網民嚴選10大最Nice藝人！周潤發最親民 羅蘭被公認最有禮

網民嚴選10大最Nice藝人

10. 黃德斌做Gym睇得出人品

近年憑《大叔的愛》搖身一變成為癡情可愛大叔嘅黃德斌獲網民大讚有禮貌，除咗會親切提網民過馬路唔好玩電話之外，仲有網民話從佢做Gym就睇得出佢人品好：「佢好好，佢係我喺gym第一個遇到用完每部機都會抹左先行開嘅人」。

9. 尹光有台風冇架子

近排因為「AI尹光」而成為網民新寵兒嘅尹光，有網民話多年前曾經睇過尹光演出，大讚佢有台風又冇架子：「讀U嗰陣，有次千人宴佢嚟咗唱歌，有台風、冇架子之餘，仲叫我地唔好吸毒」。

8. 孫佳君買鞋畀路人

出身新加坡的孫佳君在95年憑演出周星馳電影《百變星君》走紅，一躍成為香港90年代性感女星代表，但02年被羅兆輝公開濕吻照後形象一直麻麻。不過就有網民分享孫佳君曾經喺自己高踭鞋斷踭時出手幫忙，仲買一對新鞋送畀自己，唔少網民都表示對孫佳君改觀。

7. 徐濠縈經常黑口黑面都上榜

平時黑口黑面，一副生人勿近咁款嘅徐濠縈都竟然榜上有名。有網民表示雖然徐濠縈經常黑口黑面，但其實好好人，仲話佢唔會為賺錢而呃粉絲錢：「唔好睇佢唔笑成日黑面咁，果時中二去佢搞嘅賣二手名星衫嘅店，有班sammi fans(都係中學生)想買sammi 衫，佢勸佢地唔好買(不是睇唔起嘅態度，而係叫佢地留番D錢)，因為真係好貴」、「 佢唔會為左賺錢而（略）D fans水，我覺得佢真心搞時裝，知道班fans想買佢都唔想佢地哂錢」。

6. 陳慧琳勁Nice冇架子

陳慧琳人品好又Nice都唔係新鮮事，唔少網民都分享自己親身經歷嘅事例，大讚Kelly夠親民又冇架子：「係cwb（銅鑼灣）撞過佢，佢係商廈落黎同助手一齊，行過啲人望住佢，佢主動同路人say hello」、「陳慧琳仲要係好風趣，識得講吓笑。係完全冇諗過一個咁嘅當紅藝人佢會主動講笑咁幽默，當時仲要係2000年頭，剛剛佢最火紅嗰個狀態。」等。

5. 黃家駒有耐性最錫Fans

唔少網民都表示家駒生前超Nice又錫歌迷，仲話能夠從家駒的作品紅睇得出佢人品好：「家駒簽完名想遞返本薄俾我果時，因當時太多人，我被人群迫到移咗位， 但家駒好有耐性和親切咁，在人海中碌大雙眼誓要搵返我」、「出生草根，白田邨成長，受過人氣，磨練中成長，待人處事，家駒受歡迎係有理由的」。

4. 羅蘭被公認最有禮

羅蘭畀人形象一直正面親民，今次多位網民都有留言分享羅蘭姐嘅親民事跡：「見過好多次佢係公司出面個巴士站等巴士，我有叫下佢，同佢say hi，佢又好有禮貌咁同我微笑點頭，之後上車前仲同我揮手拜拜」、「同佢一齊做嘢，客客氣氣，完全冇大明星架子。仲同我傾偈」、「我都撞過佢，佢講野真係好溫文爾雅，好有修養」。

3. 任賢齊主動打招呼仲超好笑容

唔少網民都指曾經去台灣旅行時曾經偶遇過台灣好好先生任賢齊，仲話對方會主動打招呼，又有禮貌，對孕婦都特別Nice：「任賢齊係會主動同人打招呼」、「任賢齊真係好nice，廿年前同屋企人去台灣玩跟團， 佢應該係拍緊綜藝，見到大家有say hi，仲要講廣東話， 好深印象呀」、「果時同我懷孕的太太住喺台灣，喺餐廳度撞到佢，佢完全無架子，輕輕咁掂一下我太太個肚（有禮貌地），仲好開心咁恭喜我同太太添」。

2. 陳豪獲讚高大又有風度

當年曾經係萬眾香港女生夢中情人嘅陳豪當然都榜上有名，多位網民都話曾經喺街上偶遇陳豪，對方除咗會主動打招呼之外，對網民合照嘅要求絕無托手掙，相反太太陳茵媺就經常黑面，兩人落差甚大：「 以前去美食節見過佢，見佢拍緊咖啡廣告，拍完離開迎面經過見到我，我點頭同佢微笑，佢都一樣點頭微笑回復。」、「陳豪，中學時期係超市見過佢，好大方同我地影相」、「陳豪。當年住同一個屋苑，經常撞到佢佢見到人都經常打招呼」等。

1. 周潤發對市民要求有求必應

要數香港演藝圈最親民嘅明星就一定係周潤發發哥，網民都話每次見到發哥，對方都一定超好笑容，粉絲們上前要求合照或攞簽名都有求必應，榜首之位絕對當之無愧：「十幾年前見到佢同太太坐地鐵，好多fans埋去同佢影相攞簽名，佢有求必應」、發哥真係完全無架子。熄機後就可以和其他幕後職員有講有笑。」、「發哥…超級超級好….試過全家在佐敦街頭遇見，當時佢揸機影完相之後望一望，然後佢話呢張影唔到你個仔喎，再影過」、「發哥啦，我十歲個陣海灘見到佢，真係同見到一個老街坊無分別 談吐貼地，零架子」。