鍾培生晒100萬現金宣戰 林作突縮沙借阿媽過橋 被指呃香港人錢

文：東方新地｜圖：林作、鍾培生IG及FB圖片

林作：為作戰作準備

林作早前曾以半價出售心愛的名牌西裝，表示要籌夠100萬以為其保險團隊招募100個人才。金額與鍾培生訪問中所說相同，因此林作在這篇報道下留言嘲諷：「抄我100萬？」鍾培生隨即向林作宣戰說：「你咁想紅我幫你，我地打一場，你贏左我幫你找100萬，你輸左我都比30萬出場費你。」

林作初時曾上載自己兩張打拳照，揚言：「驚都未驚過。我打開。」又在網上發起眾籌70萬，話要「同佢死過！」但並未有寫上收款方法，而鍾培生就回應：「你唔使呃香港人錢，你話要有一球就打，無問題港幣一百萬我贏輸都畀你，我依家book場搵製作同寫合約，你唔使講咁多廢話你簽約唔好縮沙就OK。No bullshit let’s go！」

兩個有錢仔派咁大粒花生，網友當然搶住食，不過網友偏向覺得鍾培生贏面比較大，留言勁寸林作：「你都應該比人教訓架啦。」、「打死左，就係林作保險最大既宣傳。」、「知唔知你對手曾經係拳手？」、「一睇你身形就知你係練武奇才，加油。」

之後林作上載與母親飲茶及派利是照，表示「無暇顧及鍾先生的邀約」，又說：「目前本人態度開放，但老媽子表示不認識鍾先生，擔憂未夠知名度（並非惡意，僅僅陳述事實），需要少少時間起底並衡量。我們不懷疑對方家底比自己厚，但有錢不代表一切。」似乎採「拖」字訣。

到了今日（2月19日）凌晨林作又改口對鍾培生說：「鍾培生先生，我諗過架喇，以下係我嘅答覆：我畀200萬港紙畀你，你畀我打一鑊。」又上載生髮廣告片，話自己正在調理身體，為作戰作準備，並在片中戴上一條毛巾頭帶時，說：「呢條頭巾會係我到時上擂台PK鍾培生時所著嘅！」瘋狂抽水！

鍾培生：唔該唔好再抽我水

網友都紛紛留言鬧爆林作淆底縮沙，表示：「仲喺度拍廣告！？咪走數，幾時打？」、「人地錢都拎埋出黎，你唔係唔打呀？」、「笠水唔打就出聲啦，做男人做到咁核突。」、「同佢打好過你做COT喇！一日賺一百萬，我係你就撩佢星期一至五日日打，星期六日休息shopping買西裝。」

而鍾培生就晒出一張手拿一大叠一千蚊紙的相片，再度向林作宣戰說：「林作呢度100萬，你簽左就係你嘅。我本身唔識你，你零誠信令我睇唔起你。唔該你唔好再抽我水，我唔想同你拉上任何關係。擂台面前人人平等，你要借我上位擂台見。我相信打得成，會係近年來香港人最開心嘅事。No bullshit let’s go！」

網友都大讚鍾培生係「真男人」，又話「支持打爆林作」、「打完媾埋佢條女」、「有冇得眾籌打死佢」、「支持啊！唔好放水！加操打大力啲！」、「鍾老闆，打還打，記得打面！」等，狂食花生，連王晶個女王子涵都有留言力撐鍾培生！