【港姐2019】女大十八變！回顧17位歷屆港姐面試造型

撰文：Evita ｜圖片：東星娛樂、Instagram

回顧17位歷屆港姐面試造型

1. 葉翠翠 （2005年冠軍）

當年葉翠翠參加港姐面試時睇落無咩精神，加上大紅玫瑰掛頸入膊吊帶衫比較顯老。

葉翠翠當年呢個鳥巢頭紅遍香港，網民都指：「萬萬不相信這是香港小姐冠軍！」

雖然現年37歲嘅翠翠育有兩個仔仔，但係睇落仲後生過參選當年。

2. 呂慧儀 (2006年季軍）

睇返啲相，有長腳蟹之稱嘅呂慧儀13年前同而家外表無咩分別。當年面試只係著牛仔褲，可能會比人感覺較隨便，不過最終都贏得季軍。

加入TVB後，長腳蟹一直都忙於拍攝電視劇，近年喺《愛回家之開心速遞》嘅演出更成功入屋！

3. 陳茵媺 （2006年冠軍）

陳茵媺（Amiee）2004年參加多倫多華裔小姐後，隔兩年就返香港參選港姐，五官標緻嘅佢帶點鬼妹仔風格，雖然當時面試只係著上普通黑衫牛仔褲，但係憑住出眾外表成功入圍。

2013年同陳豪結婚後，先後育有3名子女，做咗賢妻良母嘅Amiee除咗平時出席活動外都以素顏示人，就咁睇皮膚都仲幾白滑，完全唔似係3個子女之母！

4. 張秀文 (2010年亞軍）

擁有驕人身材嘅張秀文 (Sammi) 當年面試時就未有特別賣弄性感，雖然著上一條純白色Low Cut連身裙，但都不忘掛上淺色頸巾遮一遮心口。

入行後Sammi愈變愈靚，時不時喺社交平台同電視節目上大騷身材，更成為宅男女神。

5. 文凱玲（2010年參選）

晶女郎文凱玲（Connie）參選2010年香港小姐競選獲第8名，之後參演電影為主，有不少大膽演出！當年Connie面試著上粉色雪紡質地連身裙配黑色絲襪，感覺有啲大媽feel。不過而家嘅Connie就變成一個大眼靚女，而且好似識得逆齡生長咁，近年開始拍TVB劇後成功入屋！

6. 陳庭欣 （2010年冠軍）

陳庭欣（Toby）當年以直髮中分示人，著上一身青綠色孔雀圖案連身褲，勁有夏日渡假感覺。不過當年臉圓圓，有啲似日本通杜如風。

Toby個樣就無咩點變，比以前更識化妝同打扮，更增加一份女人味添。

7. 湯洛雯 (2012年參選）

湯洛雯（靚湯）2012年參選時獲得「旅遊大使獎」及「美麗昇華大使獎」兩個獎項，可惜外表甜美嘅佢最終六強止步。睇返當年面試嘅相，著上粉色斜膊連身短裙，大騷鎖骨同長腿，已經好有女神feel！

入行後嘅佢愈嚟愈靚，連佢自己都覺得同模特兒倪晨曦似樣添。

8. 朱千雪 (2012年季軍）

「千雪BB」絕對係近年最受網民歡迎嘅港姐！現時30歲嘅朱千雪參選2012年港姐競選，當年朱千雪面試時無懼素顏，不過手臂同臉珠就略為有肉地，但係憑住實力都成功入圍！

當年TVB首次推行一人一票選出港姐冠軍，千雪BB喺多方面民意調查支持度都拋離對手，可惜網上投票系統伺服器離奇地發生問題，千雪BB最終屈居第三。

千雪BB選港姐後加入無綫，參演過不少劇集，代表作《EU超時任務》大家一定睇過！千雪早年畢業於西門菲莎大學商業和傳理系，後來於香港中文大學攻讀企業傳播社會科學系碩士都仲未夠，再修讀香港城市大學法律博士學位！所以近來都慢慢淡出幕前，十分可惜！

