40歲吳浩康演《社內相親》劇中劇男主角有驚喜 為養家身兼多職做埋地盤工人

吳浩康做地盤一日9個鐘

近日吳浩康突然在IG分享自己做地盤時點滴，慨歎「近排日頭返工好似郊遊咁遠」，並透露自己每天6:15-6:30左右出門口，一日工作9小時。從影片所見，他一早就逼地鐵轉小巴到淺水灣地盤開工，穿上工人服的他戴上安全帽、綁上安全帶，雖然工作辛苦，但他依然活得樂觀面露笑容，還一邊欣賞日落的景致：「每日放工都係望住呢個景，令我可以喺繁複、無聊、刻板嘅工作後抖番啖氣。」

吳浩康強調唔係轉行

被網民質疑是否退出娛樂圈正式轉行，吳浩康表示現時日頭返工夜晚教唱歌：「有幕前工作可以直接搵我，我係做多份工，唔係轉行，未離巢已經做緊㗎啦。返新工同離巢無關，唔係轉行。」吳浩康還透露，自從兒子出生後，他為了生計決定考取「平安卡」（建造業安全訓練證書），同時兼顧教唱歌、演出和拍戲的工作，獲網民表示尊重兼佩服！

吳浩康做《社內相親》劇中劇男主角

ViuTV改編劇集《社內相親》中，羅家英飾演的爺爺「姜德權」在劇中非常喜歡煲一套名為《奮鬥吧！美玲》的劇集，劇中還有非常多《奮鬥吧！美玲》的畫面，而吳浩康正正就是該套劇中劇的男主角「何富全」，與女主角「孫美玲」有不少談情說愛的畫面，非常搶鏡。

吳浩康演技大爆發

吳浩康雖然只是在劇中劇《奮鬥吧！美玲》中出現，但其實他飾演的CEO「何富全」好有發揮機會，他在劇中有一幕帶女主角去買衫，更豪言對方想買咩就買咩，最霸氣的一幕，莫過於他向店員講「你仲有咩衫係有樹嘅，同我攞晒出嚟，門口嗰棵樹我要埋佢嚟襯衫！」然後就拿出一疊錢灑出來，認真豪氣！