【萬千星輝頒獎典禮2020】高海寧簽長約爭視后隨時撻Q、龔嘉欣 蔡思貝成大熱！

原文刊於《東方新地》

高海寧用續約做籌碼爭《萬千星輝2020》視后

今年有四套劇連播的高海寧，本來叫胡叫四飛，不過日前無綫公布《萬千星輝頒獎禮2020 》的提名名單，她只憑《反黑路人甲》入圍提名最佳女主角及最受歡迎女角色，至於擔正的《迷網》及《 C奶特工》均未獲提名，而今年有18位花旦入圍爭視后，高Ling要打入五強唔難，不過希望愈大可能失望亦愈大。花旦中不止高Ling一個夠期續約，視后只有一個，一日未揭曉仍有變數，高Ling亦早有兩手準備，視后未能勝劵在握，惟有轉Plan B與無綫達成共識，全力讓她發展國內市場，今年10月高Ling挾著之前客串內地劇《三十而已》的人氣，赴京探路，放眼神州放輕視后，高Ling果然是靈活變通的世界女。

《萬千星輝2020》視后對手強勁 蔡思貝搶視后

雖然拍到周身傷，不過今年高Ling有四劇出街，被指有機會在台慶頒獎典禮開齋攞獎，不過今年視后之爭對手依然強勁，暫時未有一部代表作的高Ling，搶視后又係陪跑，當中下月擔正兩套台慶重頭劇《踩過界II 》及《使徒行者3 》的蔡思貝，更加來勢洶洶，年初由她擔演的《機場特警》，收視平均有33點，暫是全年收視第二位。據知情者透露：「Sisley（蔡思貝）出道已經被讚演戲有天份，本來形勢大好，不過佢緋聞不斷搞到形象衰晒，三年前喺《踩過界》本來好有機攞視后，最後都只係攞到『最受歡迎電視女角色』，不過近年佢努力洗底，無綫亦要捧花旦上位，佢最近接咗個大型金飾廣告， TVB好睇重佢！今次佢好大機會跑出！」

背後有好姊妹佘詩曼教路

過去被封視后的花旦並非民望高就一定攞硬，據知情者透露：「高Ling喺無綫拼搏咗十二年，佢覺得今年係收成期，之前公司氹掂佢簽長約，高Ling即打蛇隨棍上爭取做視后，公司好例牌咁讚賞佢嘅努力大家都有目共睹，話唔會待薄佢，不過獎呢啲嘢唔係白紙黑字可以保證，亦唔係一個人可以話晒事，原來今年有幾個視后人選都就快約滿，唔到最後都唔知花落誰家。高Ling除咗想爭視后，佢肯簽長約其中一個原因係公司應承會幫佢攻內地市場，10月佢飛去北京隔離完，就開始打通內地人脈，先同內地傳媒打好關係，出席新劇《非凡三俠》嘅記者會，仲拍咗套網大（網絡大電影），佢突然開竅全因好姊妹阿佘（佘詩曼）教路，阿佘北上發展咗咁多年睇通晒，佢同高Ling講只要能夠成功打入內地市場，名利乜都有，呢啲先係真正出路，不過無綫就樹大好遮蔭，兩地發展亦冇壞。」

08年參加港姐入行的高Ling，由最初以34D身材為焦點，到近年專注拍劇磨練演技，終獲無綫力捧脫離「花瓶」之列，爬上女一之位，從過去兩個月的北漂生活來看，睇得出高Ling非常適應內地生活，甚至樂而忘返，據知《萬千星輝頒獎禮2020 》將於明年1月10日舉行，高Ling亦會在頒獎禮前返港，不過都係陪跑居多。