9. 黃心穎 (2012年亞軍）

同朱千雪同屆嘅仲有黃心穎，當年參與時因為皮膚黝黑，被網民改花名做「黃賓穎」，又因為同草蜢成員蔡一智外貌相似，而被外界笑足咁多年。

獲選後，黃心穎比以前更識打扮，望落順眼咗，不過因為早前「安心偷食事件」遭全城狂罵，更指被TVB雪藏。

10. 陳凱琳 (2013年冠軍)

一直被外界誤以為係混血兒嘅陳凱琳五官分明，當年著上一條花花背心裙，畫上兩條「貓眼」眼線，盡顯外國狂野風格，又不失女性嘅溫柔特質。

今年榮升媽媽嘅陳凱琳未知係咪照顧BB太辛苦，瘦到塊臉比以前更尖，蘋果肌日漸突出。

11. 蔡思貝 (2013年亞軍)

昔日蔡思貝 （Sisley）皮膚黝黑，手臂顯露出「老鼠仔」，睇得出係一位平時鍾意玩戶外活動嘅人。

入行後因為工作需要而長期剪短頭髮，早期更被網民指激似KOL達哥同日本明星木村拓哉，不過短髮嘅Sisley睇落都幾有性格啊！

不過近年唔少網民都讚蔡思貝愈來愈靚，對佢改觀不少！

12. 麥明詩 (2015年冠軍)

「十優港姐」麥明詩 (Louisa）外貌唔算叫人驚艷，但勝在智慧搭夠，大方得體，當年面試後已經極速被網民起底，發現佢係傳統名校—女拔萃書院10A狀元，最後以大熱姿態奪得冠軍。

最近Lousia剪走一把長髮，中短髮造型更添新鮮感。

13. 馮盈盈（2016年冠軍）

馮盈盈（Crystal）當年有「港大甫士王」之稱，以一身純白背心網格連身裙面試，若隱若現增添神秘感。一頭淺啡色頭髮配上淺粉紅唇膏，非常大膽創新！

FYY個樣就無咩點變喇，但係因為喺有份主持嘅節目上經常有大膽言論，因此被封為「粗口港姐」同「MK妹」。

14. 何依婷 (2017年亞軍)

2017年港姐軍何依婷(Regina)，2017年面試時以白色露肩上衣配黑色裙示人，笑容甜美、舉止大方，都知佢絕對係入圍大熱！

Regina港姐決賽當日被TVB高層樂易玲點名大讚，之後勇奪亞軍，加入TVB後可算是一帆風順，先是成為人氣節目《學是學非》的「是非精」之一，之後又參演處女劇《機場特警》，相信愈來愈多機會跟觀眾見面！

15. 伍樂怡 (2017年最後5強)

有翻版李若彤之稱嘅伍樂怡（Kelly）以一身斯文上班Look面試，外脫標緻、身材高佻，在一眾參選者中相當突出！佢曾經透露自己鍾意戶外活動，所以擁有一身健康膚色。

可能因為距離參選時只係短短兩年，唔覺外表有太大改變，都係咁索！

16. 陳曉華 (2018年冠軍)

陳曉華 (Hera) 香港中文大學護理系畢業，去年面試時著上一身白色連身裙，真係好似白衣天使咁Pure！

17. 鄧卓殷 (2018年亞軍)

樣子甜美、嬌滴滴嘅鄧卓殷 (Amber) 去年面試時穿上一身黑色連身褲，簡約得嚟又帶點知性美。

事隔一年，樣就無咩點變喇，不過早排就被網民翻出讀書時期舊照，懷疑Amber選港姐前曾經整容，而Amber回應指：「只係矯正過牙齒。」

同場加映：

18. 簡淑兒 (2012年參選)

呢個係簡淑兒？無錯！簡淑兒2012年參選港姐時20強不入，事隔多年，搖身一變，變成有腰果電眼、楚楚可憐嘅宅男女神！近年唔少人都覺得佢樣貌改變好大，但簡淑兒多次力證自己無整容，只係話當年髮型及妝容出問題。

有無「調整」過，就各位自行判斷啦！