蔡思貝與「他」十日內密會三次疑默認戀情 HeHe密友許廷鏗變花生友

原文刊於《東方新地》

蔡思貝令胡鴻鈞、許廷鏗兄弟絕交

許廷鏗出新歌咁大件事，亦有主動通知胡鴻鈞：「 我有搵過佢，不過佢好少覆我。」之後失望表示 ︰「 其實最近我同佢少咗聯絡，我唔係太好意思，我同蔡思貝唔係好認識，佢都唔係好認識我，做訪問好似成日要人哋答我啲嘢。如果佢哋有進一步發展，我都係讀者，可以話番畀我聽都好。」許廷鏗自嘲為讀者鏗，正「 食花生 」留意胡鴻鈞同蔡思貝進一步發展。佢仲話唔想失去呢位朋友，呼籲對方蒲頭：「 之前出席聚會都見唔到佢，對上一次聯絡已經有一段時間，總之就算有乜嘢情緒都好，都希望盡快平靜落嚟，千祈唔好失去聯繫。」能成為密友大概總帶著愛，話晒一場兄弟，唔好有異性冇人性喎！

回顧蔡思貝入行至今進化之路

現年28歲嘅蔡思貝因2013年參選香港小姐獲亞軍而入行，不過就因喺電視台姣名遠播，而令唔少人對佢冇咩好感，形象掃地。不過早前TVB新劇《鐵探》出街，其中於劇中飾演臥底嘅蔡思貝更成大家熱議嘅一位，唔少網民讚佢畀以前省鏡得多，仲話佢演技比以前進步！

蔡思貝喺新劇《鐵探》中飾演臥底招喜悅，為咗愛人邱勵傑（楊明飾）而加入警隊，第一集出場時為配合做古惑妹，著上小背心加超短熱褲嘅造型大獲觀眾好評！

喺第二集中，蔡思貝更因為吸入過量毒品而身體抽搐，演出相當迫真，更獲唔少觀眾讚賞其演技！表現愈來愈有進步嘅蔡思貝，更因而成功令網民對佢改觀！

蔡思貝擺脫衝動性格

話說，蔡思貝對上套有份演出嘅劇集《大帥哥》擔演女主角，當時網民就擔心一向冇咩觀眾緣嘅蔡思貝會拖挎劇集收視。

幸然，最後唔少網友指蔡思貝喺《大帥哥》中，明顯喺講對白嘅語氣、聲線和速度下咗一番苦功，實實在在咗演活沉實、穩重又溫婉嘅沅婉。因此，即使與張衛健有對多場對手戲亦未至顯弱。蔡思貝在《大帥哥》的演出，確實比以前進步不少，同時不少網民讚佢愈大愈靚女！

蔡思貝：「好多人都唔係好鍾意我」

還記得蔡思貝前年台慶頒獎禮上，憑《踩過界》趙正妹(癲姐)一角，打敗《同盟》胡定欣、《誇世代》李佳芯等勁敵，成功奪得「最受歡迎電視女角色」獎。當時，蔡思貝喺台上感觸表示：「多謝TVB，多謝《踩過界》，多謝監製搵我做趙正妹，亦好多謝趙正妹呢個角色，因為選完港姐之後大家一路對我評價都唔係咁好，覺得我做咩嘢都唔好。嗰時到依家，好多人都唔係好鍾意我，甚至令到我自己都唔鍾意自己。」

蔡思貝續說：「我初初覺得自己頂得住，後尾覺得自己真係好醜。直到監製搵我做醜角我就覺得好好喇，咁巧合有個醜角色俾我，我覺得very good，同我一樣咁醜。因為呢個角色，令我有返少少鍾意自己，亦令你哋鍾意返我自己多啲。我仲會喺TVB好多年，我會演好多戲證明自己，我會做出嚟俾大家睇！」

2013年選港姐入行

話說，蔡思貝曾到紐西蘭及德國留學，2013年就讀德國海德堡大學民族學期間，趁暑假返港參選港姐，以五萬觀眾投票輸畀同屆嘅陳凱琳，屈居亞軍，而該屆季軍則係劉佩玥。最終，蔡思貝決定放棄學業簽約TVB，開始入行拍劇。

