝生日被網民取笑
今年49歲的鄭嘉穎上個月生日，藝人馬國明、黃嘉樂、唐詩詠、林子善齊齊為「大哥」鄭嘉穎送上生日蛋糕補祝生日！雖未見「大嫂」同場，但子善就同老婆一同出席，就連「二弟」馬國明都帶埋女友黃心穎出席！
壽星嘉穎着住件紅色衫兼戴埋紅色帽，一身紅噹噹望落顏色就好整體性，但有網民搞笑留言話：「大哥好似啱啱送完外賣咁。」咁唔知有冇人收到嘉穎送嘅外賣呢？
有網友亦留意到馬明同心穎又一次合體，從相中可見心穎笑容唔錯，睇嚟並冇受與工藤佑采罵戰件事影響心情！另外，亦有唔少網友關心「大嫂」去咗邊。
唐詩詠除留言祝嘉穎生日快樂外，更tag：「一年結一個 下年到邊個」有唔少網友就話下年到「二哥」馬國明結婚，唔知係咪真係呢？
相關新聞
鄭嘉穎 陳凱琳 首次夫妻檔出席活動
新婚夫婦鄭嘉穎及陳凱琳首度以夫妻檔形式出席活動，二人以黑白配的造型現身。剛巧，二人剛到場就突然落起大雨，故令man爆的嘉穎要一手擔遮，一手攬實太太Grace，認真嚟一場風雨同路，場面非常甜蜜！事後，細心的嘉穎仲幫太太抺乾身上的雨水，以免太太冷親！
鄭嘉穎大讚太太冇得頂
二人接受傳媒訪問時，當問及酬勞，鄭太就馬上回答：「ok啦！」至於係咪當家用，Grace就指家用係一齊用，而嘉穎就爆指太太唔識「當家」係乜嘢意思，於是要同老婆解釋，指即佢以後負責俾錢，太太就負責管錢。嘉穎其後就讚太太好知慳識儉，所以好放心畀數佢睇，仲大讚太太冇得頂！
鄭嘉穎係100分老公
聽到老公咁讚自己的Grace被問到係咪俾老公100分，即刻冧爆咁話：「100分，但我想畀超過滿分。」令到嘉穎笑言要謙虛啲喎！同時，Grace亦透露婚後首次為老公下廚蒸水蛋，卻蒸過頭起泡泡，但老公都有食晒，而嘉穎就笑指：「如果今次我唔鼓勵佢，我以後冇得食！要從錯誤中學習嘅，佢咁叻，下次一定煮得好好！」
生B順其自然
另外，大家都關心嘅問題就係鄭生鄭太幾時生BB，嘉穎就話BB係上天的禮物，直言：「幾時有就幾時有啦！仔女都鍾意，不過就想BB似媽咪。」Grace即甜笑表示：「似佢都好呀！」仲話生幾多個都冇所謂，睇天父決定，指自己冇壓力！咁大家就等鄭生鄭太好消息啦！
鄭嘉穎婚禮鄭太話晒事
拍拖3年的陳凱琳與鄭嘉穎，周日 (12日) 在印尼峇里的Bvlgari Resort Bali舉行婚禮，因為峇里附近的龍目島在個多星期內經歷三次地震，更一度發出海嘯警告，有傳婚禮一度考慮改到布吉舉行，但新娘子陳凱琳情傾峇里的無敵大海景，鄭嘉穎不想老婆失望有遺憾，決定風雨不改。
自上月婚禮消息曝光後，外界有傳二人奉子成婚，才會結得如此急，事實卻是去年聖誕鄭嘉穎已求婚成功，陳凱琳這半年來一直在籌備她的夢幻婚禮，鄭嘉穎更把所有話事權交給陳凱琳，而他就負責找數。雖然今次未有在香港擺酒大排筵席，但鄭嘉穎亦跟足傳統娶陳凱琳，過大禮及禮金都做足。
知情者透露：「嘉穎真係好有誠意娶Grace(陳凱琳)，只要Grace鍾意嘅佢都冇意見，由地點、酒店、形式同餐單都由老婆話晒事，使幾多錢都冇所謂，最緊要Grace開心，不過咁唔代表佢冇參與，就算喺內地有工作，佢都請假陪住Grace飛去峇里睇場地，順便玩番幾日。之前峇里有地震危機，嘉穎加大個保險額做保障，點都唔想取消個婚禮，佢覺得一生人一次，唔想Grace失望。嘉穎亦知道Grace好緊張屋企人，岳父岳母辛苦養大個女，讀完書幾年就話要嫁人，點會捨得？之前傾婚事時，陳爸爸話禮金方面隨意就得，但嘉穎好識做，一早就開咗張冇寫銀碼嘅支票畀岳父岳母，任佢哋開禮金，呢個舉動真係令Grace父母好感動，知道佢真心錫自己個女，亦放心交個女畀佢。」真正愛一個人才願意無私付出，有指坐擁15億身家的陳爸爸本來甚為反對女兒與鄭嘉穎拍拖，但三年來看到二人的相處，終於令他改觀。
