蔡卓妍自製意粉有板有眼 湯怡、陳嘉寶變包點大師！疫境下女星個個變宅女廚神

原文刊於《東方新地》

蔡卓妍自製意粉有板有眼

一出道迅速走紅一日走幾場同時踩幾套戲，阿 Sa 不時抱怨入行頭十年忙到似場夢未能細味生活。今年初受疫情影響難得有個悠長假期可以做吓宅女，整餅焗包已經係小兒科，學師兄霆鋒玩埋自製意粉，仲有板有眼㖭！

龔嘉欣自製伯爵茶蛋糕

自稱一向西餐同西式點心唔係自己強項，龔嘉欣近月又上堂又自煮，借埋姊妹陳凱琳嘅蛋糕盤焗蛋糕，今年母親節都係自製伯爵茶蛋糕插埋鮮花送畀媽咪，有心思又有誠意。

湯怡鑽研埋「包」技

不嬲已經係甜品專家，呢個疫情搞到湯怡鑽研埋「 包 」技亦成為IG 健 身 女 神，邊焗包邊做運動一啲都唔會偷懶，所以焗幾多食幾多身材都唔會走樣。

陳嘉寶動物造型中式包點似模似樣

雖然結咗婚仲生埋女，不過陳嘉寶外形依然少女味，內心仲保持一顆少女心，幾個月來報讀廚藝班整包又整餅，尤其動物造型中式包點最似模似樣。

衛詩雅愈簡單愈考功夫

一向興趣多多又識食，衛詩雅本來有個 YouTubeChannel 叫「衛食攻略」教人捐窿捐罅搵好嘢食，月前疫情第三波殺到，冇得堂食索性自己煮，正所謂愈簡單愈考功夫，Michelle 呢味番茄炒蛋一定要試。

傅嘉莉教人整pizza

曾經專黐大叔生活奢華，近年傅嘉莉憑拍劇入屋生活都變得貼地，疫情期間更愛上煮食，整完靚過餅店嘅蛋撻後，最近又拍片一手一腳從搓麵團開始教人整pizza。

楊千嬅曾獲鄭中基稱讚娶得過

十幾年前參加 《美女廚房》做女時代嘅千嬅已經煮得兩味，獲舊愛鄭中基當眾稱讚娶得過，婚後做埋媽咪尤其近日工作少留家多，更經常喺IG晒廚藝，仲感染埋囝囝Torres對煮食嘅興趣。

陳凱琳中菜西餐加甜點

抗疫期間咁啱懷上第二胎，安全起見Grace留家安胎亦大把時間整嘢食，整中菜西餐之餘仲上埋堂學整蛋糕，早前又拜兩個仔嘅契爺黃智賢為師學整400次抹茶同抹茶鬆餅。

鄧卓殷開YouTube Channel教整麵包

18年 港 姐 亞 軍 鄧 卓殷唔止識煮，仲煮得健康又專業，開埋YouTube Channel教整冇糖冇油冇粉冇蛋嘅麵包、bagel 同蛋糕，就算日日煮日日食都唔怕肥。