胡鴻鈞挑戰娜姐出人肉攬枕 網民唾棄建議出刀削麵
今屆書展同動漫節因疫情緣故延期舉行，而香港動漫節決定同無綫合作，將啲產品放上big big shop度賣，而無綫就搞搞新意思食住商機，為旗下藝人胡鴻鈞推出人肉攬枕，並命名為「胡鴻鈞幸福攬枕」。究竟呢個胡鴻鈞攬枕有幾幸福？喺big big shop廣告中有介紹：「攬住『胡鴻鈞幸福攬枕』，就好似攬住Hubert真人咁幸福！以後無論你想聽歌或是睇戲，都有『胡鴻鈞』陪著你！」開價係港幣399蚊，仲附送胡鴻鈞親筆簽名卡一張。
娜姐大賣6千個
其實娜姐周秀娜先係人肉攬枕始祖，十年前佢已經喺香港動漫電玩節推出過攬枕，當年成為全城熱話，更成功賣出6千個，銷售額超過300萬。真係橋唔怕舊，胡鴻鈞挑戰娜姐，真係好大膽。
尖下巴會拮親
講到呢度，胡鴻鈞粉絲很想要吧？不過網民普遍並唔係咁諗，質疑無綫係咪「傻咗？」「搞錯咗？」，為藝人出攬枕唔奇怪，但最難明係無綫芸芸藝人中，一線小生花旦唔份出，樣靚身材正嘅咪神、小花唔出，只係幫胡鴻鈞出，呢層真係令人費解，網民反應極大，幾乎全部都話個攬枕咁嘅價錢一定「唔會買」、「冇興趣」。
網民留言mean爆
寧買阿Bob同汪阿姐
網民仲有大量抵死回應，又重提削骨還父舊事，笑個攬枕下巴太尖會拮死人，又叫胡鴻鈞不如出刀削麵仲適合，仲話寧願要汪阿姐、阿Bob、馬明同高海寧都唔要胡鴻鈞。話唔定今次胡鴻鈞只係先頭部隊，無綫想試吓市場反應，下次先再出汪阿姐呢？
將來還有什麼演唱會值得留意？
有不少歌手宣布舉辦演唱會，小編為你整合了香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
