真人騷要求為愛犬磨牙 《微微一笑很傾城》鄭爽被轟無腦

原文刊於《東方新地》

近年在國內爆紅的花旦鄭爽，頻頻上真人騷節目，人氣一時無兩。

嫌牙齒太鋒利

鄭爽人愈紅愈惹火，憑演出偶像劇《微微一笑很傾城》人氣飆漲，擁有甜美外表吸引大批粉絲喜愛，不過亦因率直個性，經常講多錯多。日前上國內真人騷節目，竟然因為覺得愛犬枸杞牙齒太過鋒利，突然忽發奇想帶住枸杞去寵物店，仲要求店員幫忙將枸杞牙齒磨一磨，男主持即場眼都凸，問鄭爽「你在開玩笑嗎？」

可能見大家都好驚訝，鄭爽連番解釋自己好怕被狗咬，母親喺社交網睇到人哋啲狗特別乖，可以隨便放隻手入狗口玩，唯獨枸杞特別惡，佢仲無辜表示：「給狗狗磨牙是因為我媽說很羨慕，那些刷短視頻的時候，把那個手伸到寵物嘴裡的那些視頻，然後就說別人家的狗為什麼都那麼乖？妳們家的狗為什麼這麼兇？所以我就希望枸杞得到爸媽的喜歡吧！」

為討好父母

鄭爽嘅磨牙言論引來軒然大波，網友好快就群起圍攻大罵佢「無知識」、「無愛心」，不少人認為主動要求為狗磨平牙齒簡直是一種虐待，是不人道的做法，覺得鄭爽好自私，仲將個負責推落父母身上，話只係想幫愛犬討好父母。但亦有少量網友幫佢講好說話，話鄭爽只是詢問，冇真係執行，唔需要太認真看待。睇嚟鄭爽都要汲取教訓，樣靚唔係大晒㗎！以後都要小心言行。

其實當年鄭俊弘(Fred)被爆移情別戀何雁詩，狠撇圈外未婚妻Beebs，搞到形象破產入埋雪櫃，解凍後又因為放狗用倒釘帶激怒全體動物保護團體及一眾狗奴，搞到畀人抨擊。而前星夢同事許廷鏗即在社交網絡上載三色拆彈錶照，晒錶暗寸鄭俊弘，同門六年、爭寵鬥足六年，宿敵又惹事生非，仲唔抽水等幾時？

許廷鏗 明寸宿敵鄭俊弘

先係被揭一腳踏兩船，棄未婚妻得罪全港女人、再為咗一條釘帶激嬲全港狗奴，全盛時期嘅鄭俊弘到底可以得失幾多人？當年一則鄭俊弘及女友何雁詩放狗放到要用釘帶、又疑似有棄養意願的報道出街後，剛剛逃離雪櫃的鄭俊弘再次成為負面新聞嘅男主角。原來除了得罪女人同狗奴，鄭俊弘更是昔日星夢同門許廷鏗的眼中釘。

為虐狗疑雲解話

其實鄭俊弘當年為撻著何雁詩，而搞到大話連篇又抛棄拍拖三年未婚妻，鄭俊弘已經搞到形象跌落谷底，再惹虐狗疑雲，二人事後嗱嗱聲發表英文千字文申明自己有幾愛Reily。

爭寵不成嬲到離巢

《超級巨聲》出身、理所當然要加入電視台姊妹唱片公司星煥(星夢前身)，自己人捧自己人、唱埋自家主題曲再橫掃自己台勁歌金曲獎本來是常識。不過出道六年、效力星夢六年，許廷鏗當年卻失驚無神轉投華納旗下，據知情人士透露，無論長線積怨定短線導火線，都係因為鄭俊弘：「Alfred(許廷鏗)一直以嚟負面新聞少啲、啲歌又hit啲，一直覺得自己應該係星夢一 哥，但近年公司資源擺明放晒喺Fred度，所以佢條氣一直唔順。直到鄭俊弘一腳踏兩船仲連老闆都呃埋一份，有人覺得眼中釘今次實走唔甩，點知話雪又唔雪得晒，Alfred趁住約滿索性走人囉！」頂住條氣離巢，今次宿敵搞出大頭佛當日，即晒三色拆彈錶呢個世界邊有咁多巧合？

何父嫌棄

鄭俊弘做電視台二打六，捱足十年至因為《 星夢傳奇 》彈起。其實佢未紅時相安無事，一出名即刻是非纏身未安寧過。因為接連傳出搭上有錢女、分手又次次都不和平，再加上同何雁詩撻著時累到愛女變第三者，據悉相戀頭半年，連何父都對鄭俊弘諸多不滿，不屑與Fred見面聯誼、更谷愛女重操golf意圖疏遠對方。