美麗戰場｜「御用阿媽」程可為今次要做65歲杜燕歌阿媽 被批勁有違和感

《美麗戰場》程可為 要戴假髮扮老

程可為入行已有50年，雖然一直單身未做過人阿媽，但近年卻成為TVB「御用阿媽」，多次演出慈母或霸氣的阿媽角色，都入型入格，近日她在TVB新劇《美麗戰場》中，更升級做女主角阿嫲，但飾演她兒子一角卻是已年屆65歲的杜燕歌，兩人實際年齡只相差約6歲，程可為要戴上灰色假髮扮老。

網民：夾硬要人扮老太婆

網民對這對「母子」都拒絕收貨，紛紛表示：「夾硬要人扮老太婆，一啲都唔似」、「似夫婦多啲」、「似兄妹或姐弟」、「好明顯係導演選角問題」、「搵杜燕歌做老豆角色好似怪怪哋，雖然可以老來得女」、「係有啲奇怪」、「勁有違和感」、「完全唔似母子」、「杜燕歌65歲但外型似70多，佢演陳瀅阿爺就差不多！」等等。

TVB父母子女差距最細另有其人

男演員好多時就愈成熟愈吃香，女演員開始上年紀，戲路就好似愈嚟愈窄，往往只有向「媽媽級」進發，就算現實中冇可能生得出咁大個仔，本住專業精神，都要盡力做好台戲！以下呢7位熟齡女星，既係好戲之人，亦都係專業嘅好演員！

惠英紅 陳小春 （相差6年）- 2007年《鐵咀銀牙》

呢部08年出街嘅古裝劇，係惠英紅同陳小春喺電視螢幕上嘅首次合作。陳小春飾演狀王陳夢吉，而小紅姐就飾演陳夢吉嘅娘親潘白鳳。同劇演員仲有視后級嘅佘詩曼，同謝天華、元華等。

現實中，小紅姐係1960年出世，而陳小春就係1967年，二人年紀只係相差6年。喺個劇拍攝中嘅時候，小紅姐都曾經有表示過「委屈」，話自己生唔出咁大個仔！

1999年，小紅姐拍《創世紀》嗰陣，係飾演馬德鐘嘅太太，而馬德鐘只係細陳小春一年。

估唔到8年之後，已經「升級」做陳小春阿媽！

商天娥 郭晉安（相差兩年做母子）《隔世追兇》

1964年出世嘅郭晉安，出晒名有張童顏，做咗幾廿年男一，做過佢媽媽嘅女演員都唔少！但係「媽媽」嘅實際年齡，就同佢愈來愈相近！最最最離譜嘅，就係2004年嘅《隔世追兇》，1962年出生，只係大郭晉安兩年嘅商天娥，就喺劇中飾演佢媽媽！

雖然個劇情係講安仔可以用一部舊手提電話，同20年前嘅爸爸溝通，合作破案，娥姐都會喺20年前，同20年後出現，但係要飾演細自己兩年嘅安仔嘅媽媽，呢個心理關口應該都唔易過！

盧宛茵 郭晉安（相差11年兩度做母子）《戇夫成龍》＋《阿旺新傳》

盧宛茵喺80年代尾復出之後，就一直開始做「媽媽級」嘅角色。2002年嘅《戇夫成龍》同2005年嘅《阿旺新傳》，盧宛茵都係飾演阿旺嘅媽媽！

實際上，盧宛茵係1953年出世，今年65歲，比起今年54歲嘅郭晉安，只係大11年⋯⋯ 差距唔算好誇張，但係都係生唔出咁大個仔啦！

韓馬利 郭晉安 （相差10做母子）《創世紀》

1999年嘅《創世紀》，有成百集，支線極多，演員都用得好盡吓！三大男主角之一，飾演馬志強嘅郭晉安，就有羅樂林同韓馬利飾演佢父母！

Mary姐係1954年出世，今年64歲，大過安仔10年，拍埋真係似家姐多過阿媽啦！

苑瓊丹 陳浩民（相差6年）《封神榜》

呢部2000年嘅《封神榜》，應該係好多8-90後心目中嘅經典，尤其係殷十娘同哪吒呢段母子情，實在令觀眾流咗唔少眼淚。

苑瓊丹喺劇中表現突破，有別過往純搞笑嘅演出。

現實中，陳浩民雖然都有一張童顏，但係1969年出世嘅佢，與1963年出世嘅苑瓊丹，只係相差6年！不過兩個人合作絕對擦出唔少火花，默契十足！

劇中殷十娘仲有金吒、木吒兩個仔，飾演金吒嘅鄧兆尊，只係細苑瓊丹4年！

朱咪咪 歐陽振華（相差5年）《醉打金枝》

朱咪咪同歐陽振華呢個組合，當年真係老是常出現！1997年嘅《醉打金枝》，二人首次演兩母子，不過佢哋實質只係相差5歲。

過兩年佢哋再合作拍《陀槍師姐》，咪咪姐就變咗歐陽振華大嫂喇！

薛家燕 呂良偉（相差7年）《富貴門》

家燕媽媽做「媽媽」當然好合理！出道逾60年嘅家燕媽媽，今年68歲，8歲就出嚟打滾！2009年嘅《富貴門》家燕姐就要做呂良偉同袁詠儀媽媽。但係呂良偉其實只係細家燕姐7年，聽佢口口聲聲嗌家燕姐做阿媽，都咪話冇違和感啦！