郭奕芯水著烤雞兼晒身材 《辣伙頭．開火》第二季晒廚技
原文刊於《東方新地》
楊天宇密密加操好身材
為應付工作量勁大的餐廳工作，Angus 近月來密密加操：「 拍呢個節目除咗要『 腦力 』去諗點樣經營餐廳，體力都好重要，雖然平時有操開，但為咗可以應付廚房同樓面嘅工作，呢幾個月都特別加緊操練。」操得一副好 body，面對體力勞動完全冇難度，但其中一集去沙灘烤雞，足以令 Angus 嗌晒救命：「 最難係要用炭爐去燒，因為炭爐火候好難掌握，加上我之前試過燒雞燒唔熟，所以壓力好大！平時燒嘢食我都好怕燒雞翼，我冇乜耐性！」
郭奕芯、陳欣妍沙灘鬥水
至於曾參與第一輯節目嘅郭奕芯，相對經驗較豐富，對於烹調方面可謂駕輕就熟，最難忘反而係與敵對組玩 mini game爭奪煮食題材，郭奕芯笑言：「 呢集個遊戲要我哋鬥快用划艇划出浮台獲勝，雖然最終我同隊友 Angus、陳欣妍輸咗，但過程緊張好刺激！」Angus 更大讚本身怕水嘅陳欣妍好大犧牲，勇敢豁出去克服恐懼令佢好佩服！
Angus做茶餐廳身兼三職一腳踢
首次參與烹飪節目，Angus 承認當中有唔少蝦碌事情發生，好似茶餐廳一集係佢第一次擔任隊長，所以有唔少壓力。而當日佢嘅崗位係負責將「 叉燒洋葱芝士菠蘿包 」分拆再合成，Angus 解釋：「 意思係我𠝹開個菠蘿包，陳欣妍同郭奕芯就負責整菠蘿包入面嘅餡。最後為咗加快速度，佢哋淨係煮菠蘿包嘅餡，我就將啲餡砌埋合併落菠蘿包，跟住出餐。」不過原本負責廚房嘅 Angus 最後要兼任水吧及樓面，身兼三職一腳踢，只因生意太好，忙到甩轆，Angus 表示：「 其實茶餐廳嗰日一開始已經排晒長龍，忙到爆，走來走去體力勞動好大！」難怪佢愈嚟愈 fit 啦！
