曾志偉正日生日包場開Party 一眾女星狂錫臉頰令總經理好興奮

派對玩得盡興 要求大家「盡量唔好影相」

除咗大班老朋友之外，志偉嘅親友子女亦都有來港一齊慶祝。佢又話為等大家都玩得盡興，不醉無歸，仲要求大家盡量唔好影相，就算影完都避免擺上網呀。

踏入70歲之後，志偉就話心境上要學識注意身體，仲話連日慶祝晚晚都醉到不醒人事呀。而之前一晚佢又再次舉辦咗慈善素宴，同大班朋友共襄善舉，籌得善款760萬仲破晒紀錄呀。

同志偉拍檔搞笑出晒名嘅 林敏驄 呢日當然都有到賀啦，佢仲妙語如珠咁恭祝對方。而 謝天華 同 陳小春 就齊齊到場，仲有唔少賓客都齊齊估到底志偉幾點會醉呀。至於獲邀參加嘅《中年好聲音》一班參賽者亦都跟足黑白Dress Code到場，原來志偉係想佢哋更加了解藝人生活同認識多啲音樂界朋友呀。

樂易玲搶先突襲 成班囡囡獻吻

早前無綫電視總經理（節目內容營運）曾志偉就嚟70大壽，難得高層生日咁威水，大台成班姐仔小生緊係空巢而出，攜同助理總經理樂易玲突襲曾志偉，準備驚喜派對冧爆153。睇返啲相曾志偉個樣相當嗒糖，除咗有巨型壽桃蛋糕吹吓蠟燭，仲獲成班囡囡獻吻啜啜！

唔好以為靚女先有得獻吻啵，今次連薛家燕同肥媽都唔執輸，左右護神啜爆曾志偉臉仔，嘴仔仲要貼到實一實，不過兩位大姐加埋142歲，唔知錫錫嗰時附近有冇濃烈驅風油味飄過呢？

薛家燕肥媽嘴仔貼實爆啜志偉 153表情相當嗒糖

總經理曾志偉難得就嚟70大壽，無綫成班姐仔小生睇準時機，準備驚喜派對冧爆153。成班囡囡簡直搏到盡，紛紛向曾志偉獻吻，哪怕是加埋有142歲嘅薛家燕同肥媽，一樣唔輸畀班後生女，左右夾攻貼實曾志偉塊面起勢啜啜啜。講到搏盡認真要提吓69歲嘅肥媽，爆啜總經理都未夠喉，仲要捉實曾志偉二頭肌近膊位置，搞到咁鬼肉緊，唔知係未當年拍完《大丈夫》世紀錫戲「餘情未了」，今次一鋪再嚟料呢？

相對之下73歲薛家燕就含蓄好多，啜面嗰陣都係搭吓曾志偉膊頭，尚算有啲儀態！曾志偉向來喺娛圈出晒名份人夠nice好識做，今次畀半百大嬸啜面都表情交足功課，擺出一副嗒糖冧樣，笑言：「唉，嗰啲人妻又有，人媽又有，唉！」場面溫馨惹笑！

生日會陣容疊馬似台慶

無綫電視總經理（節目內容營運）曾志偉上任兩年多，成功搞到大台有聲有色，班藝人唔似之前某離巢大媽高層在位咁，無機會上位試新嘢，依家幾乎全民皆兵，班藝人當然真心服晒曾志偉，幫佢大搞70歲賀壽派對，同場仲有高層樂易玲、高海寧、劉佩玥、馮盈盈、黎諾懿、洪永城、江嘉敏、吳若希、鄭俊弘以及宋宛穎等，呢個陣容似足台慶咁疊馬！

曾志偉成功咁受歡迎，成班人陪唱生日歌，佢都高聲說出生日願望：「希望大家都身體健康，賺多啲！」估唔到153一把年紀咁勞碌，生日派對仲為同事著想！