《那些我愛過的人》陳自瑤火辣水著登場搶fo 「星級人夫」嗒晒糖

原文刊於《東方新地》

火辣登場

新劇《那些我愛過的人》第一集主要都係交代劇情嘅背景故事，講述Laura（黃翠如飾演）、佢老公阿輝（翟威廉飾演）同姜煜誠（林文龍飾演）老婆（楊卓娜飾演）遇到車禍，阿輝同姜煜誠老婆當場證實死亡，懷有雙胞胎嘅黃翠如因為穿羊水要即時生產，可惜孖胎中嘅囝囝夭折，只有囡囡可以生存下來。

七年過去，趕去見客的黃翠如本來想搵好姊妹陳自瑤幫忙聯絡細妹（連詩雅飾演），但陳自瑤竟然懶洋洋喺泳池邊瞓覺，聽唔到電話，陳自瑤喺劇中飾演黃翠如同連詩雅兩姊妹嘅好友，屬於中間人角色，相信仲有大把戲份。

刪去濕身戲份

雖然陳自瑤著泳衣出鏡只得幾秒，但佢話拍攝當時其實正值冬天，劇組人員個個著住厚衫大褸，只有佢著住紅色通花泳衣，喺池邊拍攝時仲凍到不停震，原本仲要拍一場落水戲，為免佢凍病第二日唔能夠繼續開工，監製同導演最後決定刪去游水戲份。佢喺IG分享拍攝呢場泳池戲嘅花絮照片，留言︰「大家今晚有看第一集嗎？喜歡嗎？記得拍攝泳池旁的這場戲時，天氣很冷，風很大，我覺得作為演員，有時更加需要學習忍耐，即使是簡單的一個場口，也要把最好的呈現給觀眾，你快樂，所以我快樂！」

陳自瑤成為第一集出場演員中最搶鏡嘅一個，已經38歲嘅佢同王浩信育有一個八歲囡囡，生完小朋友依然火辣，水著鏡頭一出，除咗老公王浩信即刻Like外，連名草有主的袁偉豪、洪永城、人夫蕭正楠和陳山聰等都紛紛按讚，林子善忍唔住狂留言：「瑤瑤你唔好咁啦……我老婆問我睇睇吓電話做乜流鼻血。」林盛斌阿Bob亦驚嘆：「嘩！乜有呢啲㗎？等我睇番先。」陳自瑤當然好開心，不過佢只係好客氣回覆大家：「多謝大家支持！」

努力操練身材

陳自瑤有樣有身材，全靠多年來努力付出，呢位最索人妻兼人母之所以生完女都咁瘦，長期保持住21吋蛇腰，原來背後下咗唔少苦功。佢曾經喺受訪時透露自己少少長肉睇上去已經會好肥，每當睡眠不足嘅日子更會出現身體水腫問題，所以佢不斷用盡各種方法減肥，保持美好身段。

早前新劇〈BB大晒〉開鏡，YoYo都有回應水著派福利。