李家鼎懶理私房菜執笠 一人擔起兩頭家靠做節目保人氣
廣告
73歲鼎爺李家鼎，近年主持《阿爺廚房》爆紅，觀眾見識到鼎爺武術 功架以外一流的刀鋒及廚藝，下廚見真章，除咗煮得，鼎爺做主持更盡見細心及風度一面，成功入晒屋。早年遇上第二春，鼎爺對住女友即變小綿羊，躁火已成過去式，即使早前私房菜生意下滑，《鼎會館》執笠關門大吉，搵少咗的鼎爺仍無懼風浪，最緊要有好心情。
撰文、圖片：東方新地
李家鼎打得又煮得 收入水漲船高
入行五十四年，擔任演員及動作指導的李家鼎，武術精湛早就人所共知，直至2016年主持《阿爺廚房》廚藝真功夫一鳴驚人，觀眾驚嘆他武功了得外廚藝更冇得彈，變「廚男」人氣急升，鼎爺更連開三間菜館，又出書又拍廣告，成為活動紅人，收入水漲船高！
懶理私房菜執笠 靠做節目保人氣
廚藝狂吸客，名人明星慕名幫襯，鼎爺經營的私房菜入場費閒閒地要兩萬幾蚊一圍，一度被指價格與價值不相稱，加上近期因社會局勢生意下滑，早前《鼎會館》執笠收場，但見慣風浪的他，依然處之泰然。據知情者透露：「雖然私房菜執咗一間，但其實仲有兩間經營緊，加上最近《阿爺廚房》又播出第四輯，鼎爺仲 keep住人氣，而且佢識得分散投資，打本畀兩個仔經營日式燒肉店及拉麵店，背後都係佢做軍師。」
一人擔起兩頭家 同女友共享湊孫樂
一個人擔起兩頭家，鼎爺近年亦搵得就搵，除咗幕前演出，私房菜生意亦親力親為，同女友更好有默契，經常夫唱婦隨，女友不時陪 鼎爺入電視城開工，又會落私房菜館幫手打點，幾年前女友做咗外 婆，鼎爺更視女友孫女如親孫女一樣愛錫，一得閒便弄孫為樂。趁著新年假期，鼎爺忙完工作即把握時間陪家人共敍天倫。