婚後大解放
陳凱琳是基督徒，對於婚前禁慾這回事，三年來她與鄭嘉穎都避而不談，現在名正言順成為夫婦，終於可以大解放。婚後鄭嘉穎與陳凱琳繼續留在峇里度春宵，本刊記者曾聯絡陳凱琳問她下一站會去哪裡度蜜月兼造人，她笑說：「遲啲先話畀你哋知！」周三 (15日) 是鄭嘉穎的49歲正日生日，在峇里海景新房的浪漫環境下，相信鄭嘉穎很快便會實現母親對他的期望，因為鄭嘉穎母親以前成日問佢幾時結婚，但佢一直唔畀答案，搞到阿媽好擔心，所以嘉穎在婚禮上即場同母親講Sorry。其實行動最實際，快啲生個B畀鄭媽媽抱孫咪得囉！
過百萬夢幻婚禮
為搏鄭太一笑，鄭嘉穎不惜工本在Bvlgari Resort Bali酒店舉行夢幻婚禮，對於今時今日身家過億的他來說，娶老婆埋單過百萬只係濕濕碎，最緊要陳凱琳開心。
限量婚紗鞋
陳凱琳拍婚照時所穿的性感deep V雪紡長裙襯意大利品牌Rene Caovilla限量版幻彩水晶高踭鞋，全球限量僅30對，高貴優雅。
4.18卡巨鑽婚戒
鄭嘉穎作為城中鑽石王老五，娶老婆出手當然唔會低，佢送畀陳凱琳隻4.18卡巨鑽婚戒過百萬，閃到爆。雖然陳凱琳著裙褂時襯托金器並唔多，只見到一隻極粗嘅龍鳳鈪及3隻金戒指，但勝在簡約得來亦大方。
鄭嘉穎與陳凱琳行禮的Bvlgari Resort Bali酒店，正是霍建華與林心如、劉愷威與楊冪結婚的地方，他們入住6萬元一晚的頂層套房，佈置簡潔自然，套房包括大廳、浴室中間就有大浴缸，行禮的石教堂，有大海景之餘，面積大概可容納64人。
婚禮場地放了一個代表愛情嘅白、黃玫瑰造成的巨型鮮花環，更寫上鄭嘉穎同陳凱琳兩人的英文名「Grace & Kevin」，晚上婚宴場地亦有「G&K」的燈牌。
好友旅行團
上周六(11日)，鄭嘉穎一班《鐵馬尋橋》兄弟馬國明、唐詩詠等浩浩蕩蕩出發到峇里見證婚禮。
唐詩詠當正自己去度假一樣，與林子善童心未泯狂食雪糕兼自拍。
婚禮結束後眾人趁機在當地遊覽，唐詩詠貼咗張相，仲留言︰「一段充滿愛同喜悅的旅程結束了！Thank you G&K！」佢仲tag咗句「好攰但好開心」、「你哋快D結婚我又可以嚟玩」，係咪催馬國明呢？
鄭嘉穎陳凱琳因《殭》結緣
入行25年的鄭嘉穎，一直都係無腳雀仔，直至14年拍無綫劇《殭》，與13年港 姐冠軍陳凱琳(Grace)戲假情真,拍拖兩個月已經急急公開情侶關係。四年戀情愈來愈穩定，陳凱琳早前在IG公開一張鄭嘉穎拖女相，鄭嘉穎一臉慈愛拖住約三歲的小妹妹去遊樂場玩耍，小妹妹紮紮跳開心到爆，至於配圖文字，陳凱琳就話：「請支持保良局兒童助養計劃！」陳凱琳當時回應本刊解畫，原來鄭嘉穎愛心爆棚，獲邀擔任保良局兒童大使,除助養了幾位兒童仲會每月定期探訪，陳凱琳受到男友感染,亦打算助養小朋友。
夾啱時間停工
恨B恨到發燒的鄭嘉穎唔係得個講字，終於的起心肝向女友求婚成功，雖然大陳凱琳22年被笑指似父女戀，但女友思想成熟性格又平易近人，肯定是個賢妻良母，鄭嘉穎亦甘於跌入愛情墳墓。二人於峇里島的海邊酒店舉行婚禮，邀請親朋好友現場見證。
同時，鄭嘉穎主演的電影《L風暴》原本已經排好下個月的宣傳工作，但有消息指他突然要請假，打亂了電影的宣傳工作。對於急住請假結婚，鄭嘉穎指：「多謝大家關心！就我哋嘅感情狀況，連日來惹來唔少揣測同不實報道，總之，現階段我哋的確有計劃結婚，至於懷孕一事，就屬無謂揣測。至於婚期，明白大家嘅關心，但唔好比我哋更加心急，亦希望畀啲空間我哋，總之結婚就會同大家交代。」而陳凱琳就回應：「我都唔知邊個咁有創意，真係唔想再回應，呢刻真係需要私隱同空間。」
