江華26歲大仔自薦入隔離病房 同屋不能見靠視像電話

撰文、圖片：東方新地

江華26歲大仔自薦入隔離病房

父母都望子成才，麥潔文與江華就教出一個充滿愛心的寶貝仔，雖然父母都是唱家班，不過大仔Bryan（陳耀淙）則自覺沒有遺傳父母的唱歌天份，加上無意做幕前，反而選擇加入醫護界做護士，近日「武漢肺炎」肆虐， Bryan更自願入隔離病房做前線醫護照顧病人，兒子捨己為人的大愛精神， 令江華夫婦深感驕傲。Kitman回應本刊記者時坦言：「佢有問我好唔 好，我話梗係好，佢講自己都決定咗，佢自小已經好有愛心，好識照顧身邊人，以前我爸爸仲未走時，嚟我哋屋企探兩個孫，Bryan會陪公公去等 巴士，仲會攞埋張凳仔去畀公公坐，唔使公公咁辛苦，呢啲咁細心嘅表現，我都未必會諗得到！就算以前讀書嗰陣，因為佢生得高大，見到啲細粒嘅同學，佢都會主動幫大家攞嘢，所以佢揀做護士，我好支持，最緊要係佢做得開心！」

同屋不能見 靠視像電話

自願加入隔離病房工作成為高風險人士， Bryan為免連累家人，更長期半自我隔離，每日放工會先WhatsApp家人，屋企人先入房迴避，等佢沖完涼返入房，家人才會出廳，就連食飯都會分開兩輪。由於兒子堅拒讓人入他的房間，連工人清潔都唔可以，Kitman現時每日會與兒子視像通話：「早兩日我哋三個（老公及女兒）同佢視像傾偈，搞出好多笑話，有時佢喺房，我就會同佢視像見面，睇吓佢個攰樣，依家呢個溝通方法都幾得意！」提到近期有醫護人員罷工， Kitman就表示兒子沒有參與，一直謹守崗位：「揀得呢份工作，都係為咗照顧幫助人，要保持初心謹守崗位，唔會諗咁多，佢依家每日都要食特敏福打底（食咁多藥唔怕辛苦？）辛苦都要嘅，最緊要係有強健身體先可以照顧到病人！」 生命不在乎長度，只在乎深度和闊度，教得一個能捨己為人的好兒 子，江華麥潔文的確有福氣！