暑期有好多卡通！ 海底奇兵 與其他5套必睇電影

1.憤怒鳥大電影（預計上映日期：2/6）

紅極一時嘅Angry Birds，由手機屏幕飛到嚟大銀幕，一眾粉絲們記得留意喇！今次躁底嘅Angry Bird Red，會聯同兩位朋友，一齊將一班「不速之豬」趕走，捍衛家園。劇情同手機遊戲好似，成件事即刻好親切！

憤怒鳥大電影 (The Angry Birds Movie)
上映日期：2/6/2016

2.蒸汽女孩與不死貓（預計上映日期：2/6）

大家未必聽過《蒸汽女孩與不死貓》呢套戲，但係其實佢係第40屆香港國際電影節嘅其中一套推介電影，電影講到世界上再無石油、煤氣、原子、電子等等能源物質，仍然停留喺蒸汽時代，帶出環保問題，爸爸媽媽可以藉此培養小朋對保護地球嘅意識。

蒸汽女孩與不死貓 (April and the Extraordinary World)
上映日期：2/6/2016

3. Pet Pet當家（預計上映日期：30/6）

對於有養寵物嘅筆者嚟講，《Pet Pet當家》係一套非常有趣嘅電影，因為可以想像到平時返工返學之後，到底屋企嘅毛孩會做d咩？而電影入面嘅毛孩，又因為要教返佢嘅老友，最後搞到要離家出走添！

Pet Pet當家(The Secret Life of Pets)
上映日期：30/6/2016

嚟到7月暑假正式開始，兩套大製作嘅續集輪流上映！當中更有闊別銀幕13年《海底奇兵》出嘅續集《海底奇兵2》！

4. 海底奇兵 2（預計上映日期：14/7）

呢次《 海底奇兵 2 》將會延續上一集嘅故事，當然唔少得Nemo、爸爸Marlin同埋失魂魚Dory啦。今次會同大家搵返Dory嘅過去，到底一條短暫失憶嘅失魂魚會有一個點樣嘅童年呢？13年前第一集上映嘅時候，筆者都仲係一個小學生，今次一定要入場回味一下自己同Nemo嘅童年！

海底奇兵2 (Finding Dory)
上映日期：14/7/2016

5. 冰河世紀－隕石撞地球（預計上映日期：28/7）

相比起《海底奇兵2》，《冰河世紀》系列已經出到第五集啦！當然唔少得次次都好出位嘅大配角松鼠仔啦，今次仲搞到隕石從天而降，闖晒大禍，搞到一班主角被逼大遷徙。《冰河世紀》已經算得上係長做長有系列，質素應該有返咁上下，粉絲們都係要繼續入場支持！

冰河世紀－隕石撞地球(Ice Age: Collision Course)
上映日期：28/7/2016

6.多啦A夢大電影－新·大雄的日本誕生（預計上映日期：4/8）

（其實筆者始終都係鍾意叫佢做叮噹多d）雖然香港配音嘅保全叔已經離開咗，但係一年一度嘅多啦A夢大電影都依然會喺香港上映，今次大雄再次離家出走，而身邊一班朋友亦因為不同原因同時出走，喺多啦A夢嘅幫助下，坐時光機返到7萬年前，仲幫光明族打敗黑暗族添！

多啦A夢大電影－新·大雄的日本誕生(Doraemon the Movie: Nobita and the Birth of Japan 2016)
上映日期：8月份