半百萬綺雯甩無綫赴內地掘金 翻叮馬小玲大晒42吋長腿

原文刊於《東方新地》

萬綺雯拒簽TVB經理人約

現年50歲的萬綺雯，自16年拍罷劇集《致命復活》，近年幾乎絕跡無綫，直至上年底，她才再接拍劇集《伙記辦大事》，與老拍檔歐陽震華合作，不過今年三月，蚊蚊拍完該劇，跟無綫的部頭合約亦正式屆滿離巢。據知情者透露：「好多花旦都貪無綫夠穩陣，想做親生女有多啲機會，早喺四年前無綫已經斟蚊蚊簽經理人合約，不過嗰時蚊蚊養嘅六隻貓先後離世，令佢人生觀改變咗，加上佢覺得拍咗咁多年劇集冇停過，想畀自己一個空間休息吓，唔想再咁博咁Chur，所以拒絕咗簽經理人約，寧願同無綫繼續簽部頭約合作，揀鍾意嘅劇本先接。」作為性格女神，萬綺雯16年更為與馬浚偉合作舞台劇《偶然，徐志摩》，因而推掉老表第三輯《老表，畢業喇！》的女一角色。據知情者透露：「蚊蚊老公陳十三，除咗係編劇，亦係舞台劇演員，蚊蚊對做舞台劇亦有情意結，比起拍劇，佢更嚮往感受觀眾現場嘅反應！刻意減產之後，已經三年冇拍無綫劇，接拍《伙記辦大事》，都係因為想再同老友Bobby（歐陽震華）合作。」

翻叮馬小玲大晒42吋長腿

現時自由身發展的萬綺雯，近年自組「萬綺雯工作室」，不時參與內地活動及商演賺人仔，近日她更無懼新冠肺炎疫情，留在上海拍攝微綜藝短劇《綺遇記》，在劇中演綺老闆的她，與她的一班助手闖蕩江湖展開綺遇之旅，不過劇迷追咗幾集，已經發現萬綺雯劇中角色，經常大晒42吋長腿，其中一個造型將秀髮束成長馬尾，造型同當年《我和殭屍有個約會》的馬小玲極為神似，令觀眾回憶返晒嚟！ 50歲的她逆齡震撼網民，唔少人留言大讚她跟當年馬小玲一樣可愛，更推佢做「永遠的馬小玲，最美驅魔人」，睇嚟出道三十一年的萬綺雯，同馬小玲已經不可分割！