25歲港姐陳曉華焗做《迷網》女二 首次拍劇頻NG被插爆四宗罪

原文刊於《東方新地》

陳曉華首次拍劇做女二頻NG

今個TVB Amazing Summer，除了兩王一后重頭劇《殺手》，剛推出以網絡騙案做題材的《迷網》，除了再次合作的楊明與高海寧，還有現年25歲、18年雙料冠軍港姐陳曉華，首次拍劇便擔演女二，絕對Amazing，不過劇集播出不久，Hera演出已被網民狂插，除了彈她演技生硬兼口齒不清，更有網民狠批她的演出將整套劇拖垮，無法再睇下去云云，除了戲屎、口齒不清兩大宗罪，更有劇組爆料指Hera拍劇時完全唔識走位、無限NG，成了演員之大忌，兩面受敵，令受盡無綫力捧劇接劇的她，儼如一盆冷水照頭淋，難怪近日Hera在社交網狂呻，劇集播出令她心情非常緊張，像中學放榜瞓唔到覺。

陳曉華得寵監製爭住用

據知情者透露，因為網民大量負評，加上近日連拍兩部劇集《七公主》及《異搜記》，令陳曉華壓力爆煲經常失眠。「選完港姐冇 耐， 無綫已經傾Hera簽經理人約做親生女，機會咁難得，Hera不知幾開心，正因為條件好，好多監製都爭住用佢，仲套套劇都好重戲，好似播緊嘅《迷網》，第一次拍劇已經做女二，完全冇演出經驗嘅佢，攞到劇本其實好騰，拍攝初期，一個簡單鏡頭都成日走錯位， 不停NG，最慘係拖累全組人遲收工，令佢壓力更加大，依家套劇出街，佢好緊張外間反應，畀網民狂插，對佢嚟講真係好大打擊！」

俾網民狂插打殘

未知是否給負評打殘，日前拍完劇在電視城收工的她，全程表現沒精打采，她先在電視城Canteen 買了外賣，然後坐Uber返屋企，上樓前還在附近超市買了一盒鮮奶同麥片，由畀錢到行返上樓仍然冇厘神氣。就連「十優港姐」麥明詩，都因為經常被彈演技不濟而轉簽「綠葉約」走人，同樣有樣有學歷嘅陳曉華，真係要撐住！