【調查男女】鄧兆尊以「古董」形容女友 兄弟撬牆腳會大方讓愛

文：東方新地｜圖：ViuTV提供及新傳媒圖片庫

鄧兆尊 不怕兄弟撬牆腳

ViuTV全新節目《調查男女》由林曉峰及練美娟擔任主持，每集都會委託香港最具權威性的民調公司，問盡港人各種鎖碎又天馬行空的問題，並邀請一男一女做嘉賓，競猜調查結果。最新一集的《調查男女》，就邀請到鄧兆尊及沈殷怡擔任嘉賓。

兩位主持人要鄧兆尊及沈殷怡猜出港人覺得最Hurt的分手理由，一向異性緣爆燈的鄧兆尊認為，如果另一半與他分手時表示已經和自己的朋友在一起會很傷心。

主持們追問鄧兆尊會否與朋友從此絕交，鄧兆尊表示會大方讓愛。

之後鄧兆尊更語出驚人笑言：「如果佢真係咁都睇得落我依家嗰啲嘅話，我點會唔見佢吖，你諗吓係唔係？即係佢咁欣賞『古董』嘅話。」主持林曉峰立刻幫口說：「古董價值都好高嘅！」

此外主持練美娟於節目中又透露曾有交往對象是已婚人士，起初她並不知情，直到對象在二人閒聊間突然自爆，更解釋道：「你都冇問，咁我咪冇講，咁我唔算呃你喎！」沈殷怡聞言後亦忍不住大呼一句：「痴線！」

鄧兆尊三頭住家回顧：同住灣仔區 月使20萬定期發放家用

現年53歲的鄧兆尊身形瘦削卻精力旺盛，多年來馭女有術能同時交三位女朋友，還經常一拖「3C女友團」出巡，早前他宣布與三奶Claire緣盡，其位置即由國產L小姐頂上，兆尊唔止公開承認新歡，仲話唔介意L小姐帶著十幾歲的女孩，總之緣份到就好好發展。

知情者評L小姐：「春情大爆發，成日用對G奶引誘兆尊⋯⋯」

在兆尊的調校下，舊3C女友兵團一直相處融洽，過去不時四人行，試過三個女友一齊病要入院，兆尊安排三人同住一間醫院，每日分時段陪女，唔會令任何一個唔開心，可惜新三奶L小姐的加入，令整個關係有所變化。據知L小姐恃住自己比正印Carmen及二奶車厘子年輕，再加上G奶激凸身材，對於兆尊來說，新鮮感與激情度同樣高企，知情者透露：「三個女人共侍一夫，話冇爭風呷醋就假，正印Carmen及二奶車厘子平分秋色三十年，後來多個三奶Claire開始各有怨言，到兆尊同Claire玩完L小姐加入，呢位國產女友春情大爆發，成日用對G奶引誘兆尊，佢依家得寵要乜有乜，仲唔有風駛盡𢃇咩？之前兆尊一個星期都會陪勻三個女友，依家成日都畀L小姐獨霸，另外嗰兩個敢怒不敢言，驚激嬲兆尊被踢走，真係斷米路㗎！」

鄧兆尊 每月豪花20萬養三頭家

貴為新馬師曾長子，含住金鎖匙出世，但鄧兆尊揀女友條件唔一定有樣有身材，過去曾被網友指他愛「鋸扒」，正印Carmen與車厘子都是身材略胖姿色平庸，而新三奶L小姐的G奶更是青出於藍，為此兆尊早前接受訪問時笑言自己後生時都是識食之人，不過一個人去到某一個年紀，已經不是講愛情，是講感情，所以他絕對唔介意女友愈來愈肥。有指兆尊每月豪花20萬養三頭家，行宮更安排周到，除了正印Carmen與他同住永祥大廈，二奶三奶就分別住灣仔菲林明道同駱克道舊樓，行勻三頭家都唔使十分鐘，夠晒方便快捷。

鄧兆尊為三奶冷落其他女友上節目笑騎騎認食豬扒

兆尊在疫情下只掛住與三奶增進感情，本刊記者近半年見他頻頻與三奶出雙入對，以往只集中在灣仔區活動的兆尊，為三奶走勻全港，早前二人勇闖南灣與陽光玩遊戲，面對進擊的三奶姣騰騰掃髀罅，兆尊根本無力招架，之前話過與女友不會公開親熱的他，更情不自禁破晒戒拖晒手又錫膊頭。為博新三奶一笑冷落其餘兩C，兆尊大細超到極點。

南灣情慾戰一役後，三奶人氣急升，當日水著look令G奶現人前之外，白滑肥美身材加豬腩肉更成為焦點，過往兆尊多位女友皆屬「圓潤型」，三奶更把指標推上頂峰，早前兆尊帶埋三奶接受好友苑仔（苑瓊丹）訪問，苑仔竟不留情面當住三奶面前笑兆尊「鍾意食豬扒」，不過正值熱戀期的兆尊毫不介意，兼笑容滿面甜到漏回應：「扒有好多種，靚嘅擺喺屋企，係靚豬扒嚟！」現場的三奶未有反枱，但就扁嘴向兆尊撒嬌不滿被叫豬扒，而且笑得好牽強。