47歲泰臣效力10年離巢TVB 演機械人保安員入屋 提名男配不敵「爆肌小生」

泰臣效力10年宣布離巢TVB

47歲的泰臣不知不覺已經加入TVB十年，早前泰臣在個人社交平台發千字文，宣布本月正式離巢，並分享10年來於TVB的各種點滴。泰臣表示感激多位前輩和工作人員多年來的照顧，於6月開始將會踏入新的旅程。

泰臣離巢全文：

踏入6月我再次起步啦，用3分鐘嚟回顧晒自己𝐓𝐕𝐁 10年嘅點滴談可容易呢？無可能夠啦。

呢幾日掃手機，一路摷返每一個製作嘅相，一路𝐥𝐨𝐚𝐝返同每個相中人一齊經歷過嘅回憶⋯熱到顛嘅外景、凍到僵嘅廠、亢奮回魂嘅萬歲、廿人衝去轉妝嘅live騷、等到懷疑人生嘅大雨、要懷疑埋下一世嘅大over、集體眼瞓到唔知噏乜嘅台詞、好鬼認真嘅對戲、笑冧全組人嘅NG、飄飄然嘅大慶典、難得嘅碰杯⋯⋯仿彿一轉眼嘅事。

10個年頭，自問成熟咗，道理領略多咗，人與人關係深交咗，認識我嘅觀眾層闊咗，我相信我所得到嘅必定良多。點估到自細睇430新紮師兄季節大時代長大嘅(我指我老豆)，會見到個仔上台慶呢？呢個舞台界過界去電視嘅新人，有俾阿姐讚過算叫做威過下。

緣份下，得到好多機會、得到前輩提點引路、又有梳化服攝crew兄弟姊妹射住、更有戲裡戲外嘅拍擋同行、監製導演編審首領們獎門人嘅知遇之恩，超級感謝🙏🏻，唔識講認真嘢，所以，超級感謝🙏🏻🙏🏻。慶幸冇唔見過手機兼有俾錢養住個cloud，開心揾到呢批相，留住大家一齊笑嘅樣，笑聲有包埋，喺我記憶度，𝐌𝐲 𝐟𝐫𝐢𝐞𝐧𝐝𝐬, 𝐬𝐞𝐞 𝐲𝐨𝐮😘。

#tvb10
#踏入六月新旅程
#newjourney
#nextstage
#changeischallenging

出演多套劇集 演技精湛深受觀眾喜愛

原為舞台劇演員出身的泰臣，在2013年正式加入影視圈，拍攝過多套電影，包括《潮性辦公室》、《豪情3D》、《分手100次》等，在同年獲簽約成為TVB合約藝員。過去十年泰臣拍攝過不少劇集，其中於《AI智能愛人》中飾演機械人Rocky一角深受觀眾喜愛，特別係泰臣同蔣志光於天台講離別嘅一場戲最為催淚，感動到不少網民，獲網友紛紛留言大讚。

曾獲提名最佳男配角 卻輸畀朱敏瀚

泰臣於同年憑《AI智能愛人》成功打入《萬千星輝頒獎典禮2021》中「最佳男配角」的最後五強，不過就輸畀於《換命真相》狂騷肌肉嘅朱敏瀚，唔少網民都替泰臣感到不值。

舞台劇猛人出身 專注開班培養新人

近年泰臣除咗出演電視劇同舞台劇之外，亦主力參與幕後工作。泰臣多年來亦醉心培訓新人，不但曾經擔任TVB藝員訓練班的客席導師，近年更開辦演技訓練班，為培養新人出一番力。

曾與蝦頭拜師詹瑞文 三師徒因1事決裂

泰臣同2年前離巢TVB嘅蝦頭楊詩敏為好友，兩人多年前已經合作做舞台劇，更與韋羅莎及鄧智堅等人拜師詹瑞文，詹瑞文亦經常帶泰臣同蝦頭兩人出席活動。不過有傳隨著當年詹瑞文拋棄妻子、戀上第三者Amanda之後，雖然泰臣同蝦頭都有勸詹瑞文回頭是岸，不過詹瑞文依然一意孤行，導致三師徒因此反目，七年師徒解約決裂。