33歲湯怡嫁麥秋成兼升呢準媽媽 依足傳統過大禮 大肚被勒令唔准郁

文：東方新地 ｜ 圖：湯怡IG、麥秋成IG

湯怡上月尾在IG公布喜訊透露即將為人妻人母，而另一半是金牌排舞師麥秋成，二人分別在IG留上致對方的愛的宣言以公布喜訊，圈中好友紛紛留言恭喜，而湯怡舊愛洪卓立亦大方送上祝福﹗一對新人公布雙喜臨門後隨即入紙申請註冊結婚，依足傳媒昨日（9日）舉行過大禮儀式。

重量級「流星錘」龍鳳鈪好耀眼

湯怡和麥秋成依足傳統進行過大禮儀式，身穿紅衣湯怡站在堆積如山的禮品，相當大堆頭，包括有瑤柱花菇、大筒花膠、三對龍鳳鈪、金豬牌、金飾、中式禮餅、巨型生果籃、紅酒、椰子等，多到一張大枱都擺唔晒。陀住牛B的湯怡，家人對她悉心照顧，不讓粗身大細的她太操勞，湯怡笑言：「我都係坐喺度㗎咋，哈哈，冇人夠膽畀我做嘢，呢段時間大家都係當我一個公主咁對待。再加上秋明（麥秋成弟弟）係wedding planner，所以好多嘢都係佢幫我哋manage。」可以舒舒服服做個待嫁新娘。

大肚湯怡睇定坐月食療

湯怡提到陀B的身體狀況時說：「我覺得呢個感覺好奇妙，自己都好興奮，暫時未緊張，反而會同啲朋友，或者家姐傾吓生完之後BB之後會點，好多知識依家吸收緊。同埋都睇好多媽媽書，譬如坐月嘅時候應該食啲乜？懷孕期身體上會有啲乜嘢變化？同埋會補充好多supplement，希望可以有足夠嘅營養俾BB。」

致 麥秋成
曾經擦身而過的我倆
能夠走在一起 是緣份
現在能守在一起 是福份
謝謝你的光臨
完整美滿了我的人生
亦充滿甜蜜 色彩與歡樂
餘生 請多多指教

湯怡公布下月舉行婚禮

湯怡回應婚訊時表示：「同麥秋成認識咗一段日子，亦相處咗一段日子，因為大家都比較低調，所以除咗屋企人，我哋都冇特別同其他人分享呢件事。將喜訊同大家分享之後今日就會入紙排期註冊。下個月會有個簡單嘅婚禮，因為限聚令，所以邀請唔到太多人出席。疫情過後會補辦婚宴。其他嘢都唔再特別回應，多謝各位傳媒朋友關心。」而舊愛洪卓立大方送上祝福：「作為好朋友，當然恭喜同戥佢開心。祝福兩位幸福快樂！身體健康！」

麥秋成愛的宣言：「我們曾經多次相遇﹗」

湯怡和麥秋成表示二人曾多次相遇，緣份卻擦身而過，最後走在一起，麥秋公開多謝湯怡：「妳的愛，讓我感到無心幸福﹗」

宣傳《反黑路人甲》爆有新朋友了解中

《反黑路人甲》湯怡單身兩年，去年密密為她有份主演的無綫劇《反黑路人甲》四出宣傳，她透露有朋友為她介紹對象，她笑言：「依家我未有時間拍拖，只係同對方認識中，唔會為咗想拍拖而拍。」湯怡笑指經常被人問她平時點減肥 Keep Fit，於是決定公開自己的一星期減肥餐單，她說：「 其實我無刻意去減嘅，不過飲食方面我會控制一下，每日只食8個鐘，多菜少肉少澱粉，如果配合埋運動就更好喇！」

馬甲線搶閘而出 fit爆湯怡下廚切洋蔥

湯怡有份主演的電影《死因無可疑》去年大收，力壓中外猛片成票房冠軍，心情大靚嘅佢，早前就化身美女廚神大展身手，一心諗住同大家分享吓切洋蔥心得，不過著住短衫仔嘅佢，就不經意展示咗爆肌身形，大家都畀佢腰間嘅馬甲線吸引住，就連蔣家旻、江嘉敏都爭住𥄫！對女神爆肌身形好羡慕！

出名鍾意運動嘅湯怡，經常在IG分享做Gym、跑步、行山健美照片，之前教大家如何操fit更吸納到大批粉絲支持，女神一身爆肌身形，令人羨慕不已！早前， 湯怡下廚煮嘢食，只係切個洋蔥諗住騷吓廚藝，佢留言話：「好多人都好怕切洋蔥，切粒覺得麻煩，仲會切到流哂眼水，咁唯有犧牲我自己幫大家切喇，唔，原本企喺我隔離果啲一早行到無雷公咁遠，但見我切到笑哂口，就知無事啦，傻嘅有竅門嫁喇，係估唔到自己切到爆哂青筋姐。」

原先想教大家切洋蔥心得，但就不經意展示fit爆身形，腰間的馬甲線搶閘而出非常吸睛，搞到一班網民暈晒大浪！勁讚佢fit爆，就連蔣家旻、江嘉敏都忍唔住𥄫多兩眼即刻留言，蔣家旻就話：「重點係爆腹肌！」而江嘉敏更直指話「錯重點了！」真係切個洋蔥都搶眼過人!