梁嘉琪、林秀怡因表態被雪！細數過往曾被雪藏的藝人

原文刊於《東方新地》

李佳芯

去年中選舉前夕因為出po時間敏感立場不清，佳芯BB慘被部分網民鬧爆又標籤，無綫為免事件再升溫焗住放李佳芯入雪櫃先。連大紅劇集《 BB來了》、《白色強人》添食拍第二輯，都要易角搵岑麗香頂上。雪足一年，隨著《殺手》播出正式解凍。

梁嘉琪

做足六年《學是學非》主持，去年六月因為喺IG表態被無綫飛出主持群，當時梁嘉琪其實澄清依然有廣告接，有旅遊節目出埠拍緊。不過今年初，都係低調離巢，現時創立自家品牌開網店賣裙。

林秀怡

又係去年反修例期間表態，林秀怡都知自己出事，表明「 會有一排見唔到我 」，連新劇《 12傳說 》宣傳都一概不獲安排出席，再被調離主持六年嘅音樂節目《 樂勢力 》，雪足一年今年中終於重見天日，仲有得做《我要做業主》節目主持，兼拍喜劇《欺詐劇團》。

黃心穎

去年四月驚爆安心偷食醜聞，時為馬國明女友又在的士主動擒啜人夫許志安，一夜之間黃心穎成為全民公敵，原訂出街劇集一概被抽起，重頭劇《 法證先鋒 IV 》所有戲份亦要重拍並由湯洛雯替補。出完道歉po後出走美國潛水半年，黃心穎回港後領養唐狗又湊姨甥博洗底。雖然倉底劇慢慢安排播出，不過不檢點形象深入民心，盛傳將被解約。

田蕊妮

視后田蕊妮曾出 po 暗寸特首，被內地網民鬧爆，直接影響去年首播的劇集《她她她的少女時代 》內地宣傳和收視。點知其後田蕊妮宣布放自己一個長假，而《 她她她的少女時代 》亦真係成為阿田喺無綫嘅告別作，今年初阿田正式宣布約滿不再與無綫續約。

朱智賢

今年四月被爆背住男友謝東閔勾搭人夫黎振燁，雖然開晒記招認晒錯，都係被無綫放入雪櫃，閒置期間不時行山做運動度日。今年11月，本來有傳解凍有機會復出《東張西望》主持，結果都係落空。不過有份演出嘅《踩過界2》大hit，《愛美麗狂想曲》又安排喺收費台播出，疑似漸漸解凍。

黎振燁

朱智賢有望解凍之際，事件男主角黎振燁就冇咁好彩。背住大肚八個月妻子偷食朱智賢，黎振燁醜聞爆煲後即被飛出《 東張西望 》，最近有傳將與黃心穎同步喺兩個月內被解約。

黃子恆

16年疑似介入裕美婚姻已經小試雪櫃滋味，18年黄子恆又出事，被內地女粉絲公開數臭搞出人命，人家陀住四個月肚點知男方就玩失蹤。之後終於蒲頭認同粉絲發生過關係，不過就話做足安全措施，自己並非經手人！黃子恆事後都被無綫雪藏足足一年，直至今年四月《 機場特警 》播映終告解凍。

沈震軒

早前深夜重播嘅《 使徒行者 》提醒大家，沈震軒當年其實劇接劇備受無綫重用，17年因為續約問題難達共識，最終都被掉入雪櫃，不過地球係圓嘅，今年沈震軒轉投邵氏旗下，亦都宣布與無綫重啟合作關係，早前孖張智霖、王浩信、高海寧等人上北京宣傳《 非凡三俠 》。