慶祝半百生日
據知鄭嘉穎與陳凱琳的婚事早已籌備多時，一直希望低調行禮的二人，估唔到臨門一腳洩露風聲，知情者透露：「其實佢哋真係講咗畀好少人知，得雙方直屬親友同兄弟姊妹團知，不過嘉穎媽咪就真係好開心，終於等到個仔肯結婚，佢周圍同啲親戚交代，話個仔同新抱唔喺香港行禮，但一定會派喜餅，可能因為咁洩漏風聲啦！嘉穎講到明唔想大搞，未必會喺香港擺酒，但佢好錫Grace，唔止放手畀佢揀婚禮地點同酒店，仲應承咗遲啲會陪佢返溫哥華擺酒。今次佢哋去峇里結婚行禮，可以同最親嘅屋企人同兄弟姊妹一齊去玩，亦順道慶祝嘉穎49歲生日，嘉穎好想50歲前做爸爸㗎！所以Grace近幾個月好努力做運動調理身體，希望可以一撃即中。」鄭嘉穎與陳凱琳拍拖，在其愛情史上應該是最高調一次，唔止公開戀情、情侶檔搵銀、高密度放閃外，鄭嘉穎亦都恨私有化女友、升格做人夫兼人父恨到出面，四年來求婚、結婚傳聞不絕於耳，今次終於狼來了。
早說非君不嫁
還記得年初本刊訪問陳凱琳，說到與鄭嘉穎共度的第三個情人節，她亦狂放幸福正能量，除了讚男友個人好sweet，過人之處多到數唔晒，孝順肯定是優點之最，陳凱琳：「好孝順！佢（鄭嘉穎）真系好孝順，佢同我講賺錢都係爲咗養媽咪同家姐，一個人賺錢養全家。我最鍾意佢嘅性格，唔會表面一樣嘢，内裏又另一樣嘢，呢個真性情我係好欣賞。佢對外界有時會起杠係因爲佢以往慨經歷所以想保護自己，佢本身真係一個好nice嘅人。」問陳凱琳男友是否她的Mr. Right， 她秒答：「Absolutely！（肯定）」随即摸住凳連講兩次「Touch Wood！」
陳凱琳：「我都想生孖胎！」
講到生B大計，陳凱琳當時話自己年紀仲細唔急，亦深信男友有心有力，她笑說：「我都想生孖胎！我同細佬都係孖，我有機會㗎！一仔一女都好幸福。」可見陳凱琳對結婚生仔早已有晒憧憬。如果結婚傳聞屬實，唔夠兩星期陳凱琳就正式成為鄭太，婚後又要趕生豬B，咁無綫咪又少個一線花旦？
有孖胎基因
陳凱琳與細佬雖然是龍鳳胎,但二人樣貌完全不相似，顏值差天共地，細佬更經常被指是外籍人！
奶奶露風聲
陳凱琳唔止對男友鄭嘉穎好，仲愛屋及烏識行奶奶政策，鄭母向來對陳凱琳非常滿意，不過娶新抱不在香港大搞，令奶奶要向親友交代，有傳亦因此洩露風聲。
陳父陳母笑晒
連日來有唔少傳媒在陳家位於九龍塘的寓所外守候，陳凱琳父母與胞姊外出後返回九龍塘寓所，對於阿女在峇里出嫁，陳父攤開雙手笑言：「我都唔知！」不過陳母就難掩興奮之情，笑到四萬咁口，心情勁靚！
婚前安撫老竇
阿女要嫁人，最唔捨得應該係陳爸爸，今年父親節，陳凱琳在IG上載了一張攬實爸爸的照片，再加一段長文細數父親多年來對她無微不至的照顧，甚麼都以她為先，看來即將為人妻的陳凱琳，亦好唔捨得愛錫她的陳爸爸。
陳凱琳與父母親感情要好，早前本刊影到她與父親同遊銅鑼灣。
陳凱琳表示鄭嘉穎喜歡小朋友，而他亦不怕男友年紀大機器壞，力撐鄭嘉穎仍有心有力。自年初與賴慰玲囝囝上契後，次次探B鄭嘉穎都争住抱，恨做老竇練定手勢。
父愛氾濫
早前陳凱琳po了男友去探訪助養兒童的照片，表示嘉穎助養了幾個小朋友，希望令到小朋友有更好生活。陳凱琳覺得件事好有意義好有愛心，都有興趣助養埋一份。
嘉穎修心
鄭嘉穎被徹底降服，近年除工作，其餘時間都留港陪女友，早前出席完公開活動，與粉絲影完相即跳上車返回大坑寓所，有個好女友變得修心養性又黐家。
將來還有什麼演唱會值得留意？
有不少歌手宣布舉辦演唱會，小編為你整合了香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
