譚杏藍、張秀文、孫慧雪、王卓淇齊發聲！驚爆女神#MeToo事件簿
撰文：東方新地 ｜ 圖：譚杏藍YouTube截圖、IG、東星圖片、新傳媒圖庫
譚杏藍最近跟網友在IG互動，設下「秘密垃圾桶」問答環節，網民可跟她分享自己一個秘密，最後譚杏藍卻發現大部分秘密都是被性騷擾、性暴力的經歷，甚至乎目睹整件事卻不敢揭發此類秘密，令譚杏藍覺得不能再啞忍，決定把收收埋埋多年的秘密公開人前。
小學被長髮男揸下體
譚杏藍指不知是樣子還是校服關係，讀書時幾乎每月一次慘遭性騷擾，當時她大約11、12歲，放學與工人姐姐行回家途中，工人姐姐在前面，譚杏藍話：「當時遠處有個男人，遠睇已經有啲怪，長頭髮飄吓飄吓，就喺行過我同工人姐姐之間擦身而過嗰一刻，佢突然揸我下體，我當時畀唔到反應，呆咗企喺度，望後面佢已經走咗，工人姐姐一路行去前，嗰一刻覺得全世界冇人明白我咁﹗」
小巴上被掃大髀
譚杏藍上到中學，可以出夜街時，有一晚坐小巴返家時太晏瞓瞓著住，突然感到有人掃她大髀，譚杏藍：「感覺到有隻手上下掃我大髀內側，好在冇上到去三角位，我唔識點做，唔敢擘大眼，只係繼續扮瞓覺，終於佢落咗車，我先敢打番開對眼﹗」
地鐵車廂被硬物撞屁股
譚杏藍讀中學時有一日放學如常坐地鐵，車廂好逼，突然感到身後有硬物撞她屁股，譚杏藍：「因為令我好唔舒服，同真係撞到我痛，所以我用手摸住自己屁股想轉身，個人已經衝咗出去人群中，我連佢個樣都見唔到。」譚杏藍話發現自己手背上不明有液體，回家後覺得不停洗手，覺得自己好烏糟。
張秀文慘遭廚房佬掃patpat
TVB咪神張秀文，其34D導彈身材相當火辣，加上她傻大姐性格活潑又玩得，成功俘虜大班宅男，早前她與阿Bob（林盛斌）主持的綜藝節目《你估我唔到》，不時制服誘惑出鏡，演出十分賣力都係工作需要，原來咪神因為身材出眾曾遇過#Me Too事件，當時她就讀F.5，張秀文向本刊憶述時仍嬲爆：「嗰次喺屋村隔籬嘅商場，有個應該係做廚房嘅男人迎面向我行嚟，因為佢係著住白色嘅廚房衫，佢喺我身邊並排經過時，突然反手掃我pat pat，當時好嬲但又好驚，始終嗰時細個又一個人，唔識反應又唔敢出聲，我回頭望佢時，仲見到佢好得戚嘅眼神瞄一瞄我！比著依家，我一定會捉實佢隻手警告，唔會就此罷休！」
曾任啤酒代言人的張秀文，被封為「最具戰鬥格」港姐。
張秀文巴士上被博懵
張秀文透露還有一次在巴士站等巴士時被博懵，幸好這次身邊有個男同學，幫她出頭質問對方「做乜嘢？」才嚇倒這男人唔敢亂來！兩次經歷令Sammi體會到一定要學識反抗，她亦提醒女孩子若遇到任何性騷擾事件，必定要Say No ：「女仔一定要好好保護自己，因為唔出聲反而助長呢班人更加大膽！如果唔係都唔會摸完人，仲露出得戚眼神！」
索爆人妻孫慧雪遇猥瑣男
已升呢做人母的孫慧雪，亦向本刊透露讀中學時，曾搭地鐵被猥瑣男用下體頂臀部，嚇得她花容失色！真係聽到都令人惡心！ 28歲TVB索小花王卓淇，亦嬲爆向本刊透露，在她還讀小四時遇上猥瑣阿叔，向她施以淫手狂捽她的面珠和嘴，經歷令她留下陰影，試過有段時間不敢一個人行街。女生被博懵已經夠慘，如果唔出聲，事後諗番轉頭可能會更激氣！女神公開切身經歷，提醒大家緊記做個勇敢的女孩。
王卓淇被陌生大叔捽面珠
來自廣州的無綫索小花王卓淇，近期在IG經常大晒趷籮露趾性感相，令宅男暈其大浪，Erin（王卓淇）受訪時就透露讀小四時，曾被一位陌生大叔用手捽面珠和嘴。她重提事件仍表現嬲嬲豬：「嗰時我同另一位同學一齊，個大叔係咁捽我塊面同我個嘴，話我好得意，你知阿叔嘅手掌幾大，不過咁！我細細個已經好寸嘴，我即刻鬧佢：『阿叔，你做乜嘢！你想點！』身邊同學就即刻拉我走，自呢件事件發生之後，令我留有陰影，之後一個人放學都有啲驚，阿媽一定會來接我！就算唔得閒，都會叫工人姐姐接我！」
將來還有什麼演唱會值得留意？
有不少歌手宣布舉辦演唱會，小編為你整合了香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
