楊英偉移居奧地利成功再拎3年居留證 20萬買商旅車方便將來歐遊

楊英偉全家攞3年居留證

楊英偉兩年前帶埋92歲的父親及妻兒，一家四口移民奧地利，並在維也納定居，日前他與家人一齊到奧地利移民局辦理手續，他們住滿兩年攞到3年的居留證，期滿後便正式入籍成為奧地利人。楊英偉在「奧地利KOL」兼好友Andy陪同下前往移民局，Andy更在Facebook留言透露：「如無意外，楊先生將會取得三年居留咭，離『永久居留』又邁進一大步……」他更指楊英偉已取得奧地利駕駛執照，「以後在歐盟可以自由開車出入……#開心日子過得特別快」。

楊英偉興奮晒證

還記得楊英偉當日在奧地利落地3個月成功拎到為期兩年的居留簽證時，他已開心到拍片晒證，今次攞到居留證，楊英偉當然更加興奮，他在照片中開心地曬證，並拍下老婆和囝囝打手指模的情況，之後更到餐廳擦大餐慶祝，看來楊氏一家在奧地利生活得非常開心，楊英偉精神飽滿笑容滿面。

奧地利養車勁易 2,500港元泊足兩年車

楊英偉唔止攞到居留證，仲攞埋當地車牌，他受訪時表示手續十分簡單，只要有醫生紙、住址證明、香港車牌等文件，再到運輸署排期就可以。楊英偉更花了約20多萬港元買了一架歐洲商旅車，又大讚奧地利養車非常容易，原來300歐元(折約港幣2,500元)就可以泊足兩年車，平均只是百多港元泊一個月，而泊車錶位9元就可泊個半個鐘，入油就1.6至1.7蚊歐元一公升，比起香港貴到離地的油價真係好抵，楊英偉更表示會趁住世界盃熱潮，下年計劃到克羅地亞自駕遊，聽到都覺得寫意。

楊英偉賣樓套現當生活費

去年楊英偉遙距賣出將軍澳日出康城的單位，用作大家在奧地利的生活費，當年他以港幣561萬買入將軍澳日出康城四房單位，最後以港幣1,100萬賣出，獲利近一倍有多。他透露自己因為不滿香港的學習環境太困難，指自己以前做過中學老師，見到學生要背中文、英文、通識內容，覺得本地教學方法無用。

楊英偉大讚奧地利生活非常易居，物價是香港的三分之一或二分一，只需邀付月租港幣一萬多元，就能租住在朋友約1,300呎的大屋；衣食住行方面的日常使費僅為香港的三分一，如交通年票都是365歐元（約港幣2,900元），而且全年任坐，非常便宜。雖然楊英偉選擇在奧地利紮根，但近年他仍不時返港拍劇，13年離開無綫後，曾參與ViuV劇集包括《身後事務所》、《打天下》、《暖男爸爸》及《IT狗》。