聲夢歌手冼靖峰攞沙士講笑被轟 純文字聲明公開道歉 網民：衰過陸浩明

文：東方新地 ｜圖：YouTube@All About Music 愛爆音樂、IG@archie_sin

98年冼靖峰嘲笑03年出生學員「沙士死剩種」

日前一班聲夢學員冼靖峰（Archie）、林智樂（Felix）、蔡愷穎（Lolita）和詹天文（Windy）在網上開Live演唱，席間Felix帶起有關眾人年紀話題，指現場有三個世代的人，Felix仲話：「我同蔡愷穎都係03年。」點知1998年出生的Archie聽完突然口出狂言：

「03年？即係沙士死剩種呀，係咪呀？」

其餘三位成員即時被嚇到發呆，現場氣氛尷尬，而蔡愷穎則打圓場說：「講呢啲？」雖然及後冼靖峰已知衰嘗試補鑊說：「講笑講笑，哈哈。」但Felix似乎仍未能回過神來，只回答：「我load唔到，都唔係差好遠啫。」

冼靖峰知衰 直播尾聲認錯降溫

而冼靖峰的失言已經被網友聽入心，紛紛留言炮轟他拿沙士來講笑，更有網友直言感到憤怒！而該集節目之後亦被揪起，在YouTube頻道下架處理。事件連日發酵，冼靖峰於1月27日在同一頻道再次開Live演唱，今次的成員除了有緋聞女友詹天文外，其餘嘉賓則換上姚焯菲（Chantel）、鍾柔美（Yumi）和何智樂（Rock）。到直播的尾聲，冼靖峰一臉凝重說：「想講聲對唔住，因為上一個Live講咗啲唔應該講嘅說話，因為我哋學員之前有時講嘢私下會有啲誇張，但係有啲嘢唔應該講就唔應該講，好對唔住！講咗啲唔應該講嘅說話，知道自己唔夠成熟，以後談吐舉止會更加成熟。」

無綫「後生仔」屢因沙士惹禍

無綫藝人因03年沙士惹禍已非首次，2020年初，陸浩明竟然表示2003年「香港係沙士病毒嘅源頭」，如此嚴重失實的說法，就連拍檔馮盈盈都即時糾正，節目出街後，觀眾蜂擁作出投訴。事件爆發後的星期一，陸浩明入廠錄影新節目，終於公開露面，他在記者面前鄭重道歉，並「朗誦」出沙士的正確史實，提到事件令媽咪擔心時，他就爆喊了：

在2003年已經二十出頭的陸浩明，最後終於能正確讀出「病毒源頭並非香港」，他表示要向大家深深致歉及講對唔住，並承諾自己處理節目內容會更加審慎，提到網民的強烈反應令到自己受狙擊，當時他表示自己兩晚都瞓唔著，事情更波及母親的情緒，說到這裡就忍唔哽咽並落淚。

3HK出聲明割席

2021年8月，冼靖峰曾聯同一眾聲夢學員出席3HK公司活動，不少網民都誤會他有份代言3HK，正當大家群情洶湧想「罷用3｣之前，1月28日3HK公司於官方facebook發表聲明，澄清冼靖峰並非其公司代言人，「他只是連同其他藝人出席過一次本公司的活動，其言論與本公司絕無關係。」更表示會保留一切追究相關影響商譽損失的權利。雖然聲明下方的留言位置依然有不少人繼續鬧冼靖峰，不過亦有不少網民表示「不知冼靖峰」是誰，認為3HK今次的聲明多此一舉。

再發長文正式道歉

事件發酵幾日，冼靖峰於1月29日再次就「沙士死剩種」言論道歉，於IG發聲明表示經過連日反省深知自己的錯失，同時亦收到父母及公司的嚴厲訓斥。另外又向連日來對他批評的網民表示感謝等等。