裕美被指「第三者」反擊大爆料！直言：麥貝夷同翟威廉冇拍過拖

撰文：Lmc丨圖片：裕美＠IG、翟威廉＠IG、麥貝夷＠IG，Happy Live@Youtube丨編輯：海月

麥貝夷早前在網上爆大鑊，指控拍拖3年的前度性伴侶多到得人驚，仲夾啱時間在男方生日送祝福，矛頭直指港男翟威廉。火頭愈辣愈多，翟威廉自辯單身7年有短暫伴侶，而且日、韓國籍都有，再次觸動麥貝夷神經，繼續爆與前度曾因第三者而分手，之後再復合，結果又拉埋中日混血兒裕美落水，唔係善男信女的裕美即開火反擊叫麥貝夷去睇醫生，仲警告麥貝夷唔好再搞事。

麥貝夷不忿前度當她是性伴侶

麥貝夷再次接受傳媒訪問，情緒激動邊講邊喊，繼續不開名指前度才是「真正主角」：「我哋係好親密嘅關係，我係女友，可以咁講，拍拖會做嘅嘢都做晒。」麥貝夷表示二人沒有同居，但間中會去男方屋企過夜，絕對是好正常男女拍拖的關係。對於男方只當她是性伴侶，麥貝夷反應甚大，聲稱不知對方咁嘅諗法，曾有圈內及圈外的朋友告訴她，前度覺得是她單方面纏擾，但麥貝夷一直以為這段關係好Sweet，二人每日會傳短訊。

新角色小三登場

麥貝夷繼續數臭前度，這段關係維持了3年多，曾分開過一次，因她發現對方有第三者，更隱晦地暗示小三是圈中人、理論上是香港人，好特別，與別不同。麥貝夷仲話當初是前度要求低調拍拖，所以只有幾位朋友知情，而期間她亦有5至6個追求者，言談間似暗寸前度有日韓籍性伴：「我都有韓國人追，但我Reject咗，因為我尊重呢段關係。」提到翟威廉向她道歉，麥貝夷雖然話唔知點解對方要道歉，但她始終不肯親口否認翟威廉是男主角，拒絕還他清白。

裕美：躺著也中槍

由於麥貝夷指第三者「理論上」是香港人，令與翟威廉關係親密的中日混血兒裕美成為嫌疑人，兩年前麥貝夷經常與翟威廉夾band過從甚密的日子，裕美也曾現身翟威廉的「Happy Live」，對於被捲入七國咁亂的關係，裕美怒斥麥貝夷有病，否認與翟威廉曾經有關係，仲問麥貝夷是否需要去睇醫生：「一早叫佢睇㗎啦，我有好多精神科醫生（介紹）！」裕美話麥貝夷對上一個男人都是由她做媒，分手時裕美覺得麥貝夷處理感情不當，麥貝夷竟與她反面，裕美愈講愈扯火：「你唔好再搞我！我由小學到中學都畀人搞，你再搞我，我一定搞番你！」

裕美：麥貝夷拉埋我落水

面對被指第三者，裕美相當生氣，她提到：「麥貝夷拉埋我落水，引導傳媒嚟誤會我，佢有責任同我講返兩句，所以我發訊息俾佢，要求佢喺社交網發文澄清。」而麥貝夷就回應：「要講嘅都講晒喇。」令裕美嬲上加嬲。

裕美撮合麥貝夷與林作好友Edmond Luk拍拖

另外，裕美提到2019年曾介紹男仔給麥貝夷識，此人是林作好友Edmond Luk，他們拍拖至上年尾才分開，所以麥貝夷同翟威廉冇拍過拖。裕美又講到：「其實麥貝夷同Edmond拍拖前後，甚至拍拖期間都有上Happy Live唱歌，Happy Live喺夜晚做，咁嗰晚我就預咗佢唔會上嚟我度瞓。我同麥貝夷好close嗰陣，佢曾經同我講過，同翟威廉只係『朋友』，唔會鍾意佢，亦冇提過兩人拍拖，就算上去Happy Live，都只係交代話『我又上去佢度做……Happy Live』」

大爆麥貝夷難相處

麥貝夷與Edmond Luk拍拖期間，也有上Happy Live。裕美指睇唔過眼：「勸佢唔好咁對Edmond，怕佢會玩出火，佢就當我係敵人，怪我好鬧佢，嬲咗我。」她又指麥貝夷難相處，有佢講冇人講，又會成日自行幻想：「試過同佢一齊坐uber，司機見佢喺車上喊就請佢食糖，司機只係出於好意，都有遞埋畀我食o架！點知佢諗多咗黑晒面兼發晒癲，以為對方想佔佢便宜，惡到不得了，搞到我幾唔好意思呀！佢成日覺得全世界嘅男人對佢都有企圖，真係要去睇精神科醫生。」

裕美指翟威廉：佢係坦誠嘅人

最後，裕美指翟威廉是坦誠嘅人：「佢直認自己單身7年係有性伴侶，唔會陰你，佢同麥貝夷嘅關係，兩人都心知肚明，所以今次嘅事，我同佢都笑咗，一致覺得麥貝夷有需要去睇醫生。」另外，她又奉勸麥貝夷，指做女人不是叫男伴戴套進行性行為，就叫做識得保護自己，而係要確立同男方關係知道對方不愛自己，就不要再糾纏。

翟威廉：不是「性上癮」、「性慾強」

被麥貝夷「揞名爆」連番狙擊，翟威廉一直否認與麥貝夷拍過拖，又指：「雖然有性伴侶，但絕不是性上癮和性慾強。」又指自己選擇「只要伴侶」的生活，可能是因為家庭因素，所以對婚姻沒有任何憧憬。

翟威廉澄清與裕美及陳苑澄的關係：係一個大整蠱，裕美嬲係好正常

翟威廉被麥貝夷指「偷食」好友裕美，裕美也發火，警告麥貝夷不要再搞自己。翟威廉也澄清與裕美及陳苑澄的關係，提到：「我對有關伴侶嘅身份問題，係與唔係，我都唔會作答，但呢次要破例講一次，裕美、陳苑澄都唔關事，係一個大整蠱，裕美嬲係好正常，佢都有搵過我，佢亦用咗佢嘅作風去否認。」而翟威廉也有向裕美道歉，相當識做。

翟威廉公開認有不同國籍的性伴侶

消息傳出後，翟威廉指自己與前度陳庭欣分手後一直單身，但公開指自己有不同國籍的性伴侶：「可能會引來無限遐想，好像每晚都有不同性伴，夜夜精彩，但事實是大家想多了。但其實有性伴侶呢個生活模式，只係佔我生活入面嘅一小部分，只有2成左右，其餘嘅時間我都係工作。我一定唔係性上癮，呢個對我嚟講係好普通嘅生活，唔會頻繁，亦冇特別需求。」

裕美：覺得翟威廉慘啲，識揀一定揀林作

翟威廉對裕美道歉，裕美就覺得翟威廉慘啲，她提到：「唔緊要，我覺得佢慘啲，有時我都會Send啲報道畀佢睇。咁都關我事？笑料一則，我只係知威廉同麥貝夷都冇拍過拖。」她又在IG公開示愛，指「識揀一定揀林作 @jolamchok ，唔揀翟威廉。」相當抵死。