34歲謝東閔為娶朱智賢擲千萬築愛巢 女友出軌心碎孤伶入伙

原文刊於《東方新地》

繼馬國明去年經歷男人最痛，被黃心穎背叛後，謝東閔接棒成為「馬明2.0」，女友朱智賢被爆因拍新劇《食腦喪B》，與有「翻版古天樂」之稱的16年港男冠軍黎振燁兩度在屯門半山幽會，其中一日在車廂共享心形蛋糕，被斷正後狼狽散水，黎振燁因為趁老婆大肚偷食被封賤男，而朱智賢被追訪時更一度唔認與謝東閔是情侶關係，總之關係就七國咁亂。

朱智賢孖男友開記招 搏先洗底後翻身

朱智賢比黃心穎好彩，因為外遇對象只是大茄黎振燁，影響冇咁大，據知事後她即向男友謝東閔與無綫認錯，把整件事的來龍去脈講清楚，知情者透露：「Ashley（朱智賢）好易畀人氹，雖然一隻手掌拍唔響，錯一定有，不過佢好命，有個上緊位嘅男友Brian（謝東閔），公司選擇畀機會Ashley翻身，不過都要時間洗底，依家咪順勢推Brian上位，佢最近首新歌hit緊，而Jackson（黎振燁）前途就係咁先，嚟緊唔會再有工作喇！」

無綫很快就安排謝東閔陪住朱智賢出席記者會，兩眼通紅的謝東閔當日一臉憔悴，一夫當關先開口表示朱智賢只因一時迷失，而他更自責因為最近事忙而疏忽女友，被人有機可乘，謝東閔處處維護藉此公開戀情，之後才輪到朱智賢交代事件，她神情嚴肅連環講「對唔住」，她哽咽說：「我要講嘅係對唔住，我令大家失望對唔住，（停了幾秒兼抿嘴），我知自己做錯，我對唔住錫我嘅人，我對唔住畀機會我嘅人，我辜負咗你哋，辜負咗公司，喺呢度我想同喺呢件事受傷害的人講聲對唔住，真心對唔住。」其後朱智賢接受無綫獨家訪問，更直認自己唔夠專業抽離唔到角色而鑄成大錯。

女方留娘家反省謝東閔心碎孤伶入伙

看來朱智賢已得到謝東閔的原諒，不過她對男友卻心有愧疚，知情者透露：「發生咁大件事，雖然Brian話會同Ashley共渡難關，但唔係話一時三刻就可以嘻嘻哈哈當冇事，圍內朋友都鬧爆Ashley唔知足，其實Brian早有計劃同Ashley拉埋，最近仲搬新愛巢，不過Ashley想沉澱一下，暫時留喺娘家靜吓先，佢知道Brian好錫佢，所以想以後做得更好，遲啲先搬去新屋一齊生活。」

謝東閔因護愛而被封「馬明2.0」，而他的新歌〈最冷的一天〉又夾啱時間應晒景被力推，受情困仍要忙工作的他，上周四（4月30日）與戴祖儀為合唱的新歌到淺水灣拍MV，現場所見，謝東閔在人前非常專業，不時與戴祖儀輕鬆閒聊，可是每當靜下來，他都若有所思。由早上11時拍到下午4時終於收工，謝東閔返回舊居御海峰，本刊記者見屋內已空空如也，他搬了幾箱物品上車，在屋內逗留一會傾了個電話，便駕駛其跑車前往新居海譽。

為女友隔空開火 直指黎振燁講大話

孤伶入伙的謝東閔明顯愁眉不展，因為他非常著緊女友朱智賢的事，而事情仍未告一段落，日前黎振燁與懷胎八個月的太太外出，其間向傳媒稱與朱智賢只屬發生了幾個星期的霧水緣，並表示自己一向不喜歡聯絡女同事，似暗示今次的出軌事件不是他採取主動。為此，謝東閔大動肝火，在社交網出po開名鬧爆黎振燁，直指黎「用完謊言巧語之後還可以出來講大話」。其實謝東閔真係唔使同壞咗嘅港男駁火，諗吓點樣同朱智賢修補裂痕，快啲一齊搬入新愛巢過新生活仲好啦！

與大肚妻識於微時 女方選擇原諒回收黎振燁

黎振燁與太太識於微時，多年來同甘共苦，太太為圓老公的明星夢，結婚一切從簡冇擺酒，四年前黎振燁當選港男，二人更當場激吻。如今挺住八個月肚的黎太，為了BB的幸福表示會原諒老公出軌，真偉大！