炎明熹認未續約TVB 親解內地公司天價過檔：未到最後都唔知會點

炎明熹認仲未續約TVB

自從離巢的傳言一出，炎明熹疑隨即被TVB雪藏，現時就算出席活動都冇TVB記者到場採訪。對於今次拍住TVB視帝陳豪出活動都冇大台記者到場一事，炎明熹就笑稱可能係地點太遠同埋檔期問題，高EQ化解尷尬。而被問到與TVB的合約進展時，炎明熹就坦言仲未與TVB續約，目前仍在討論階段，而自己對於未來亦保持開放態度。炎明熹透露家人都唔知太多關於自己合約的問題，始終「呢個年紀會嘗試所有嘢都自己決定」，希望唔好令家人擔心，仲搞笑稱可能自己第時會去咗做空姐都話唔定。

炎明熹親解內地公司天價過檔傳聞

最近更有傳炎明熹被內地公司以天價邀請過檔，Gigi就表示自己都唔知有呢件事，不過就唔抗拒有新嘅發展。炎明熹亦坦言有唔同嘅發展其實都有好有壞，雖然依家都未知最後嘅發展係點，不過自己就咩都想去試吓，去發掘自己嘅潛能。

炎明熹變觀眾睇After Class 3缺1演唱會

早前TVB就播出炎明熹的演唱會，不過就僅有一小時的播出時間，令唔少觀眾都認為係「趁未離巢趕住出埋」。炎明熹就表示係公司嘅決定，自己都尊重同理解。而對於姚焯菲、鍾柔美和詹天文將於今明2日（19及20日）開騷，炎明熹就稱希望有機會可以到場欣賞，對於3缺1開騷一事表現大方。