胡諾言、陳琪西貢三層大屋自給自足花園種菜產巨大冬瓜

新假期 - 影視

Sep 10 2020

廣告

03年首播、早排深夜至重溫完，《九五至尊》唔止係無綫史上穿越劇收視之冠，其實仲係胡諾言同陳琪嘅定情之作。話說當年合作完劇集，胡仔即對陳琪觸電，趁住8月23日生日前夕約女方去街一齊倒數慶祝生日，就係咁造就一段好姻緣，拍拖近7年後於09年結埋婚，婚後誕下兩女一子。如今胡仔繼續拍劇搵家用，17年離巢嘅陳琪搖身一變成為港媽 KOL，一個湊三個出得廳堂入得廚房，亦大受各大品牌歡迎，最高收入一個月都有成六位數字㗎！

原文刊於《東方新地》

陳琪持家有道胡氏夫婦擁市值四千萬物業

講到陳琪絕對係模範人妻，唔止持家有道、知慳識儉，最經典試過廿五蚊煮一大煲魚蛋河餵飽全家外，仲懂得腳踏實地積少成多早買樓早享受。作為胡家財政大臣，早年已經扎根西貢，一層村屋變兩層小全棟、兩層小全棟再換三層獨立屋，家陣兩公婆除咗西貢半山全棟自住三層村屋外，亦於將軍澳區手揸三層物業，市值超過四千萬！

拍拖時期已經扎根西貢，胡氏兩口子細屋換大屋一層變兩層、兩層變三層，依家一家五口住喺西貢半山面海2千呎村屋。

三個仔女玩具雜物都多過人，不過大廳可見放埋大型玩具都仲有大把位，夠兩父女來來回回騎膊馬。

村屋勝在價錢公道實用率高，胡家地方大自然成為親戚朋友聚會首選地點，幾家人有大有細開個幾十人party 都不成問題。

自家花園有胡太親自翻土播種每日打理。

胡C9周不時晒自家種嘅番茄蔬菜，仲有size同三歲囝囝一樣大嘅巨型冬瓜。

同唔少電視台藝人一樣，胡仔都愛上長跑又勤健身，自家天台亦被改建成私人健身室隨時有得操。

花園種菜種花、私家健身室應有盡有

講起一家人自住嘅三層村屋認真見使，背山面海私隱度高，有花園有天台，仔女房、學習間、工人房應有盡有唔使爭，居家湊仔上網開 live 無難度，尤其係抗疫期間同三個仔女宅在家，胡諾言將天台改裝成私家健身室，陳琪就喺花園種菜種花自家產巨大冬瓜，三姊弟在家玩樂學習幫吓媽媽整餅又幫狗狗沖吓涼，大把空間大把玩意，真係唔使出街都唔會叫悶！

逢過年過節，胡家實有真．聖誕樹同高過大人全棵桃花做裝飾，亦見到地下大廳地方大裝修亦有氣派。

胡氏伉儷對三個仔女絕冇厚此薄彼，大廳訂造落地櫃就有三姊弟出世第一年特製相架。

胡仔兩公婆喺電視台人緣極好，過年過節唔少圈中好友上門拜年，胡定欣、袁偉豪、陳山聰等人亦不時攜眷出席食大餐，巨型餐枱完全夠坐！

近年轉型做港媽KOL，屋企地方大裝修靚，keep fit嘅陳琪到處都可以影產品相。

複式設計室內樓梯直達天台，大把地方嘅胡氏一家去年又有新成員加入養埋柴犬。

胡 C9能幹又有條理，胡家都有小朋友專屬學習間，開學用 Zoom 上堂做功課一流。

兩姊妹共用一間房，爸爸媽媽都為兩個女設計公仔造型天花及睡床，充滿童真。

廚房大到影唔晒，有豪宅至有嘅中島設計，仲有雙門大雪櫃。

將來還有什麼演唱會值得留意？

有不少歌手宣布舉辦演唱會，小編為你整合了香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！

香港有甚麼週末好去處推介？

香港18區都非常值得花時間好好探索，一家大細去暢玩的親子好去處、拍拖推介32大情侶好去處、落雨必去的室內好去處、慶生推薦20大生日好去處、新手必備19大靚景行山好去處、秋天戶外露營好去處…..

關鍵詞

胡諾言陳琪娛樂熱話

資料或影片來源：原文刊於東方新地