參選港姐確係靚女入娛樂圈嘅最佳途徑，2013年當選港姐冠亞季的陳凱琳、蔡思貝和劉佩玥都受無綫力捧，成為當紅花旦。

蔡思貝 介意被稱「達哥」

蔡思貝先後被指似，陳煒、梅艷芳，木村拓哉，又或者係網絡紅人「達哥」，佢話被指似樣撞樣唔緊要，但最介意係網民喺佢專頁叫佢做「蔡思達」，甚至直接叫佢做「達哥」，佢認為：「改名叫我做蔡思貝，就一世都係蔡思貝，而唔係其他名！」

當年初出道蔡思貝明顯面較闊、鼻亦較扁，更偏男人相，因此被指酷似木村拓哉，甚至「達哥」，連杜汶澤都曾經好認同。

傳姣媾鄭俊弘

同年尚未卸任港姐亞軍，蔡思貝就開始拍處女劇《八卦神探》，飾演大學生蘇倩敏一角，並與鄭俊弘有感情線，仲一度傳出佢姣媾鄭俊弘。

2015年 升呢女主角

2014年，蔡思貝第二部劇集《名門暗戰》飾演泰拳手馬小明，與蕭正楠有感情線，獲監製羅永賢讚氣質有點像當年郭藹明。

當年《名門暗戰》中蔡思貝與蕭正楠做一對，並在擂台上「搞出人命」，令觀眾嘩然！

2015年嘅《衝線》中，蔡思貝已升呢做女主角，與羅仲謙做一對，仲入圍當年入圍《萬千星輝頒獎典禮》最佳女主角。

演技曾受質疑 角色不討觀眾歡心

雖然喺《衝線》擔正女一，但就引嚟劣評如潮。一眾網民指蔡思貝演技生硬，角色衝動討厭，而且講對白嘅聲音都非常吵耳！

其後蔡思貝再於《鐵馬戰車》中飾演女主角之一 ──交通警貝心柔，其衝動嘅性格導致不斷撞板，要由黃德斌飾演的杜Sir出手相助。喺溫柔冷靜嘅姚瑤（唐詩詠飾）對比之下，蔡思貝更顯粗魯，亦因為剛好係「制服部隊」，就被擺嚟同「無綫衝動代表」吳卓羲比較，成為「女版吳卓羲」！

2015年蔡思貝演出電視框從軍電影界，參演由張家輝自導自演嘅《陀地驅魔人》，飾演記者方紫寧，劇情中佢為咗探新聞而惹鬼上身，處事同樣橫衝直撞。

因被揭申請虛假學歷形象插水

蔡思貝之後又參演劇集《潮流教主》，除貫徹衝動又固執嘅性格之外，更因為其說話高音，再被網民賦予「高分貝」稱號。而在同年年底，蔡思貝又因為被揭發假學歷一事而形象插水，但當時佢則聲稱自己德國留學，卻被踢爆實情係從菲律賓一所大學購買假學歷證明。

近年洗底憑癲姐出位

蔡思貝憑《踩過界》趙正妹(癲姐)一角，奪得成功揮低《同盟》胡定欣、《誇世代》李佳芯、《不懂撒嬌的女人》唐詩詠、《降魔的》黃智雯。

愈大愈靚女

蔡思貝自2013年當選港姐亞軍後就簽約TVB，在任期間已獲監製賞識，演出多套劇集，極速升呢女主角之餘，比起初出道時當年初出道激似木村拓哉甚至「達哥」嘅面相，近年蔡思貝真係愈變愈靚女，依家應該冇人再叫佢「達哥」啩！

又睇吓盛裝嘅打扮！穿晚裝嘅思貝唔止性感，仲女人味十足！

加上，憑住《降魔的》一劇而爆紅嘅歌曲《到此一遊》大受歡迎，早前TVB更加搵嚟5個港姐小花：馮盈盈、黃心穎、蔡思貝、張寶兒、邵珮詩跳唱《到此一遊》，個個都話蔡思貝係五個之中，跳得最好、身形最靚、最sexy嘅一個！

有片睇：

雖然最近蔡思貝為拍新戲又再次將頭髮剪短，但打扮愈嚟愈靚、演技愈見進步，相信佢嘅努力大家係有目共睹！