「清純張栢芝」楊埕IG爆男友出軌 被港姐「Miss M」橫刀奪愛

原文：東方新地｜圖片：Instagram、東方新地

楊埕IG爆男友出軌

「清純張栢芝」楊埕日前突然喺IG發火，留言疑指男友另結新歡，更是被某港姐橫刀奪愛：「不懂得拒絕女生的男人非斬不可！當女友在旁，照顧所有朋友是盡顯風度。出雙入對只照顧一位剛認識的是盡顯風流！作為女生有自信是好事但莊閒要識分！」

被港姐「Miss M」橫刀奪愛

楊埕雖無直接提到「港姐MissM」同「#MrW」係邊位，但明顯矛頭直指有人橫刀奪其愛！其後楊埕回應時指，事件是在自己生日後發生，至於喺網上鬧爆MissM，係因為覺得身為有啲名氣嘅港姐就更應該懂得尊重別人！

之後，楊埕再次喺IG story甫出唱K短片，片中寫著：「容忍的人其實並不笨 只閃寧可對自己殘忍 既然愛不能恆溫 祝福就給你下一個人」，似乎係乘機對男友出軌抒發個人感受！

慶祝完生日竟然發現男友出軌，相信係人都會嬲爆！雖然楊埕並冇進一步透露Miss M係邊個，但就憑「港姐」二字再加「M」字，其實唔難發現7位嫌疑人……

7位最大可能嫌疑人：

1｜劉佩玥（Moon）

29歲嘅劉佩玥係2013年香港小姐季軍，雖然阿Moon入行以來緋聞多多，更被稱為「收兵」高手！

阿Moon緋聞多不勝數，前年就曾爆出阿Moon同「巨聲幫」大孖周志文秘戀，二人更愈愛愈高調，不時唔避嫌一齊孖住出席友人眾會及活動！

2｜阮嘉敏（Mandy）

27歲嘅阮嘉敏係2016年香港小姐選舉嘅10強之一，落選後加入無綫，更被火速安排擔任《東張西望》外景主持。近年更多咗幕前機會，除先後喺7套劇集中客串出演，亦有綜藝節目演出機會，例如喺《美女廚房》中擔任其中一位美女學徒！

憑著甜美樣貌及姣好身材，Mandy一直深得唔少男網民支持及愛戴，而識做嘅佢平日亦愛喺IG派福利晒靚腿！

3｜邱晴（Mandy）

參選2017年香港小姐競選嘅Mandy曾被稱為「嫩版李珊珊」，可惜都係八強止步，賽後因樣貌甜美而被受網民歡迎！

Mandy被TVB力捧，擔任《Think Big天地》主持，之前亦擔任《美女廚房》嘅「美少女學徒」，平日亦鍾意喺IG晒靚相，身材弗爆嘅佢最愛都係晒腿！

4｜麥美恩（Mayanne Mak）

Mayanne雖然只係2011年香港小姐第四名，不過就憑開朗、唔造作兼風趣幽默嘅傻大姐性格而成功受大眾歡迎！

娛樂主播許文軒（Edmond）就係Mayanne一直嘅唯一一位緋聞男友，早前Mayanne更喺節目《流行經典50年》中公開示愛，唔知Edmond係真命天子定係煙幕呢？

5｜文凱玲（Connie Man）

文凱玲曾參選2010年度香港小姐競選，不過最終名落孫山。然而，文凱玲早前憑劇集《荷里活有個大老千》中飾演純情玉女「明珠」而成功入屋，而戲外佢就有位貌似藝人陳浩民的中佬男友！

上個月，文凱玲及男友就被《東方新地》野生捕獲，二人一齊拍拖坐火車返男友新界寓所，雖然Connie對住唔屬高大俊男、冇車要坐公交代步嘅平民男友，但女方仍然每刻甜入心！因此，熱戀中嘅佢相信會撬人長腳機會極微！

6｜麥明詩（Louisa Mak）

27歲嘅10A港姐麥明詩係2015年嘅港姐冠軍，16年宣布與拍拖近三年嘅林作分手後一直單身，但早前曾揚言自己正積極搵新感情！

不過，工作忙碌嘅Louisa之前為慈善由香港踩單車去柬埔寨，期間更與隊友單車手胡健燊（Jack）傳緋聞，所以暫時嫌疑唔大！

7｜黃智雯（Mandy）

貴為無綫花旦嘅黃智雯曾參選《2007年度香港小姐競選》並入圍最後五強，不過眾所周知Mandy同任職珠寶公司高層嘅男友Anthony一向感情穩定，拍拖7年只差拉埋天窗，所以雖然係嫌疑人之一，但撬牆腳嘅機會不大！

曾與錢小豪子拍拖

話說，2015年楊埕曾與錢小豪兒子龐景峰拍拖，可惜二人兩年後宣布分手，之後女方注專工作。早前楊埕投資百萬開美容院，再與友人經營時裝頻度，最近更宣布開設自家製作公司，似乎係想開電影捧自己做女主角！

曾打入港姐16強

楊埕在2014年的港姐選舉中，曾打入16強，並成為大熱門之一，被封為「清純張栢芝」，但中途因同前唱片公司合約問題而退選，翌年佢再代表香港參加在日本舉行的《國際小姐》競選，但並未能得獎。

2014年港姐冠亞季軍為邵珮詩、王卓淇及何艷娟，早前何艷娟舉行婚禮，楊埕亦有份做姊妹。