美麗戰場｜大結局7大必睇焦點：蔣家旻終極大反撲！陳瀅眾叛親離

《美麗戰場》結局7大必睇焦點

1.陳曉華被丁子朗報復慘死

陳瀅早已劇透過《美麗戰場》的大結局不會是Happy Ending，其中陳曉華飾演的林小美被程裕進（丁子朗飾）狠飛，好友李靜兒（劉佩玥飾）即搵哥哥手下斬傷程裕進，令他變成潦倒乞丐，衰到貼地後再與林小美重遇，原來這場重遇係由鍾家寶（陳瀅飾）所設計，有指程裕進將會為報復殺死小美！

2.陳瀅眾叛親離

劉佩玥劇中鬧爆陳瀅「你以為得到咗所有嘢，其實係失去所有嘢！」而陳瀅亦曾劇透指「阿寶」身邊最後只剩返一隻狗陪伴，導演葉念琛就話「阿寶」全面黑化後，會顯露出她比起「反骨琪」更加陰險的一面，因此搞到眾叛親離，失去了所有友情、愛情，而這個是她自己選擇所導致的結果。

3.Bob對戰姜大衛

劉佩玥跟Bob這一對，有機會係全劇唯一獲得Happy Ending的CP，劇中劉佩玥跟陳瀅決裂後，變得一無所有。Bob無懼對上要打壓劉佩玥的姜大衛，對他說：「你咁樣對付一個女人仔，好似唔係好公道！」並提出要聘用劉佩玥出任他旗下珠寶集團的公關主管，令劉佩玥大受感動，最終兩人關係得以升級。

4.蔣家旻回歸

「反骨琪」蔣家旻將在大結局最後十分鐘回歸，對陳瀅展開報復，有網民推測她會殺死剩下的所有人，包括陳瀅、劉佩玥甚至阿Bob等，但這個猜測被蔣家旻推翻，她指自己無拍過「團滅」所有人的戲，葉導亦曾指出「反骨琪」會惡人有惡報。

5.朱晨麗先係終極大Boss

原來朱晨麗先係Final Boss！有指在𠱁得方力申與陳瀅離婚，並合作奪得各自父母的家產後，朱晨麗終於露出真面目，吞併了「龐氏」，令方力申變得一無所有！

6.方力申失蹤無下文！

方力申被朱晨麗反咬後失去了一切，於是頭耷耷向陳瀅認錯，想挽回陳瀅，但劇集一開始時已預告過方力申在遊艇上不知所措的一幕，遊艇上的環境更疑似案發現場一樣，有網民猜測方力申在遊艇上意外殺死朱晨麗，之後更為逃避罪責而玩失蹤。

7.陳山聰被捧攞視帝

患上了腦退化症的陳山聰，有指到大結局早已不在人世，但之前他和陳瀅種種對恃，以及被換藥當眾失禁等戲份，都大有發揮，網民都力撐他攞硬視帝，紛紛大讚：「一言sir演技一流」、「陳山聰演技好有張力，今屆視帝不二之選！」、「陳山聰演得好出色好震撼」、「一言Sir最搶戲！由頭帶到尾」等等。

網民都話得20集太短！

下一頁：《美麗戰場》開續集改咩名好？網民爆笑提名《池美麗戰場》

TVB 安排《美麗戰場》演員圍埋睇結局 起哄叫葉念琛開續集

台慶劇《美麗戰場》今晚播出大結局，一眾演員約埋去阿Bob屋企食飯兼睇電視，呢套劇播出以嚟，話題不絕，引起網民熱論，再次掀起煲劇潮，究竟邊個係終極受害者，今晚嚟個了斷！

TVB娛樂新聞台獨家搵到「徐富貴」林盛斌(Bob)喺播出劇集之前，率先訪問眾演員，Bob更爆男女主角方力申及陳瀅遲到。「反骨琪」蔣家旻期待出現，同時多謝大家支持，阿Bob問到阿Moon因20億被朋友出賣，阿Moon笑言：「正常嘅，20億揀我，我都覺得你要醒少少，不過係傷心嘅，不過20億，睇到一個朋友真面目好抵。」

張馳豪(Aska)被問同陳瀅合作有冇觸電，Aska承認有觸電感覺：「設施有啲簡陋隨時漏電，有跳番出嚟。」而演霸氣千金嘅朱晨麗則笑係演自己，當眾人起哄叫導演開續集，導演葉念琛將個波交畀曾志偉，叫大家問志偉畀唔畀開續集。

今集逐一披露蛛絲馬跡，揭出Big Boss嘅終極陰謀……「阿寶」陳瀅喺噚晚播嗰集，講佢為咗20億出賣好姊妹「靜兒」劉佩玥，斥其做假新聞，今集阿寶與靜兒攤牌，姊妹情正式決裂，靜兒變得一無所有，徐富貴請佢出任旗下珠寶集團公關主管，「小美」陳曉華甫落機得知靜兒出事，即同趕去搵靜兒，更為其安排去澳洲「避風頭」，遠離是非地。

估唔到阿寶害完好姊妹靜兒，更將魔爪伸向另一好姊妹「小美」陳曉華，已為人妻嘅阿寶對舊愛家明一直執迷，對小美與家明曖昧，心生妒忌，唆擺「程裕進」動殺機，搞到小美慘死。 朱晨麗雖然勾引「宇少」方力申，原來同宇少老竇「龐國棟」姜大衞有路，認真估唔到係咁，宇少發現此事後，突然人間蒸發，阿寶離婚幾年後，得知前夫宇少失蹤，突然有不祥之兆，呆呆坐喺化妝間回想昔日點滴，前夫宇少忽然打畀佢，阿寶衝出門口，出嚟即撞到死敵「反骨琪」蔣家旻以一身華麗低胸造型回歸，為劇情埋下伏筆！（資料來源：無綫娛樂新聞台）